ငါန်းဇွန်တွင် စစ်ကောင်စီယာဥ်တန်း ကြားဖြတ်တိုက်ခိုက်ခံရ၊ ထိခိုက်မှုရှိဟုဆို

ဇေအောင်/People’s Spring

မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ်တွင် စစ်ကောင်စီယာဥ်တန်း ကြားဖြတ်တိုက်ခိုက်ရာ ထိခိုက်သေဆုံးမှုရှိကြောင်းမြင်းခြံခရိုင် တပ်ရင်း ( ၇ ) တပ်ခွဲ(၅)၊ HERO DEFENCE FORCE အဖွဲ့၏တာဝန်ခံ စစ်သူကြီးက ပြောသည်။

နိုဝင်ဘာ ၈ ရက် နေ့လယ် ၁ နာရီ ၁၅မိနစ်ခန့်က ငါန်းဇွန်မြို့နယ်၊ မြို့သာမြို့မှ ဆီမီးခုံဆိပ်ကမ်းသို့ ထွက်ခွာလာသော အင်အား ၉၀ခန့်ပါစစ်ကောင်စီ ၏ စစ်ကား ၄ စီးကို မြို့သာ-ဆီမီးခုံလမ်းပိုင်းပေါ်တွင် ကြားဖြတ်တိုက်ခိုက်ခဲ့ရာ ထိခိုက် သေဆုံးမှုများကြောင်း ကာကွယ်ရေးအဖွဲ့များက ပြောသည်။

” ကြားဖြတ်ခြုံခိုတိုက်ခိုက်တာ။ လက်နက်ငယ် တွေနဲ့။ စစ်ကောင်စီတပ်သား ၁၇ဦးသေဆုံးတယ်။ အများအပြားလည်း ဒဏ်ရာရတယ်။ သေဆုံးဒဏ်ရာရတွေကို လူနာတင်ကား သုံးစီးနဲ့လာခေါ်သွားတယ်။”ဟု HERO DEFENCE FORCEအဖွဲ့၏တာဝန်ခံ စစ်သူကြီးက ပြောသည်။

Public Service Announcement

သို့သော် စစ်ကောင်စီတပ်၏ ထိခိုက်သေဆုံးမှုများကိုမူ သီးခြားအတည်ပြုနိုင်ခြင်း မရှိသေးပေ။

“၄၀ မမ မှန်လို့ အရာရှိတစ်ယောက်ခြေထောက် ဖြတ် ရပါမယ်တဲ့။ ကျန်ထိခိုက်တွေလည်းများတယ်။”ဟု Zero ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောသည်။

စစ်ကောင်စီတပ်သည် တိုက်ခိုက်ခံရပြီးနောက် ညပိုင်းအထိ အခင်းဖြစ်ရာအနီး တောနင်းရှာဖွေခဲ့ကြောင်း သိရသည်။

အဆိုပါ စစ်ဆင်ရေးကို မြင်းခြံခရိုင်တပ်ရင်း (၇)တပ်ခွဲ(၅) HERO DEFENCE FORCE၊ မြင်းခြံခရိုင် တပ်ရင်း(၇)၊ တပ်ခွဲ(၂) Zero၊မြင်းခြံခရိုင်တပ်ရင်း (၆)နှင့် ဒေါင်းဘုရင်အဖွဲ့တို့ပူးပေါင်း တိုက်ခိုက်ခဲ့ခြင်းဖြစ်သည်။

အောက်တိုဘာ ၂၉ရက်ကလည်း ဆီမီးခုံမြို့ပေါ် တွင် ဈေးဝယ်ထွက်လာသည့် စစ်သားများ မိုင်းဆွဲတိုက်ခိုက်ခံရပြီး ထိခိုက်မှုများ ရှိခဲ့သည်။

ပြီးခဲ့သည့် ဩဂုတ် ၇ ရက်ကလည်း ဆီမီးခုံမြို့ပေါ်ရှိ စစ်ကောင်စီစစ်ဆေးရေးဂိတ်ကို ကာကွယ်ရေးအဖွဲ့များက ဝင်ရောက်ပစ်ခတ် တိုက်ခိုက်ခဲ့ရာ စစ်သား သုံးဦးသေဆုံးခဲ့သည်။