လူအေး/People’s Spring
ရခိုင်ပြည်နယ် တောင်ကုတ်မြို့နယ်ကင်းတောင်ရွာကိုစစ်ကောင်စီက လေကြောင်းမှဗုံးကြဲတိုက်ခိုက်ရာ ကလေးငယ်တစ်ဦးအပါအဝင် အရပ်သားလေးဦး သေဆုံးခဲ့ကြောင်း ဒေသခံအချို့ကပြောသည်။
ယနေ့ (အောက်တိုဘာလ ၄ ရက်)နံနက် ၂ နာရီ ၁၅နစ်ခန့်တွင် ဂျက်ဖိုက်တာဖြင့် ဗုံးသုံးလုံးကြဲချခြင်းဟု ဒေသခံတဦးကပြောသည်။
“ကင်းတောင်ကို ပစ်မှတ်ထားနေတယ်။ ဒီနေရာမှာ တပ်တော် (AA)မရှိပါ။ ဘာကြောင့် ခဏခဏလာပစ်နေတာလဲ မသိပါ”ဟု ဒေသခံတစ်ဦးကပြောသည်။
Public Service Announcement
စစ်ကောင်စီဗုံးကြဲမှုကြောင့် နေအိမ်အတွင်း အိပ်နေသည့် အသက် ငါးနှစ်အရွယ် ကလေးငယ်တစ်ဦးအပါအတင် ဒေသခံလေးဦးသေဆုံးပြီး ၁၀ဦးကျော် ဒဏ်ရာရခဲ့သည်ဟုဒေသခံအချို့ကပြောသည်။
သေဆုံးခဲ့သူများမှာ ကင်းတောင်ရွာမှ မောင်ဇင်ဟိန်းကို(၉ နှစ်)၊ ဦးမောင်လှတင်(၆၅ နှစ်)၊ ဒေါ်မြရီ(၅၆နှစ်)နန့် ဒေါ်မြကြည်(၇၄နှစ်) တို့ဖြစ်ကြောင်းရခိုင်ပြည်နယ် ဒေသတွင်းသတင်းများဖော်ပြပေးနေသော Arakan Princess Media ကဖော်ပြသည်။ ဒဏ်ရာရသူ များတွင် ကလေးငယ် နှစ်ဦး နှင့် သက်ကြီးရွယ်အို ၇ ဦးအပါအဝင် စုစုပေါင်း ၁၃ ဦးဖြစ်ကြောင်း APM ကရေးသားထားသည်။
တောင်ကုတ်မြို့နယ်ကို ဇွန်လ ဆန်းမှစ၍ စစ်ကောင်စီက ဗုံးကြဲတိုက်ခိုက်မှု ပိုလုပ်နေခြင်းဖြစ်သည်။ဇွန်လ ၁၄ရက်မှ စ၍ တောင်ကုတ်မြို့နယ် နေရာအချို့ကို စစ်ကောင်စီကလက်နက်ကြီးများဖြင့်ပစ်ခတ်ခဲ့သည်။ ဇွန်လ ၁၅ ရက်နေ့လယ် ၁နာရီခန့်ကတောင်ကုတ်မြို့၊ မီးချောင်းထိုး၊ မောင်းကန်နှင့် ကင်းတောင်ကျေးရွာတို့ကိုဂျက်ဖိုက်တာဖြင့် ဗုံးကြဲတိုက်ခိုက်ရာ အရပ်သားတစ်ဦးသေဆုံးခဲ့သည်။ဇွန်လ ၁၇ရက်နေ့လယ်က လက်နက်ကြီးပစ်ခတ်မှုတွင် တောင်ကုတ်တက္ကသိုလ်ဝင်းအတွင်း ကျရောက်ပေါက်ကွဲခဲ့သည်။ဇွန်လ ၁၈ ရက်နံနက် ၁၀နာရီခန့်က တောင်ကုတ်မြို့နယ်၊ကံဆိပ်ကျေးရွာကို စစ်ကောင်စီက လေကြောင်းဗုံးကြဲတိုက်ခိုက်ရာအသက် ၇ နှစ်အရွယ် ကလေးငယ်တစ်ဦးအပါအဝင်သုံး ဦးသေဆုံးခဲ့သည်။
ထို့အပြင်တောင်ကုတ်မြို့နယ် ရွာမကျေးရွာကို စက်တင်ဘာလ ၂၄ ရက် ည ၉ နာရီက ဗုံးကြဲတိုက်ခိုက်ရာ အသက် ၃၀ ကျော်အရွယ် အမျိုးသားနှစ်ဦးသေဆုံးပြီး သုံးဦးဒဏ်ရာရရှိခဲ့သည်။
အောက်တိုဘာလ ၂ ရက်နေ့ ညကလည်း တောင်ကုတ်မြို့နယ် ခေါင်းလောင်းတူကျေးရွာကို စစ်ကောင်စီက လေကြောင်းမှ တိုက်ခိုက်မှုကြောင့် အသက် ၇ နှစ်အရွယ် ကလေးငယ်တစ်ဦးဒဏ်ရာရရှိခဲ့သည်။
စစ်ကောင်စီသည် အောက်တိုဘာနံနက်ပိုင်းက တောင်ကုတ်မြို့ကို လေကြောင်းမှ ဗုံးကြဲသလို ရှမ်းပြည်နယ်မြောက်ပိုင်း လားရှိုးမြို့ကိုလည်း ဗုံးကြဲ၍ ပြည်သူတစ်ဦးဒဏ်ရာရပြီးအဆောက်အအုံများပျက်စီးခဲ့သည်။
