ကျော်ဇော/People’s Spring
ပဲခူးတိုင်း၊ မင်းလှမြို့တွင် စစ်ကောင်စီတပ်မှ ဖမ်းဆီးရိုက်နှက်နှိပ်စက်၍ ပြည်သူတစ်ဦးအ သက်ဆုံးရှုံးခဲ့ကြောင်း ဒေသခံပြည်သူများက People’s Spring သို့ ပြောသည်။
စက်တင်ဘာလ ၂၉ ရက်နေ့ ညနေ ၃ နာရီခန့်က စစ်ကောင်စီထွေအုပ်ရုံးရှေ့၌ ဆိုက္ကားသမားချင်းချင်း စကားများရန်ဖြစ်ကြရာ ထွေအုပ်ရုံးတွင်အစောင့်ချထားသည့် စစ်ကောင်စီတပ်သားများက အချင်းများသူများအနက် ဦးသန်းအောင်ဆိုသူအား ဖမ်းဆီးရိုက်ခဲ့ခြင်းဖြစ်ကြောင်း ဒေသခံများက ပြောသည်။
Public Service Announcement
“ဦးသန်းအောင်က အရက်နည်းနည်းသောက်တတ်တယ်။ (အချင်းများသူများအနက်မှ)သူ့ကိုပဲဖမ်းတာ။ ဖမ်းတဲ့ စကစတွေကလည်း မူးနေတာ”ဟု မင်းလှမြို့မှ ဒေသခံတစ်ဦးက ပြောသည်။
စစ်ကောင်စီတပ်သားများသည် ဦးသန်းအောင်အား ဖမ်းဆီးရိုက်နှက်ပြီးနောက် ထွေအုပ်ရုံးအတွင်းရှိနေသည့် စစ်ကောင်စီဗိုလ် ကြီးအာကာစိုးထံအပ်နှံရာ ၎င်းဗိုလ်ကြီးဆိုသူမှ ဦးသန်းအောင်၏
ခြေထောက်အား ရိုက်ချိုးခြင်း၊ မီးပူဖြင့် ခန္ဓာကိုယ်အားကပ်ခြင်းအပြင် အမျိုးမျိုးနှိပ်စက်သောကြောင့် သေဆုံးသွားခြင်းဖြစ်ကြောင်း အထက်ပါဒေသခံက ဆက်ပြောသည်။
ထို့ကြောင့် ဖမ်းဆီးနှိပ်စက်ခံရပြီးနောက်တစ်ရက်ဖြစ်သည့် စက်တင်ဘာလ ၃၀ ရက်နေ့မနက်ပိုင်းတွင် မင်းလှဆေးရုံသို့အလောင်းလာယူရန်စစ်ကောင်စီဘက်မှ မိသားစုထံအကြောင်းကြားခဲ့ပြီး သေဆုံးရသည့်အ ကြောင်းအရင်းကိုမူ သွေးတိုး၍ရုတ်တရက်သေဆုံးရခြင်းဖြစ်ကြောင်း ဖိအားပေးကာ လက်မှတ်ထိုးခိုင်းသည်ဟု ဒေသခံများက ပြောသည်။
စစ်ကောင်စီတပ်သားများ ရိုက်နှက်နှိပ်စက်၍ သေဆုံးသွားသော ဦးသန်းအောင်သည် မင်းလှမြို့ ဗိုလ်ရုံလမ်းတွင်နေထိုင်ဖြစ်ပြီး အ သက် ၆၀ ခန့်ရှိကာ ၎င်းအားမှီခိုနေသည့်မိသားစုဝင်များလည်းရှိကြောင်း စုံစမ်းသိရသည်။
မင်းလှမြို့နယ်တွင် စစ်ကောင်စီတပ်မှ ပြည်သူများအား အကြောင့်မဲ့ ဖမ်းဆီးရိုက်နှက်နှိပ်စက်မှုများလုပ်ဆောင်လျှက်ရှိရာ ယခုဦးသန်းအောင်ဖြစ်စဥ်အပါအဝင်၂၀၂၂ ခုနှစ်မှ ယခုကာလအထိစစ်ကောင်စီတပ်ရိုက်နှက်နှိပ်စက်၍ အသက်ဆုံးရှုံးရသည့်ပြည်သူ ခြောက်ဦးရှိပြီဖြစ်သည်။
