ဟန်နွေ/People’s Spring
ရှမ်းပြည်နယ်မြောက်ပိုင်း၊ သီပေါမြို့နယ် အခြေစိုက် စစ်ကောင်စီ၏ အမှတ် ၅၀၃ နှင့် အမှတ် ၅၀၄ခြေမြန်တပ်ရင်း ( ခမရ-၅၀၃ ၊ခမရ-၅၀၄) တပ်ရင်းများကို တအာင်းတပ်မတော်(TNLA) က စက်တင်ဘာ၂၇ ရက်မနက်အစောတွင် အပြီးသတ် ထိန်းချုပ်နိုင်ခဲ့ကြောင်း စစ်မြေပြင် သတင်းရင်းမြစ်က ပြောသည်။
ခမရ(၅၀၃)တပ်ရင်းကို သိမ်းပိုက်နိုင်ပြီဖြစ်ကြောင်း ဒေသခံ အချို့နှင့် ဒေသတွင်းသတင်းဌာန ရွှေဖီမြေက ဖော်ပြချက်နှင့်ပတ်သက်ပြီး စစ်မြေပြင် သတင်းရင်းမြစ်အား မေးမြန်းရာ
Public Service Announcement
“ဟုတ်တယ်။ ဟုတ်တယ်။ တစ်ခုမဟုတ်ဘူး။ သီပေါမှာ ၂၃ (ခလရ ၂၃) တပ်ပဲ ကျန်တော့တာ။ ၅၀၃ ၊၅၀၄ လည်း ဒီမနက်ပေါ့ အပြီးသတ် ကျနော်တို့ဘက်က ထိန်းချုပ်လိုက်ပြီ” ဟု စစ်မြေပြင် သတင်းရင်းမြစ်က ပြောသည်။
သီပေါ၌ စစ်ကောင်စီတပ်ရင်း သုံးခုကျန်နေရာမှတပ်ရငးနှစ်ခုကို သိမ်းပိုက်နိုင်ပြီဖြစ်၍ နောက်ဆုံးကျန်နေသော အမှတ် ၂၃ ခြေလျင်တပ်ရင်း (ခလရ-၂၃)ကို ထပ်မံ သိမ်းနိုင်ပါက သီပေါမြို့နယ်အတွင်း စစ်ကောင်စီတပ်ရင်းဌာနချုပ်များ ကင်းစင်သွားမည်ဖြစ်သည်။ လက်ကျန်တပ်စခန်းခလရ(၂၃)တွင်လည်း ယနေ့ တိုက်ပွဲဆက်ဖြစ်နေကြောင်း ဒေသခံ တစ်ဦးက ပြောသည်။
TNLA ပြောရေးဆိုခွင့်ရှိသူ လွေးယေဦးက သီပေါနှင့် နောင်ချိုတွင် တိုက်ပွဲဆက်ဖြစ်နေကြောင်း ပြောသော်လည်း သို့ရာတွင် သီပေါရှိ စစ်ကောင်စီ တပ်ရင်းအချို့ သိမ်းပိုက်နိုင်မှုကို အတည်မပြနိုင်သေးဟု ၎င်းက ယနေ့ ပြောပြသည်။
TNLA အနေဖြင့် လက်ရှိတွင် သီပေါမြို့ကို သိမ်းပိုက်ထိန်းချုပ်ထားသည်။ ယခုနှစ် ဇွန်လနောက်ဆုံးပတ်မှစတင်ခဲ့သည့် ၁၀၂၇ စစ်ဆင်ရေးဒုတိယပိုင်းတွင် နောင်ချို၊ မိုးကုတ်၊ မိုးမိတ်၊ ကျောက်မဲနှင့် သီပေါမြို့များကို PDFများ ၊မဟာမိတ်တပ်များနှင်အတူ သိမ်းပိုက်ထားသည်။ထိုနောက် နောင်ချို့မြို့နယ် ၊တောင်ခမ်းရှိ လက်ကျန် စစ်တပ်အမြောက်တပ်ရင်း နှင့် သီပေါမြို့နယ်ရှိ လက်ကျန်တပ်ရင်း ၃ ရင်းကို အပြီးသတ်သိမ်းပိုက်နိုင်ရန် ဆက်လက်ထိုးစစ်ဆင်နေခြင်းဖြစ်သည်။
(ရှေ့တန်းတစ်နေရာမှ TNLA တပ်ဖွဲ့ဝင်များ။ ဓါတ်ပုံ-TNLA)
