အင်ကြင်း/People’s Spring
နိုဝင်ဘာ ၂၁ ရက် နေ့လည် ၁၂ နာရီခွဲခန့်က ဆီမီးခုံမြို့ရဲစခန်းနှင့် မီတာ ၂၀၀ခန့်ကွာဝေးသော ရွှေစည်းခုံဘုရားအရှေ့ရှိ အရပ်ဆိုင်အတွင်း အရပ်ဝတ်ဖြင့် အရက်သောက်နေသော ဆီမီးခုံရဲစခန်းမှ နယ်ထိန်းတစ်ဦး၊ တပ်ကြပ်တစ်ဦးအပါအဝင် ရဲ ၃ဦးအား ဝင်ရောက်ပစ်ခတ်ရာ ၂ဦး ပွဲချင်းပြီး သေဆုံးပြီး တစ်ဦးလွတ်မြောက်သွားကြောင်း ပစ်ခတ်မှုတွင်ပါဝင်သော MP-9အဖွဲ့၏ တာဝန်ခံက ပြောသည်။
“လက်ဖက်ရည်ဆိုင်နဲ့အရက်ဆိုင် နှစ်ခုတွဲထားတာ။ ရဲတွေက အရက်သောက်နေကြတာ။ နှစ်ကောင်သေတယ်။တစ်ကောင်ကတော့ လက်ထိပြီးပြေးတာ။ အိမ်တစ်အိမ်ရဲ့နောက်ကိုပြေးတော့လွတ်သွားတယ်။”ဟု MP-9အဖွဲ့၏ တာဝန်ခံက ပြောသည်။
အဆိုပါ ရဲများထံမှ G3 ၃လက်အား တော်လှန်ရေးအဖွဲ့များက သိမ်းဆည်းနိုင်ခဲ့သည်။ ရဲများပစ်ခတ်ခံရပြီးနောက် စစ်အုပ်စုက မြို့ပေါ်နေပြည်သူများအား ဖမ်းဆီးရိုက်နှက်မှုများ ပြုလုပ်ခဲ့ပြီး ပျူစောထီးအားကောင်းသော ဆုံရွာဘက်မှ အင်အားများထပ်တိုးလာခဲ့ကြောင်း ဒေသခံအချို့က ပြောသည်။
Public Service Announcement
ယင်းစစ်ဆင်ရေးကို မိုင်းဇာနည်ပြောက်ကျားတပ်ဖွဲ့၊ MP-9အဖွဲ့၊ တလုပ်-PDF နှင့် ရွှေဂျိုးဖြူ-ပြည်သူ့ကာကွယ်ရေးတပ်ဖွဲ့(မြင်းခြံ) အဖွဲ့များ ပူးပေါင်းတိုက်ခိုက်ခဲ့ကြောင်း သိရသည်။
ပြီးခဲ့သည့် ဇူလိုင် ၁၈ ရက်ကလည်း ဆီမီးခုံရဲစခန်းအနီးကွမ်းဝယ်နေသည့် စစ်သားတစ်ဦးအား တော်လှန်ရေးရဲဘော်များက ဝင်ရောက်နပန်းလုံးပြီး သေနတ်လုယူခဲ့သေးသည်။
ယခုနှစ် ဇန်နဝါရီ ၂၂ ရက်ကလည်း မြင်းခြံ – ဆီမီးခုံကားလမ်းပေါ်တွင် မြင်းခြံဆမြို့မှ ဆီမီးခုံရဲစခန်း ပြန်လာသည့် ရဲ ငါးဦးအပါအဝင် ၆ ဦး ပစ်သတ်ခံရပြီး လက်နက်ခဲယမ်းများပါ တော်လှန်ရေးအဖွဲ့များ ရရှိခဲ့သည်။
