မိထက်/People’s Spring
ရှမ်းပြည်နယ်မြောက်ပိုင်း သီပေါမြို့ကို ယမန်နေ့(စက်တင်ဘာ ၂၃ရက်)ညနေတွင် စစ်ကောင်စီက လေကြောင်းမှ ဗုံးကြဲတိုက်ခိုက်ရာ နေအိမ်တစ်အိမ်ပေါ် ကျရောက်ပေါက်ကွဲပြီး မိသားစုဝင်လေးဦးသေဆုံးခဲ့ကြောင်း သတင်းရရှိသည်။
သီပေါမြို့နယ် လီဆူးကျေးရွာကို ယမန်နေ့ညနေ ၃နာရီခွဲတွင် စစ်ကောင်စီက လေကြောင်းမှ ပေါင် ၅၀၀ ဗုံးကြဲချခြင်းဟု မြို့ခံတစ်ဦးက ပြောသည်။
Public Service Announcement
” ကလေးတွေလည်းပါတယ်။ မြေးအဖွားလေးဦး သေဆုံးသွားတာ။ နာရေးတော့ လူမှုရေးအဖွဲ့တွေကလုပ်ပေးပြီးပြီ။ လေကြောင်းကတော့ လုံးဝစိတ်ချမရဘူး”ဟု သီပေါမြို့ခံတစ်ဦးကပြောသည်။
သီပေါမြို့မှ ရဲစခန်း၊ ထွေအုပ်ရုံးအပါအဝင် စစ်ကောင်စီစခန်းများကို ပြီးခဲ့သည့် ဩဂုတ်၁၀ရက် ကစ၍ တအာင်းအမျိုးသားလွတ်မြောက်ရေးတပ်မတော်(TNLA)နှင့် မဟာမိတ်များက တိုက်ခိုက်ခဲ့ပြီး နောက်တိုက်ပွဲအပြင်းအထန်ဖြစ်ပွားခဲ့သည်။ မြို့အတွင်းရှိ စစ်ကောင်စီတပ်ဖွဲ့ဝင်များသည် ခလရ(၂၃)၊ ခမရ (၅၀၃)၊ ခမရ(၅၀၄)အတွင်းသို့ ဆုတ်ခွာသွားခဲ့ပြီး ဆက်လက်ခုခံနေသည်။
မြို့ပေါ်ကို TNLA က ထိန်းချုပ်ထားသည်။ သြဂုတ်လလယ်မှ စက်တင်ဘာလလယ်အထိ တိုက်ပွဲအရှိန်လျော့ကျသွားပြီးနောက် စက်တင်ဘာ ၂၀ရက်ကစ၍ တိုက်ပွဲပြင်းထန်နေကြောင်း သတင်းရရှိသည်။
စစ်ကောင်စီသည် စက်တင်ဘာ ၁၉ရက်ကလည်း သီပေါမြို့နယ် ကုန်းသာကျေးရွာကို ပေါင်၅၀၀ ဗုံးကြဲချတိုက်ခိုက်ခဲ့ကြောင်း TNLA က ထုတ်ပြန်ထားသည်။
ထို့အပြင် စစ်ကောင်စီသည် ယနေ့နံနက်အစောပိုင်းတွင် လားရှိုးမြို့ကိုလေကြောင်းမှ တိုက်ခိုက်ခဲ့ရာ ဒေသခံတစ်ဦးသေဆုံးပြီး ၁၅ဦးထက်မနည်းဒဏ်ရာရရှိခဲ့သည်။
