အင်ကြင်း/People’s Spring
မန္တလေးတိုင်း၊ တံတားဦးမြို့နယ်ရှိ စစ်ကောင်စီ၏ လေတပ်စခန်းအား လက်နက်ကြီးဖြင့် ပစ်ခတ်တိုက်ခိုက်ခံရကြောင်း သတင်းရရှိသည်။
စက်တင်ဘာ ၁၇ရက် ည ၁၀နာရီကျော်တါင် တံတားဦးလေတပ်စခန်းအတွင်း လက်နက်ကြီးကျရောက်ကာ ပြင်းထန်စွာပေါက်ကွဲခဲ့ကြောင်း မန္တလေးတော်လှန်ရေးဖြစ်စဥ်များ အသိပေးနေသည့် MDY Revolution က ဖော်ပြသည်။
Public Service Announcement
လက်နက်ကြီး တစ်လုံးမှာ လေတပ်စခန်း သိုလှောင်ရုံအတွင်း ကျရောက်ပေါက်ကွဲကာ ကျန်တစ်လုံးမှာ လယ်ကွင်းအတွင်း ကျရောက်ခဲ့ကြောင်း၊ လူထိခိုက်မှုမရှိခဲ့ကြောင်း MDY Revolutionက ဆိုသည်။
“ကြားလိုက်တယ်။ ညလည်း ညဖြစ်နေတော့ ဘာမှတော့မသိရဘူး။ ကြားရသလောက်ကတော့ ထိခိုက်တာတွေ မကြားဘူး။”ဟု တံတားဦးဒေသခံတစ်ဦးက ပြောသည်။
တိုက်ခိုက်မှုဖြစ်စဥ်အား မည်သည့်အဖွဲ့များက လုပ်ဆောင်သည်ကို သတင်းထုတ်ပြန်ခြင်းမရှိသေးပေ။
တံတားဦးလေတပ်စခန်းသည် ရှမ်းပြည်နယ်မြောက်ပိုင်း၊ စစ်ကိုင်း၊ မကွေး၊ မန္တလေး အစရှိသည့်ဒေသများအား လေကြောင်းတိုက်ခိုက်ရာတွင် အဓိကအသုံးပြုသော လေတပ်စခန်း ဖြစ်ကြောင်း ဒေသကာကွယ်ရေးအဖွဲ့များက ပြောသည်။
တံတားဦး လေတပ်စခန်းကို ပြီးခဲ့သည့် ဇန်နဝါရီ ၂၃ ရက်ကတစ်ကြိမ်၊ ဧပြီ ၁၇ရက်ကတစ်ကြိမ် ကာကွယ်ရေးတပ်ဖွဲ့များက ရှော့တိုက်ဒုံးဖြင့် ပစ်ခတ်တိုက်ခိုက်ခဲ့သေးသည်။
ဇန်နဝါရီ ၂၃ ရက်က တံတားဦးလေတပ်စခန်းအား တိုက်ခိုက်မှုတွင် ရှော့တိုက်ဒုံး ၅ လုံးဖြင့် ပစ်ခတ်ခဲ့ပြီး ကျန် ၇လုံးမှာ ချွတ်ယွင်းမှုများ ရှိခဲ့သဖြင့်ထားခဲ့ရကြောင်း မြို့ပြပြောက်ကျားအဖွဲ့များက ပြောထားသည်။
