အီယိုရီ/People’s Spring
တိုင်းပြည်အတွင်း စစ်မှန်တဲ့ငြိမ်းချမ်းရေးနဲ့ အမျိုးသားပြန်လည်သင့်မြတ်ရေး မရရှိချိန်အထိ စစ်ကောင်စီက ရွေးကောက်ပွဲများ မကျင်းပသင့်ဘူးလို့ အမေရိကန်က တိုက်တွန်းပါတယ်။
ရွေးကောက်ပွဲများကျင်းပဖို့ စစ်ကောင်စီရဲ့ အစီအစဥ်တွေနဲ့ပတ်သက်လို့ အမေရိကန်ပြည်ထောင်စုက အလွန်စိုးရိမ်နေဆဲဖြစ်တယ်လို့ အမေရိကန်နိုင်ငံခြားရေးဌာန၊ အရှေ့အာရှနှင့် ပစိဖိတ်ရေးရာ လက်ထောက်ဝန်ကြီး Kritenbrink က ပြောပါတယ်။
“အလောတကြီးရွေးကောက်ပွဲတွေက ကိုယ်စားပြုမှုနဲ့ အားလုံးပါဝင်မှု မဖြစ်မှာကို ကျွန်တော်တို့ စိုးရိမ်ပါတယ်။ နောက်ပြီး အကြမ်းဖက်မှုတွေ ပိုဖြစ်စေပြီး လက်ရှိပဋိပက္ခတွေ ရှည်ကြာသွားနိုင်ပါတယ်” လို့ Kritenbrink က ဆိုပါတယ်။
Public Service Announcement
ဒီသီတင်းပတ်မှာ လာအိုနိုင်ငံ၊ ဗီယန်ကျင်းမြို့မှာ အာဆီယံထိပ်သီးညီလာခံကျင်းပမှာဖြစ်ပြီး ညီလာခံကို အမေရိကန်ပြည်ထောင်စုကိုယ်စား နိုင်ငံခြားရေးဝန်ကြီး အန်တိုနီဘလင်ကန် ဦးဆောင်တက်ရောက်မှာဖြစ်ပါတယ်။
အာဆီယံထိပ်သီးညီလာခံကို ဒီနေ့(အောက်တိုဘာ ၉ရက်)စတင်မှာဖြစ်ပြီး ညီလာခံကာလအတွင်း အမေရိကန်က မြန်မာနိုင်ငံ လူ့အခွင့်အရေးအခြေအနေ၊ တောင်တရုတ်ပင်လယ်အရေးနဲ့ ယူကရိန်းစစ်ပွဲအကြောင်းတွေကို ဆွေးနွေးဖို့ရှိတယ်လို့ အရှေ့အာရှဆိုင်ရာ အမေရိကန်ထိပ်တန်းသံတမန်က ပြောပါတယ်။
“နိုင်ငံခြားရေးဝန်ကြီးအနေနဲ့ စစ်ကောင်စီိကို ဆက်လက်ဖိအားပေးရမယ်ဆိုတာကို ဒေသတွင်းက မိတ်ဖက်တွေကို ဆက်လက်အလေးထားဆွေးနွေးမှာပါ” လို့ အမေရိကန်ထိပ်တန်းသံတမန်က ဆိုပါတယ်။
ဒါပေမဲ့ အကြမ်းဖက်မှုလျှော့ချဖို့၊ နိုင်ငံရေးအကျဥ်းသားတွေ ပြန်လွှတ်ပေးဖို့နဲ့ ဒီမိုကရက်တစ်အတိုက်အခံတွေနဲ့ထိတွေ့ဆက်ဆံဖို့ စစ်ကောင်စီကို ဖိအားပေးတဲ့ ကြိုးပမ်းမှုတွေဟာ တိုးတက်မှုမရှိဘူးလို့ သူက ဆက်ပြောပါတယ်။
ကိုးကား – ရိုက်တာ
