ဟာနာဆန်/People’s Spring
မကွေးတိုင်း၊ ရေစကြိုမြို့တွင် စစ်ကောင်စီတပ်သားနှင့်ပျူစောထီးများက မြို့ပေါ် နေအိမ် များအား ဝင်ရောက်အနုကြမ်းစီးပြီး နေအိမ် နှစ်လုံး မီးရှို့ဖျက်ဆီးခဲ့ကြောင်း ဒေသခံများက ပြောသည်။
အောက်တိုဘာ ၅ရက် နံနက် ၆နာရီခန့်က ရေစကြိုမြို့၊ အမှတ် (၈)၊ စိတ္တသုခရပ်ရှိ ဒေါ်သန်းအေး ဆိုသူ၏နေအိမ်ကို စစ်ကောင်စီတပ်သားနှင့် ၎င်းတို့လက်အောက်ခံ ပျူစောထီးများ ဓားပြတိုက်သွားရာ ရွှေထည်နှင့်အဖိုးတန်ပစ္စည်းများ ပါသွားကြောင်း ဒေသခံများက ပြောသည်။
Public Service Announcement
အလားတူ ယင်းနေ့ နေ့လယ် ၂ နာရီခွဲခန့်ကလည်း အမှတ် (၁)၊ ထင်းတန်းရပ်ရှိ နေအိမ် နှစ်လုံးအား စစ်ကောင်စီတပ်က ဝင်ရောက်ပြီး အိမ်တွင်းအဖိုးတန် ပစ္စည်းများကို ယူဆောင်ကာ နေအိမ်နှစ်လုံးကို မီးရှို.ဖျက်ဆီးသွားကြောင်း ရေစကြိုသတင်းအချက်အလက်ကော်မတီ၏ အဖွဲ့ဝင်တစ်ဦးက ပြောသည်။
“မီးက တခြားမကူးပါဘူး။ အိမ်ရှင်တွေက တိမ်းရှောင်နေကြရတယ်။ အဖမ်းမခံရပါဘူး။”ဟု အထက်ပါအဖွဲ့ဝင်က ပြောသည်။
ထို့အပြင် အနီးရှိ နေအိမ် သုံးလုံးကို ဝင်ရောက် မွှေနှောက်ကာ ရွှေထည်၊ လက်ဝတ်ရတနာများ ယူဆောင်သွားကြောင်း သိရသည်။
ပြီးခဲ့သည့် မေလအတွင်းကလည်း ရေစကြိုမြို့ပေါ် အမှတ်(၇)ရပ်ကွက်နေ အငြိမ်းစားကျောင်းဆရာ ဆရာမဇနီးမောင်နှံနေအိမ် အနုကြမ်းစီးခံရကာ နှစ်ဦးလုံး သတ်ဖြတ်ခံခဲ့ရသေးသည်။
စစ်ကောင်စီတပ်အား ခုခံတော်လှန်မှုအားကောင်းနေသော ရေစကြိုမြို့နယ်တွင် မြို့ပေါ်ရှိ စစ်ကောင်စီတပ်သည် လက်နက်ကြီးဖြင့်ပစ်ခတ်ခြင်း၊ ပြည်သူများအား ဖမ်းဆီးသတ်ဖြတ်ခြင်း၊ နေအိမ်များအားဝင်ရောက်ဖောက်ထွင်းခိုးယူခြင်းများ ပြုလုပ်နေသည်။
