မုံရွာမြို့တွင် စစ်ကောင်စီက မီတာပုံးများလိုက်ဖြုတ်၍ ဝါယာရှော့ဖြစ်ပြီး မီးလောင်

ဇေအောင်/People’s Spring

စစ်ကိုင်းတိုင်း၊ မုံရွာမြို့တွင် လျှပ်စစ်မီတာပုံးလိုက်လံဖြုတ်သိမ်းနေသော စစ်ကောင်စီအဖွဲ့က မီးကြိုးများ စနစ်တကျသိမ်းမသွား၍ ဝါယာရှော့ဖြစ်ပြီး မီးလောင်မှုဖြစ်ပွားခဲ့ကြောင်း ဒေသခံများက ပြောသည်။

နိုဝင်ဘာ ၂၈ရက်က မုံရွာမြို့ပေါ်ရှိ နေအိမ်များအား မီတာမဆောင်၍ဆိုကာ စစ်ကောင်စီက မီတာပုံးများ လိုက်လံဖြုတ်သိမ်းခဲ့သည်။ ထိုသို့လိုက်လံဖြုတ်သိမ်းစဥ် ဗိုလ်ချုပ်လမ်းရှိ နေအိမ်တစ်လုံးမှ မီတာဖြုတ်စဥ် မီးကြိုးများအား သိမ်းဆည်းမထားဘဲ ချထားခဲ့၍ ညပိုင်းတွင် မီးလာစဥ် ဝါယာရှော့ဖြစ်ကာ မီးလောင်ကျွမ်းခဲ့ကြောင်း ဒေသခံများက ပြောသည်။

“မီတာရုံးကနေ ကြိုးဖြုတ်သွားတာ။ ကြိုးစကို ဒီတိုင်းထားခဲ့တော့ ညနေ မီးလာတဲ့အချိန် ရှော့ဖြစ်ပြီးမီးလောင်တာ။”ဟု မုံရွာကင်းထောက်များအဖွဲ့က ပြောသည်။

Public Service Announcement

မီးလောင်မှုကို ရပ်ကွက်ဒေသခံများက ဝိုင်းဝန်းမီးငြှိမ်းသတ်ပေးခဲ့ကြောင်း၊ မီးသတ်ကားများမှာမီးငြိမ်းမှရောက်ရှိလာခဲ့ကြောင်း ဒေသခံများက ပြောသည်။

မုံရွာမြို့တွင် စစ်ကောင်စီက မီတာမဆောင်၍ဆိုကာ နေအိမ်များအပါအဝင် မီးသတ်ရုံး၊ ရပ်ကွက်ရုံးတို့ရှိ မီတာပုံးများပါ လိုက်လံဖြုတ်သိမ်းနေသည်။

စစ်တပ်အာဏာသိမ်းပြီးနောက် စစ်ကောင်စီအား ဘဏ္ဍာငွေဖြတ်တောက်သည့်လှုပ်ရှားမှုအဖြစ် လျှပ်စစ်မီတာခများ မပေးဆောင်ရန် လှုပ်ရှားမှုပြုလုပ်ခဲ့ရာ မုံရွာမြို့နေပြည်သူများမှာ လေးနှစ်နီးပါး မီတာခပေးဆောင်ခြင်းမရှိဘဲ ပါဝင်ခဲ့ကြကြောင်း သိရသည်။

စစ်ကောင်စီက မီတာခများ အတင်းအကြပ် ကောက်ခံနေသော်လည်း လျှပ်စစ်မီးရရှိမှုမှာ မုံရွာမြို့တွင် တစ်ရက် ၃ နာရီခန့်သာ ရရှိကြောင်း မြို့ခံများက ပြောသည်။

၂၀၂၂ ဇွန်လအတွင်းက မုံရွာမြို့တွင် လျှပ်စစ်မီတာပုံးများလိုက်လံဖြုတ်သိမ်းသည့် မုံရွာမြို့နယ်လျှပ်စစ်မန်​နေဂျာရုံးမှ လက်ထောက်ကြီးကြပ်ရေးမှူးဦးနိုင်ဆန်းလင်းနှင့်ဒုလက်ထောက်ကြီးကြပ်ရေးမှူးဦးနေဝင်းထွန်းတို့ သေနတ်ဖြင့်ပစ်ခံရပြီး တစ်ဦးကျည်ထိမှန်ဒဏ်ရာရခဲ့သေးသည်။