အိမ်သွင်/People’s Spring
မကွေးတိုင်း၊ ငဖဲမြို့နယ်၊ အမ်း − ပဒါန်းလမ်းပိုင်း၌ စစ်ကောင်စီ၏ရိက္ခာယာဉ်တန်း စစ်ကားသုံးစီး တိုက်ခိုက်ခဲ့ရာ ကားနှစ်စီးပျက်စီးပြီး စစ်ကောင်စီတပ်သား ကိုးဦးထက်မနည်းသေဆုံးခဲ့ကြောင်း လူထုတော်လှန်ရေးမဟာမိတ်အင်အားစု (PRA – Magway)မှ စစ်ရေးတာဝန်ခံ နောင်သူရိန်က ပြောသည်။
စစ်ကောင်စီတပ် အင်အား ၅၀ခန့်ပါဝင်သော ရိက္ခာယာဥ်တန်းကို ဒီဇင်ဘာ ၄ရက် နေ့လယ် ၁နာရီခန့်တွင် တိုက်ခိုက်ခဲ့ခြင်းဟု PRA – Magwayက ပြောသည်။
စစ်ကားသုံးစီးတက်လာစဉ် မိုင်းခွဲတိုက်ခိုက်ရာ နှစ်စီးပျက်စီးပြီးနောက် ယနေ့အထိ ရှေ့ဆက်မတိုးနိုင်သေးကြောင်း စစ်ရေးတာဝန်ခံ နောင်သူရိန်က ပြောသည်။
Public Service Announcement
” ကျတော်တို့ စစ်ဆင်ရေးရည်ရွယ်ချက်က ဒီကားတွေ ရှေ့ဆက်မတက်နိုင်တဲ့ စစ်ရေးရည်မှန်းချက်ဖြစ်တဲ့အခါကျတော့ ကားရှေ့ဆက်မတက်နိုင်တဲ့ အခြေအနေမျိုးမှာ ပြန်ဆုတ်ခဲ့တယ်” ဟု နောင်သူရိန်က ပြောသည်။
ထို့အပြင် နိုဝင်ဘာ ၂၃ရက်ကလည်း ငဖဲမြို့နယ်၊ ဘုံးဘောကျေးရွာသို့ စစ်ကြောင်းထိုးလာသော အင်အား (၉ဝ)ပါ စစ်ကောင်စီတပ် စစ်ကြောင်းကို PRA-Magway၊ အရှိုချင်းကာကွယ်ရေးတပ် (ACDF)၊ မင်းဘူး ခရိုင်တပ်ရင်း (၂) တို့ပူးပေါင်း တိုက်ခိုက်စဥ် စစ်ကောင်စီတပ်မှ ၁၄ဦးခန့်သေဆုံးပြီး အများအပြားထိခိုက်ခဲ့သည်ဟု PRA-Magwayက ထုတ်ပြန်ထားသည်။
အာရက္ခတပ်တော် (AA)က တိုက်ခိုက်နေသည့် ရခိုင်ပြည်နယ် အမ်းမြို့ရှိ အနောက်ပိုင်းတိုင်စစ်ဌာနချုပ်(နပခ)မှ စစ်ရှုံး၍ထွက်ပြေးလာသော စစ်ကောင်စီတပ်ပြေးများအား ပိတ်ဆို့တိုက်ခိုက်နေသောကြောင့် ထိတွေ့တိုက်ပွဲများ ဖြစ်ပွားနေကြောင်း ထုတ်ပြန်ထားသည်။
နိုဝင်ဘာနှင့် ဒီဇင်ဘာ ပထမပတ်အတွင်း တိုက်ပွဲများတွင် စစ်ကောင်စီအင်အား (၅၀)နီးပါးကို ချေမှုန်းနိုင်ခဲ့ပြီး လက်နက်ငယ် (၈)လက်၊ ခဲယမ်းနှင့် စစ်အသုံးအဆောင် များကိုလည်း သိမ်းဆည်းနိုင်ခဲ့သည်ဟု PRA-Magwayက ထုတ်ပြန်ထားသည်။
အမ်းမြို့မှ စစ်ရှုံး၍ထွက်ပြေးလာသော စစ်ကောင်စီ ဗိုလ်ကြီးတစ်ဦးအပါအဝင် စစ်ကောင်စီတပ်ဖွဲ့ဝင် ၁၂ ဦးကိုလည်း လက်နက်အချို့နှင့် အတူ ဖမ်းမိထားခြင်းဟု အရှိူချင်းကာကွယ်ရေးတပ် (ACDF)၊ New Society Army (NSA)နှင့်ပြည်သူ့လွတ်လပ်ရေးတပ်တော် (PIA) ပူးပေါင်းတပ်ဖွဲ့ က ဒီဇင်ဘာ ၄ရက်တွင် ထုတ်ပြန်ထားသည်။
