ဟန်နွေ/People’s Spring
နိုင်ငံတဝန်း၌ ယခုနှစ်အတွင်း စစ်ကောင်စီတပ် ဆုတ်ခွာသွားသည့် စခန်းကြီး၊ငယ် ၁၃၅ခုရှိကြောင်း စစ်ကိုင်းတိုင်းပြည်သူ့ကာကွယ်ရေးအဖွဲ့(ပကဖ)က သတင်းထုတ်ပြန်သည်။
၂၀၂၄ ဇန်နဝါရီမှ နိုဝင်ဘာ ၁၀ရက်အထိ နိုင်ငံတဝှမ်းလုံး စစ်ကောင်စီဘက်က ဆုတ်ခွာသွားသည့် တပ်စခန်းများအခြေအနေကို အသိပေး ဖော်ပြခဲ့ခြင်းဖြစ်သည်။
“ရန်သူဟာ ထိုးစစ်အခြေအနေကနေ ခံစစ် အခြေအနေကို ရောက်သွားရုံသာမက နယ်မြေလက်လွှတ်ရမှု များပြားလာတာကို စခန်းဆုတ်ခွာမှုစာရင်းက ပြပါတယ်။ အမျိုးသားညီညွတ်ရေးအစိုးရ၊ ပြည်သူ့ကာကွယ်ရေးတပ်မတော်၊ ပကဖနဲ့ တော်လှန်ရေးအဖွဲ့အသီးသီးက ညီညီညွတ်ညွတ်နဲ့ တိုက်ခိုက်နေမှုကြောင့် ယခုလို ကြီးမားတဲ့ စစ်ရေးအောင်ပွဲ ရရှိလာခြင်းဖြစ်ပါတယ်”ဟု စစ်ကိုင်းတိုင်းပြည်သူ့ကာကွယ်ရေးအဖွဲ့(ပကဖ)က ထုတ်ပြန်သည်။
Public Service Announcement
နိုင်ငံတဝှမ်း ရန်သူ့စစ်စခန်းဆုတ်ခွာမှု စာရင်းကိုလည်းဖော်ပြထားရာ ကချင်ပြည်နယ်တွင် (၂၉)ခု၊ကရင်ပြည်နယ် (၂၁)ခု၊ မကွေးတိုင်း (၁၆)ခု၊ ရခိုင်ပြည်နယ် (၁၃)ခု၊ စစ်ကိုင်းတိုင်း (၁၂)ခု၊ ရှမ်းပြည်နယ် (၁၁)ခု၊ မန္တလေးတိုင်း (၁၀)ခု၊ တနင်္သာရီတိုင်း (၇)ခု၊ ပဲခူးတိုင်း (၇)ခု၊ ကယားပြည်နယ် (၆)ခု၊ ချင်းပြည်နယ် နှစ်ခုနှင့် နေပြည်တော်တစ်ခုတို့ ဖြစ်သည်ဟု ဆိုသည်။
မြေပြင်တွင် လက်တွေ့ရန်သူ့စခန်းဆုတ်ခွာမှု စာရင်းသည် ယခုထက်ပိုများပြားနိုင်သည်ဟုလည်း အသိပေးသည်။
စစ်ကောင်စီက စခန်းစွန့်ဆုတ်ခွာသွားသည့် တပ်စခန်းများရှိသလို တော်လှန်ရေး အင်အားစုများက တိုက်ခိုက်သိမ်းပိုက်ခဲ့သည့် တပ်စခန်းများစွာလည်းရှိသည်။
” ရှေ့လာမယ့် ကာလတွေမှာ ရန်သူ့ဘက်က အင်အားမလုံလောက်မှု၊ စစ်ရှုံးမှု များပြားလာလေ စခန်းစွန့်ခွာထွက်ပြေးရမှု ပိုများလေ ဖြစ်လာမှာဖြစ်ပြီး တော်လှန်ရေး အင်အားစုတွေရဲ့ စိုးမိုးနယ်မြေ ပိုမိုကြီးမားကျယ်ပြန့်လာမှာဖြစ်ပါတယ်။ ပကဖ အဖွဲ့တွေအနေနဲ့လဲ ပြည်သူ့စစ်မဟာဗျူဟာကို စနစ်တကျ ကျင့်သုံးကာ ရန်သူကို လမ်းကြောင်းပိတ်ဆို့ခြင်း၊ နှောင့်ယှက်ခြင်း၊ ပြောက်ကျားပစ်ခတ်ခြင်း၊ ချေမှုန်းရေး တိုက်ပွဲ ဆင်နွဲခြင်းတွေကို ကျယ်ကျယ်ပြန့်ပြန့်လုပ်ဆောင်လာမှုကြောင့် ရန်သူ့စခန်း ဆုတ်ခွာရမှုတွေ ပိုမိုများပြားလာတာဖြစ်ပါတယ်”ဟု စစ်ကိုင်းတိုင်း ပကဖက ထုတ်ပြန်သည်။
နိုင်ငံအလယ်ပိုင်းဒေသ စစ်အခြေခံစခန်းများ၊ တပ်မ၊ တပ်ရင်းစခန်းများ၊လေတပ်စခန်းနှင့် လက်နက်စက်ရုံများ၏ ဆက်သွယ်ရေး လမ်းကြောင်း အသီးသီးကိုလည်း ပကဖအဖွဲ့များက ပုံမှန် တိုက်ခိုက် နေကြောင်း ဖော်ပြသည်။
” ရှေ့တန်းနယ်မြေလို့ ပြောလို့ရတဲ့ တောင်တန်းဒေသ နဲ့ အထက်အညာ ဒေသကို စစ်အုပ်စု ချီတက်သွားလာရေးကို ကြီးမားစွာနှောင့်ယှက် ဟန့်တားပေးနေပါတယ်”ဟု ဖော်ပြသည်။
ကရင်အမျိုးသားအစည်းအရုံး(KNU)နှင့် ပူးပေါင်းတပ်များသည် စစ်တပ်အာဏာသိမ်းပြီးနောက် စစ်ကောင်စီတပ်စခန်း ၁၃၈ခုကိုသိမ်းယူနိုင်ခဲ့ရာတပ်စခန်း ထက်ဝက်ကျော်ကို ၂၀၂၃ နှစ်လယ်မှ ၂၀၂၄ နှစ်လယ်အတွင်း သိမ်းနိုင်ခဲ့ခြင်းဖြစ်ပြီး ယင်းအထဲတွင်လည်း စစ်ကောင်စီက စွန့်ခွာသွားသည့် စခန်းများလည်းပါဝင်ကြောင်း ကရင်ငြိမ်းချမ်းရေးအထောက်အကူပြု ကွန်ယက်(KPSN)က အသိပေးထားသည်။
