အိမ်သွင်/People’s Spring
စစ်အာဏာရှင်အား တော်လှန်တိုက်ပွဲဝင်ရင်းကျန်းမာရေးဆိုးရွားမှုကြောင့် ရှေ့တန်းတနေရာ၌ ကွယ်လွန်ခဲ့သည့် ရဝမ်တိုင်းရင်းသားရေးရာဝန်ကြီး ဦးချန်းဂျော်ရမ်၏ ဈာပနကို KIA ထိန်းချုပ်ဒေသ လိုင်ဇာမြို့တွင် နိုဝင်ဘာ ၃၀ ရက်နေ့ကပြုလုပ်ခဲ့သည်။
အသက် ၅၁ နှစ်အရွယ် ဦးချန်းဂျော်ရမ်သည် KIAနှင့် ပူးတွဲတိုက်ပွဲများဖော်ဆောင်နေသည့် ခါကာဘိုပြည်သူ့ကာကွယ်ရေးတပ်ဖွဲ့(KPF)၏ တာဝန်ရှိသူတစ်ဦးလည်းဖြစ်သည်။
ကချင်ပြည်နယ် ချီဖွေမြို့နယ် ဖီမော်ကျေးရွာတွင် နို၀င်ဘာလ၂၇ရက်ည ၁၀နာရီ ၂၀ မိနစ်အချိန်ခန့်တွင် ကျန်းမာရေးဆိုးရွားပြီး ကွယ်လွန်ခဲ့သည်။
Public Service Announcement
၂၀၂၀ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီ ကိုယ်စားပြုအနိုင်ရခဲ့ပြီး စစ်တပ်က နိုင်ငံတော် အာဏာကို သိမ်းယူပြီးနောက် ဦးချန်းဂျော်ရမ်က လူထုတော်လှန်ရေးတွင် ခြေစုံပစ်ဝင်ခဲ့သည်။
ဦးချန်းဂျော်ရမ်သည် စစ်အာဏာရှင်တော်လှန်ရေးတွင် တက်ကြွစွာ ပါဝင်ကြိုးပမ်းခဲ့သူဖြစ်ပြီး စစ်အာဏာရှင်ဖြုတ်ချပြီး အုပ်ချုပ်ရေးအာဏာအား ပြည်သူများထံအပ်နှံသွားမည်ဟုပြောကြားဖူးသည်။ဦးချန်းဂျော်ရမ်သည် ပြုပြင်ပြောင်းလဲရေး အတွေးအခေါ် ရှိပြီးရပ်တည်ချက်ခိုင်မာပြတ်သားသူဖြစ်ကြောင်း ၎င်း၏ မိတ်ဆွေတစ်ဦးက ပြောသည်။
KIA ဦးဆောင်သော မဟာမိတ်တပ်ဖွဲ့များသည် ကချင်အထူးဒေသ (၁) ကို.စက်တင်ဘာ လကုန်ပိုင်းတွင် စတင် ထိုးစစ်ဆင်တိုက်ခိုက် ချီဖွေ ၊ ဆော့လော် ၊ ပန်ဝါ ၊ဖီမော် ၊ကံပိုက်တီး စသောမြို့များမှ စစ်တပ်စခန်းများ ၊စစ်တပ်လက်အောက်ခံ ပြည်သူ့စစ်စခန်းများ ၊ နယ်ခြားစောင့်စခန်းများကို သိမ်းပိုက်ခဲ့သည်။ဒေသတစ်ခုလုံးကို သိမ်းပိုက်ပြီးနောက် နိုဝင်ဘာ ၂၈ ရက်မှစ၍ ကချင်အထူးဒေသ (၁) ဆိုသောသတ်မှတ်ချက်မရှိတော့ကြောင်း ကချင်လွတ်လပ်ရေးအဖွဲ့အစည်း (KIO) ကကြေညာခဲ့သည်။
