ရှိန်း/People’s Spring
မန္တလေးတိုင်း၊ နွားထိုးကြီးမြို့နယ်ကို စစ်ကောင်စီက လေကြောင်းတိုက်ခိုက်မှုတွေဆက်တိုက်ပြုလုပ်နေပြီး ကွမ်းအုံကျေးရွာကို မနေ့ညက လေကြောင်းတိုက်ခိုက်ခဲ့ရာ အမျိုးသမီးနဲ့ ကလေးငယ်တစ်ဦးသေဆုံးခဲ့ပြီး ဒဏ်ရာရသူတွေရှိတယ်လို့ ဒေသခံတွေက ပြောပါတယ်။
ဒီဇင်ဘာ ၃ရက် မနေ့က ည၁၀နာရီမှာ ကွမ်းအုံကျေးရွာကို စစ်ကောင်စီက လေကြောင်းတိုက်ခိုက်မှုပြုလုပ်ခဲ့လို့ ကွမ်းအုံကျေးရွာက အသက်၆၆နှစ်အရွယ် ဒေါ်ခင်ပိုနဲ့ အသက်၁၁နှစ်အရွယ် မောင်မာန်ရှိုင်းခေတ်တို့ ထိမှန်သေဆုံးခဲ့တာလို့ သိရပါတယ်။ သေဆုံးသူတွေဟာ မြေးအဘွားနှစ်ယောက်ဖြစ်တယ်လို့ သိရပါတယ်။
” တရွာလုံးကို ပတ်ကျဲတာပါ။ကျေးရွာဆေးခန်းရော၊ရွာထဲကအိမ်တွေပေါ်ကိုရောကြဲတယ်။လေယာဥ် ငါးခေါက်လာကြဲတာ။ ကျွန်တော်ရေတွက်ထားသလောက်ဆိုရင် အလုံး၂၀ကျော်ကြဲချတယ်”လို့ နွားထိုးကြီးမြို့နယ် ပြည်သူ့အုပ်ချုပ်ရေးအဖွဲ့က လူ့အခွင့်အရေးတာဝန်ခံက ပြောပါတယ်။
Public Service Announcement
ဒဏ်ရာရသူ လေးဦးလည်းရှိပြီး ခြေချောင်းလေးချောင်းပြတ်သွားသူနဲ့ တံထောင်စစ်အောက်နေ လက်ပြတ်သွားသူတွေလည်းရှိတယ်လို့ ဆိုပါတယ်။
တိုက်ပွဲမရှိဘဲ ကျေးရွာပြည်သူကို ပစ်မှတ်ထားတိုက်ခိုက်တာဖြစ်တယ်လို့လည်း လူ့အခွင့်အရေးတာဝန်ခံက ဆက်ပြောပါတယ်။
ဒီကနေ့ နေ့လည် ၁နာရီလောက်ကလည်း အဲဒီရွာရဲ့မြောက်ဘက်မှာရှိတဲ့ လုံးတောကျေးရွာဘုန်းကြီးကျောင်းကို ထပ်မံ လေကြောင်းတိုက်ခိုက်သွားတယ်လို့ သိရပါတယ်။
“၅လုံးကြဲသွားတယ်။ ကြဲသွားတဲ့အသံတော့ ကြားလိုက်တယ်။အပြည့်အစုံကိုစုဆောင်းပြီးမ ကျွန်တော်တို့ပြန်ပြောပါမယ်”လို့ လူ့အခွင့်အရေးတာဝန်ခံက ပြောပါတယ်။
ဒါ့အပြင် ဒီဇင်ဘာ ၂ရက်နဲ့၃ရက်နေ့တွေမှာလည်း နွားထိုးကြီးမြို့နယ်၊ နဘဲမြစ်ကျေးရွာကို စစ်ကောင်စီက လေကြောင်းတိုက်ခိုက်ခဲ့တာမို့ ကိုရီးစာသင်နေတဲ့ကျောင်းသား၂ဦးနဲ့ အသက်၄၀ ဝန်းကျင် အမျိုးသား၂ဦးလည်း သေဆုံးခဲ့ပါသေးတယ်။
