ထားမြတ်/People’s Spring
ကချင်လွတ်လပ်ရေးတပ်မတော်(KIA) သိမ်းပိုက်ထားပြီးဖြစ်သည့် ကချင်ပြည်နယ် ဝိုင်းမော်မြို့နယ်ရှိ ဆဒုံးမြို့ကို စစ်ကောင်စီက ယနေ့ (နိုဝင်ဘာ ၂၂ရက်) လေကြောင်းမှ ဗုံးကြဲတိုက်ခိုက်ခဲ့ကြောင်း ဒေသ သတင်းရင်းမြစ်က ပြောသည်။
ပင်လယ်ရေမျက်နှာပြင်အထက် အမြင့်ပေ ၄,၀၀၀ ကျော်တွင်တည်ရှိသော ဆဒုံးမြို့ကို ယနေ့နံနက်အစောပိုင်းတွင် လေကြောင်းတိုက်ခိုက်ခဲ့ရာမြို့အုပ်ချုပ်ရေးမှူးရုံး ပျက်စီးမှု ရှိခဲ့သည်ဟု ဆိုသည်။
“တယောက်က နည်းနည်းထိတယ်လို့ ပြောတယ်”ဟု ဒေသ သတင်းရင်းမြစ်က လေကြောင်း တိုက်ခိုက်ခံရမှုတွင် လူထိခိုက်မှု အခြေအနေနှင့်ပတ်သက်ပြီး ပြောသည်။
Public Service Announcement
မြို့အုပ်ချုပ်ရေးမှူးရုံး လေကြောင်းတိုက်ခိုက်ခံရ၍ ထိခိုက်ပျက်စီးမှု ရုပ်သံမှတ်တမ်းကိုလည်း သတင်းရင်းမြစ်အချို့က လူမှုကွန်ရက်၌ ဖော်ပြရာ အဆောက်အဦးနှင့် မော်တော်ယာဉ် အချို့ ထိခိုက်ပျက်စီးခဲ့သည်ကို တွေ့ရသည်။ KIAသည် ဆဒုံးမြို့ကို ယခုနှစ် ဇွန်လကတည်းက တိုက်ခိုက်သိမ်းပိုက်ထားခြင်းဖြစ်သည်။
စစ်ကောင်စီသည် ပြီးခဲ့သည့် အောက်တိုဘာ ၂၁ရက်ညကလည်း ဆဒုံးမြို့ကို လေကြောင်းမှ ဗုံးကြဲတိုက်ခိုက်ခဲ့သေးသည်။
စစ်ကောင်စီသည် စစ်ရေးအရ ရှုံးနိမ့်ထားသည့်နယ်မြေများကို တိုက်ပွဲမရှိဘဲ လေကြောင်းမှ တိုက်ခိုက်မှုများလုပ်ဆောင်နေသည်။ KIA သိမ်းပိုက်ထားသည့် မိုးမောက်မြို့နယ် ကုန်းလောရွာ ကချင်နှစ်ခြင်းခရစ်ယာန်ဘုရားကျောင်းကို နိုဝင်ဘာ ၁၅ရက်တွင် လေကြောင်း တိုက်ခိုက်ခဲ့ရာ ကလေးငယ် ၇ဦး အပါအဝင် ပြည်သူ ၉ဦး သေဆုံးခဲ့ပြီး အများအပြား ဒဏ်ရာရရှိခဲ့သည်။
အလားတူ တအာင်းတပ်မတော်(TNLA) သိမ်းပိုက်ထားသည့် နောင်ချို၊မိုးကုတ်၊ မိုင်းငေါ့၊ ကွတ်ခိုင်မြို့များကိုလည်း စစ်ကောင်စီက ပြီးခဲ့သည့် ရက်များအတွင်း လေကြောင်းမှ အကြိမ်ကြိမ်တိုက်ခိုက်ခဲ့ရာ ပြည်သူ ၂၆ ဦးထက်မနည်းသေဆုံးကာ ၅၀ကျော် ဒဏ်ရာရရှိခဲ့သည်။
