ဟန်နွေ/People’s Spring
ချင်းပြည်နယ် မင်းတပ်မြို့ရှိ ပြည်သူများ၏ နေအိမ်များကို စစ်ကောင်စီတပ်က ယနေ့ အောက်တိုဘာ ၁ရက်တွင် ထပ်မံ မီးရှို့ခဲ့ရာနေအိမ် ၃၀ကျော် မီးလောင်ပျက်စီးခဲ့ကြောင်း မင်းတပ်ဒေသခံက ပြောသည်။
မင်းတပ်မြို့ အနောက်ရပ်ကွက် ဘုရင့်နောင် လမ်းခွမှစ၍ မင်းတပ်- မတူပီ ကားလမ်းမတလျှောက်ရှိ နေအိမ်များကို စစ်ကောင်စီတပ်က မီးရှို့ခဲ့ကြောင်း၊ စစ်ကောင်စီတပ် ခလရ(၂၇၄) တပ်ရင်းမှ စစ်ကောင်စီတပ်သားများက ဆိုင်ကယ် ၃စီးဖြင့် ဓာတ်ဆီများ သယ်ဆောင်ကာ တစ်အိမ်တက်ဆင်းမီးရှို့ခဲ့ရာ နေအိမ် ၃၀ကျော် မီးလောင်ခဲ့ကြောင်း ဒေသခံက ဆိုသည်။
Public Service Announcement
” သူတို့ မြင်ကွင်းကွယ်တာတွေကို လိုက်ရှို့နေတာလို့ မြင်ပါတယ်”ဟု မင်းတပ်ဒေသခံက ပြောသည်။
စစ်ကောင်စီတပ်သည် ခလရ(၂၇၄)တပ်ရင်း အပါအဝင် ၎င်းတို့ တပ်စွဲထားသည့် နေရာများ အနီးဝန်းကျင်ရှိ နေအိမ်များကို မီးရှို့မှုများ ဆက်တိုက်ပြုလုပ်နေခြင်းဖြစ်သည်။
မီးငြှိမ်းသတ်ရန်လာသည့် ဒေသခံပြည်သူများကို စစ်ကောင်စီက ပစ်ခတ်၍ အနားကပ်နိုင်ခြင်းမရှိဟုလည်း ဒေသခံက အသိပေးထားသည်။
ချင်းဒေသကာကွယ်ရေးတပ်(CDF) – မင်းတပ်၏ ထုတ်ပြန်ချက်အရ စစ်ကောင်စီတပ်သည် မင်းတပ်မြို့ရှိ ပြည်သူလူထု နေအိမ်များကို မီးရှို့ခဲ့ရာ ဩဂုတ်တွင် နေအိမ် ၆လုံး၊ စက်တင်ဘာတွင် ၆ကြိမ်မီးရှို့ပြီး နေအိမ်အလုံး ၃၀ မီးလောင်ပျက်စီးခဲ့ကြောင်း သိရသည်။
စက်တင်ဘာ ၂၁ရက်မှစ၍ စစ်ကောင်စီတပ်က မင်းတပ်မြို့ကို ဆက်တိုက်မီးရှို့ဖျက်ဆီးမှုများ ပိုလုပ်လာခြင်းဖြစ်သည်။
ထို့ပြင် မင်းတပ်မြို့ကို စစ်ကောင်စီက လေကြောင်းတိုက်ခိုက်ခြင်း၊ လေကြောင်းမှ ခလရ(၂၇၄)တပ်ရင်းသို့ လက်နက်ခဲယမ်းရိက္ခာဖြည့်တင်းခြင်းများပြုလုပ်ခဲ့ရာ ဩဂုတ်၊ စက်တင်ဘာ နှစ်လအတွင်းလေကြောင်း တိုက်ခိုက်မှု ၄၄ကြိမ်ရှိခဲ့ပြီး လေကြောင်းမှ လက်နက်ခဲယမ်းရိက္ခာချပေးမှု အကြိမ် ၅၀ကျော် ရှိခဲ့သည်ဟု CDF မင်းတပ်က စက်တင်ဘာ ၂၉ရက်တွင် ထုတ်ပြန်ထားသည်။
