ရဲခေါင်/People’s Spring
ရန်ကုန်မြို့၊ ဒဂုံဆိပ်ကမ်းမြို့နယ်တွင် အမျိုးသမီးတစ်ဦးအား သူခိုးဟုစွပ်စွဲပြီး ဘုန်းကြီးနှင့်ရပ်ကွက်အုပ်ချုပ်ရေးမှူးက ငါးရက်ကြာချုပ်နှောင်နှိပ်စက်မှု ဖြစ်ပွားခဲ့ကြောင်း သတင်းရရှိသည်။
ဒဂုံမြို့သစ်တောင်ပိုင်းတွင်နေထိုင်သည့် ဒေါ်သန်းသန်းအား သူခိုးဟုစွပ်စွဲပြီး ဒဂုံဆိပ်ကမ်းမြို့နယ်ရှိ ရာဇဂြိုဟ်ပရိယတ္တိစာသင်တိုက်တွင် နှစ်ရက်၊ အမှတ်(၆၁)ရပ်ကွက်အုပ်ချုပ်ရေးမှူးရုံးတွင် သုံးရက်ချုပ်နှောင်ဖမ်းဆီးပြီး ရိုက်နှက်ခဲ့သည်ဟု ဆိုသည်။
Public Service Announcement
ထိုကဲ့သို့ပြုလုပ်မှုကြောင့် ကာယကံရှင်အမျိုးသမီးသည် ဒဏ်ရာများရရှိပြီး ဒဂုံဆိပ်ကမ်းမြို့နယ်ရဲစခန်းသို့ အောက်တိုဘာ ၁၄ရက်တွင် သွားရောက်တိုင်တန်းခဲ့ကြောင်း မှုခင်းမှတ်တမ်းတွင် ရေးသားထားသည်။
စစ်ကောင်စီ၏ ရဲစစ်ချက်အရ ဒဂုံမြို့သစ်တောင်ပိုင်းမြို့နယ်၊(၆၆) ရပ်ကွက်၊ အင်းဝအိမ်ယာနေ ဒေါ်သန်းသန်းအား လွန်ခဲ့သော ခုနစ်လက ဒဂုံဆိပ်ကမ်းမြို့နယ်ရှိ ရာဇဂြိုဟ်ပရိယတ္တိစာသင်တိုက်တွင် အတူနေခဲ့ဘူးသူ ဒေါ်စန်းစန်းခိုင်က အောက်တိုဘာ ၉ရက်တွင် ဖုန်းဆက်ပြီး ကျောင်းတွင် ပြသနာတက်နေသဖြင့် လာရောက်ရန်ခေါ်ခဲ့သည်။
ဘုန်းကြီးကျောင်းရောက်ချိန်တွင် တိုက်အုပ်ဘုန်းကြီးဦးသူရဓမ္မက ခိုးယူသွာသော ရှေးဟောင်းပစ္စည်းများပြန်ပေးရန်နှင့် မပေးကသတ်ပစ်မည်ဆိုကာ ဆွမ်းစားဆောင်အောက်တွင် (၂)ရက်ချုပ်နှောင်ထားပြီး အမည်မသိအမျိုးသမီးသုံးဦးက စောင့်ကြပ်ကြောင်း ဒေါ်သန်းသန်းက ပြောသည်။
အောက်တိုဘာ ၁၁ရက်တွင် ဘုန်းကြီးဦးသူရဓမ္မ၊ ဦးသာလှထွန်းဆိုသူ နှင့်အမည်မသိအမျိုးသမီးနှစ်ဦးက ဒေါ်သန်းသန်းအား အမှတ်(၆၁)ရပ်ကွက်အုပ်ချုပ်ရေးမှူးရုံးသို့ ခေါ်ပြီးဘုန်းကြီးကျောင်းမှ ပစ္စည်းများအား ဒေါ်သန်းသန်းက ခိုးယူကြောင်းပြောပြီးထားခဲ့ကြောင်း သိရသည်။
ထို့နောက် အမှတ်(၆၁)ရပ်ကွက်အုပ်ချုပ်ရေးမှူးဦးတင်မောင်ဆွေက ဆဲဆိုကာ ရုံးရှိ အခန်းတစ်ခုတွင် သုံးရက်ပိတ်လှောင်ထားကြောင်း၊ ထိုသို့ ပိတ်လှောင်ထားစဥ် ရပ်ကွက်အုပ် ချုပ်ရေးမှူးနှင့် အမည်မသိအမျိုးသားနှစ်ဦးက ကော်ရေပိုက်ဖြင့်ဝိုင်းဝန်းရိုက်နှက်သဖြင့် ဒဏ်ရာများရခဲ့ကြောင်း ဒေါ်သန်းသန်းက ထွက်ဆိုထားသည်။
ထို့ကြောင့် ပစ္စည်းခိုးသည်ဟုစွပ်စွဲကာဆဲဆိုခြိမ်းခြောက်ခြင်း၊ရိုက်နှက်ခြင်း၊ ငါးရက်ကြာ မတရားချုပ်နှောင်ထားခြင်းများအတွက် ဘုန်းကြီးဦးသူရဓမ္မ၊ ရပ်ကွက်အုပ်ချုပ်ရေးမှူးဦးတင်မောင်ဆွေ၊ ဦးသာလှထွန်းနှင့် အမည်မသိအမျိုးသမီးသုံးဦး၊ အမည်မသိအမျိုးသားနှစ်ဦးတို့ကိုအရေးယူပေးရန် ဒဂုံဆိပ်ကမ်းမြို့နယ်ရဲစခန်း၌ ဒေါ်သန်းသန်းက တိုင်တန်းထားကြောင်း သိရသည်။
“အမှုတွေတော့ ဖွင့်ထားပြီးပြီ။ ဖမ်းမမိသေးဘူး”ဟု ဒဂုံဆိပ်ကမ်းမြို့နယ်ရဲစခန်းမှ တာဝန်ကျရဲက လူထုနွေဦးသို့ ပြောသည်။
စစ်တပ်အာဏာသိမ်းပြီးနောက်ပိုင်း ရန်ကုန်မြို့အပါအဝင် အခြားမြို့နယ်များ၌ ရပ်ကွက်အုပ်ချုပ်ရေးမှူး ဆိုသူများနှင့် ၎င်း၏နောက်လိုက်များသည် ပြည်သူများအပေါ် အကြောင်းမဲ့ ဖမ်းဆီးနှိပ်စက်၊သတ်ဖြတ်မှုများ ကျူးလွန်နေသည်။
ထို့ကြောင့် စစ်ကောင်စီဘက်တော်သားများဖြစ်သော ရပ်ကွက်အုပ်ချုပ်ရေးမှူးများကို မြို့ပြပြောက်ကျားအဖွဲ့များက ပစ်ခတ်ရှင်းလင်း သတိပေးမှုများရှိနေသည်။
