လူအေး/People’s Spring
ဒီပဲယင်းမြို့တွင်ယမန်နေ့(အောက်တိုဘာလ ၁၇ ရက်) နံနက်ပိုင်းကဖြစ်ပွားသောတိုက်ပွဲ၌ စစ်ကောင်စီဘက်မှ မိုင်းစစ်ဆင်ရေးအဓိကတာဝန်ရှိသူကို ကာကွယ်ရေးတပ်ဖွဲ့များကဖမ်းမိထားပြီး တစ်ဦးသေဆုံးခဲ့သည်။
စစ်ကောင်စီတပ်ဖွဲ့က တပ်စွဲထားသည့်နေရာများမှ ပြင်ပသို့ထွက်ခွာလာစဉ် ပြည်သူ့ကာကွယ်ရေးပူးပေါင်းတပ်ဖွဲ့များက တိုက်ခိုက်ခဲ့ရာ တိုက်ပွဲအပြင်းအထန်ဖြစ်ပွားခဲ့ခြင်းဖြစ်သည်ဟု ကာကွယ်ရေးရဲဘော်တစ်ဦးကပြောသည်။
Public Service Announcement
“စစ်ကြောင်းထွက်တာလား။ ပစ္စည်းတွေထွက်ရှာတာလားတော့မသိဘူး။တိုက်ပွဲဖြစ်တော့ ဒဏ်ရာတွေနဲ့ထွက်ပြေးတဲ့သူ သေတယ်။ မိထားတဲ့လူကတော့ မိုင်းစစ်ဆင်ရေးမှာ အရေးပါတဲ့သူတစ်ယောက်ပါ”ဟုပြည်သူ့ကာကွယ်ရေးရဲဘော်တစ်ဦးကပြောသည်။
အင်အား ၂၀ ခန့်ပါဝင်သော ထိုစစ်ကြောင်းသည် ပြန်လည်ဆုတ်ခွာထွက်ပြေးသွားခဲ့သည်။တိုက်ပွဲဖြစ်ပွားပြီးနောက် ညဘက်တွင် စစ်ကောင်စီက လေကြောင်းမှနှစ်ကြိမ် ဗုံးကြဲတိုက်ခိုက်သွားခဲ့သည်။ သို့သော် အရပ်သားနှင့်ပြည်သူ့ကာကွယ်ရေးရဲဘော်များ ထိခိုက်မှုမရှိခဲ့ပေ။
ဒီပဲယင်းမြို့ကို ပြီးခဲ့သည့် ဩဂုတ်လ ၁၈ ရက်နေ့တွင် ရွှေဘိုခရိုင်အမှတ် (၁) ကွပ်ကဲရေးရုံးကွပ်ကဲမှုဖြင့် ပြည်သူ့ကာကွယ်ရေးပူး ပေါင်းတပ်များက တိုက်ခိုက်သိမ်းပိုက်ခဲ့သော်လည်း စစ်ကောင်စီက လေကြောင်းမှ တိုက်ခိုက်ပြီးပြန်လည်ထိန်းချုပ်ခဲ့သည်။ တိုက်ပွဲတွင် စစ်ကောင်စီဘက်မှ ၁၈ဦး သေဆုံးပြီး ၁၀ဦး ဒဏ်ရာရကာ Non-CDM ဝန်ထမ်း ၄၀ ဦး၊ အချုပ်သား ၂၀ ဦး၊ ပြည်သူ ၇၂ ဦးအားကယ်တင်နိုင်ခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊အမှတ်(၁) စစ်ဒေသက ဩဂုတ်လ ၂၀ရက်၌ သတင်းထုတ်ပြန်သည်။
မြို့အားပြန်လည်ထိန်းချုပ်ပြီးနောက် စစ်ကောင်စီက လေကြောင်းတိုက်ခိုက်မှုများမကြာခဏပြုလုပ်နေသည်။ မြေပြင်စစ်ကြောင်းသည် ဒီပဲယင်းမြို့မရဲစခန်း၊ စာသင်ကျောင်းနှင့် ဇွဲစားသောက်ဆိုင်အဆောက်အအုံ၌ တပ်စွဲထားသည်။
