ကန်ပိုက်တီဘက်စစ်ရေး ထူးခြားမှုမရှိသေး၊ KIOအနေဖြင့် အထူးဂရုစိုက်နေဟုပြော
ကချင် အထူးဒေသ (၁)တွင် ကန်ပိုက်တီ နှင့် ဖီမော်မြို့တို့သာ သိမ်းရန်ကျန်ရှိ
ထားမြတ်/People’s Spring
ကချင်ပြည်နယ် ချီဖွေမြို့နယ် တရုတ် – မြန်မာ နယ်စပ် စစ်ကောင်စီလက်အောက်ခံ နယ်ခြားစောင့်တပ်ဖွဲ့(၁၀၀၁) တပ်ရင်းဌာနချုပ်နှင့် ချီဖွေမြို့နယ် ပြည်သူ့စစ်စခန်းအား သိမ်းနိုင်ခဲ့ကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုသည်။
” BGF အမှတ် (၁၀၀၁)တပ်ရင်းဌာနချုပ်ကို ဒီမနက်ပိုင်းသိမ်းရပြီးမှ လဂွေ ပြည်သူ့စစ်တပ်စခန်းကိုတော့ ဒီညနေ ၁နာရီခွဲ အချိန်လောက်မှာ အပြီးအစီးသိမ်းနိုင်တယ်ဆိုတဲ့ အတည်ပြုချက် အခုမှ ရပါတယ်”ဟု ဗိုလ်မှူးကြီးနော်ဘူက ပြောသည်။
စစ်ရေးသတင်းမြစ်အချို့က BGF (၁၀၀၁) တပ်ရင်းကို အောက်တိုဘာ ၃၁ရက် ညနေကတည်းက သိမ်းထားနိုင်ခဲ့ကြောင်း ပြောထားသည်။
Public Service Announcement
စခန်းသိမ်းပိုက်နိုင်ပြီးဖြစ်သော်လည်း ထိခိုက်ကျဆုံးနှင့် လက်နက်ခဲယမ်းသိမ်းရမှု အခြေအနေများ မသိရသေးဟု ဗိုလ်မှူးကြီးနော်ဘူက ပြောသည်။
“မြေပြင်အခြေအနေလို့ ပြောရမှာပေါ့။ သိမ်းဆည်းရမိတဲ့လက်နက်ခဲယမ်း နောက် ဒဏ်ရာရတဲ့ သေဆုံးတဲ့ ဒေတာပိုင်းတော့ ဘာမှ မရဘူး”ဟု ၎င်းက ဆိုသည်။
KIAအနေဖြင့် အောက်တိုဘာအတွင်းက ပန်ဝါဒေသ လုပီရွာအခြေစိုက် BGF (၁၀၀၂)တပ်ရင်းဌာနချုပ်နှင့် ကန်ပိုက်တီဒေသ စင်ကြိုင်ကျေးရွာ အခြေစိုက် (၁၀၀၃)တပ်ရင်းဌာနချုပ်ကို သိမ်းပိုက်ထားသည်။
KIAသည် စက်တင်ဘာလကုန်ပိုင်းမှစ၍ စစ်ကောင်စီ လက်အောက်ခံ ဦးဇခုန်တိန့်ယိန်း ဦးဆောင်သည့် ကချင်အထူးဒေသ(၁)နယ်မြေကို ထိုးစစ်ဆင်ခဲ့ရာ ချီဖွေ၊ ဆော့လော်၊ ပန်ဝါမြို့များကို သိမ်းပိုက်ထားပြီးဖြစ်သည်။ မြန်မာ -တရုတ်နယ်စပ်မြို့များဖြစ်သည့် ကန်ပိုက်တီနှင့် ဖီမော မြို့တို့သာ ကျန်နေသည်။
“ကန်ပိုက်တီဘက်မှာတော့ သတင်းထူးတွေမရှိပါဘူး။ တရားဝင်နယ်စပ်ဂိတ်လည်းဖြစ်ပါတယ်။ ကျနော်တို့ KIOအနေနဲ့လည်း အဲဒီ နယ်စပ်ဂိတ်ကို ထူးပြီးမှ ဂရုစိုက်နေပါတယ်။ စစ်ရေး အခြေအနေက ခုထက်ထိတော့ ဘာမှ ထူးခြားမှုမရှိဘူး။ဖီမောဘက်မှာတော့ အများကြီး လိုပါသေးတယ် ဖီမောဘက်မှာတော့ တိုက်ပွဲတောင် မရှိသေးပါဘူး”ဟု ဗိုလ်မှူးကြီးနော်ဘူက ပြောသည်။
KIAအနေဖြင့် ချီဖွေ၊ ဆော့လော်မြို့နယ်အတွင်း ထိုးစစ်ကို ယခုနှစ် စက်တင်ဘာလကုန်ပိုင်း၌ စတင်ခဲ့ရာ တစ်လခန့်အတွင်း စစ်ကောင်စီတပ် စခန်းများစွာနှင့် မြို့ ၃မြို့ကို သိမ်းပိုက်ရရှိထားသည်။
