ထားအိ/People’s Spring
ဥရောပသမဂ္ဂအဖွဲ့ဝင်နိုင်ငံဖြစ်သော ဆလိုဗေးနီးယားသည် အပြည်ပြည်ဆိုင်ရာတရားရုံး(ICJ)၌ ရိုဟင်ဂျာလူမျိုးတုန်းသတ်ဖြတ်မှုဖြင့် တရားစွဲဆိုခံထားရသည့် မြန်မာအမှုတွင် ဂမ်ဘီယာဘက်မှ ပါဝင်ဆောင်ရွက်ရန် ဒီဇင်ဘာ ၄ရက်တွင် လျှောက်ထားလိုက်သည်။
ပြီးခဲ့သည့်နှစ်က ဂမ်ဘီယာဘက်မှ ကနေဒါ၊ ဒိန်းမတ်၊ ပြင်သစ်၊ ဂျာမနီ၊ နယ်သာလန်၊ ဗြိတိန်နှင့် မော်လ်ဒိုက် စသည့် ၇နိုင်ငံက ပါဝင်ဆောင်ရွက်ရန် ရုံးတော်(ICJ)သို့ လျှောက် ထားပြီး ယခုနှစ် ဇူလိုင်တွင် ရုံးတော်မှ ယင်း ၇နိုင်ငံအား ပါဝင်ဆောင်ရွက်ခွင့်ပြုခဲ့သည်။
ဆလိုဗေးနီးယားက အမှုတွင် ယခုပါဝင်ဆောင်ရွက်ခွင့် လျှောက်ထားရာ၌ လူမျိုးတုန်းသတ်ဖြတ်မှုကျူးလွန်သည်ဟု စွပ်စွဲခံရသည့် ပိုင်နက်လွန်ကာ မြန်မာကို တရားစီရင်ပိုင်ခွင့်ရှိပြီး လူမျိုးတုန်းသတ်ဖြတ်ခြင်းအန္တရာယ် သတိပြုရန်နှင့် ကြိုတင်ကာကွယ်ရန် အကောင်းဆုံးနေရာတစ်ခုဖြစ်ကြောင်း အလေးပေးဖော်ပြသည်။
Public Service Announcement
ICJ က ဆလိုဗေးနီးယား၏လျှောက်ထားမှုကို စဥ်းစားဆုံးဖြတ်မည်ဖြစ်ပြီး ပါဝင်ဆောင်ရွက်ခွင့်ပြုပါက ဂမ်ဘီယာဘက်မှ ပါဝင်ဆောင်ရွက်မည့် နိုင်ငံအရေအတွက်မှာ ၈နိုင်ငံအထိရှိလာမည်ဖြစ်သည်။
မကြာသေးမီကပင် ရိုဟင်ဂျာများအပေါ် ကျူးလွန်သည့်ပြစ်မှုများအတွက် စစ်ခေါင်းဆောင် မင်းအောင်လှိုင်အား ဖမ်းဝရမ်းထုတ်ပေးရန် နိုင်ငံတကာရာဇဝတ်ခုံရုံး(ICC)သို့ ICC တရားလိုရှေ့နေက လျှောက်ထားခဲ့သည်။ ICC တရားလိုရှေ့နေ၏ လျှောက်ထားမှုကို ICC တရားသူကြီးများက အတည်ပြုလိုက်ပါက စစ်ခေါင်းဆောင်မင်းအောင်လှိုင်သည် ICC ဖမ်းဝရမ်းထုတ်ခံရသည့် နိုင်ငံတကာရာဇဝတ်သားဖြစ်လာမည်ဖြစ်သည်။
သို့သော် ICJ တွင် မြန်မာရင်ဆိုင်နေရသည့်အမှုမှာ သီးခြားနောက်ထပ်တစ်ခုဖြစ်ပြီး ၂၀၁၉ ခုနှစ် NLD အစိုးရလက်ထက်ကတည်းက မြန်မာနိုင်ငံကို OIC(အစ္စလာမစ်ပူးပေါင်းဆောင်ရွက်ရေးအဖွဲ့)ကိုယ်စား ဂမ်ဘီယာနိုင်ငံက ရိုဟင်ဂျာလူမျိုးများအပေါ် လူမျိုးတုန်းသတ်ဖြတ်မှုကျူးလွန်သည်ဆိုကာ ICJ ၌ အမှုဖွင့်တရားစွဲဆိုခဲ့ခြင်းဖြစ်သည်။
၂၀၁၉ ဒီဇင်ဘာတွင် နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် ခေါင်းဆောင်ကာ ICJ တရားရုံးစိုက်ရာ နယ်သာလန်နိုင်ငံ သည်ဟိဂ်မြို့သို့ သွားရောက်ပြီး တရားရင်ဆိုင်ခဲ့သည်။
၂၀၂၁ စစ်အာဏာသိမ်းပြီးနောက်ပိုင်း ယင်းအမှုကို စစ်ကောင်စီက ဆက်လက် တရားရင်ဆိုင်ခဲ့ပြီး တဖက်တွင် အမျိုးသားညီညွတ်ရေးအစိုးရ NUG ကမူ NLD အစိုးရလက်ထက်က ICJသို့ တင်သွင်းခဲ့သော ကန့်ကွက်လွှာများကို ရုတ်သိမ်းကြောင်း ကြေညာခဲ့သည်။
သို့ရာတွင် ICJ က စစ်ကောင်စီနှင့် တရားရုံးလုပ်ငန်းစဥ်များကို ဆက်လက်လုပ်ဆောင်ပြီး စစ်ကောင်စီက တင်သွင်းလာသော ကန့်ကွက်လွှာများကို ပယ်ချကာ ရိုဟင်ဂျာလူမျိုးတုန်းသတ်ဖြတ်မှုတားမြစ်ရေးဆိုင်ရာအမှုကို ရုံးတော်က စီရင်မည်ဖြစ်ကြောင်း ၂၀၂၂ ဇူလိုင်တွင် ဆုံးဖြတ်ခဲ့သည်။ လက်ရှိတွင် အပြန်အလှန်လျှောက်လဲချက်ပေးခြင်းများ လုပ်ဆောင်နေပြီး ယခု ဒီဇင်ဘာ ၁၆ ရက်တွင်လည်း စာဖြင့် လျှောက်လဲချက်တင်သွင်းခြင်း လုပ်ဆောင်ရမည်ဖြစ်သည်။
