ဟန်နွေ ၊အိမ်သွင်/People’s Spring
ရှမ်းပြည်နယ်တောင်ပိုင်း၊ ရပ်စောက်မြို့နယ် ကျောက်ဂူဒေသတွင် ဓနုပြည်သူ့လွတ်မြောက်ရေးတပ်တော်(DPLA)နှင့် စစ်ကောင်စီတပ်တို့ တိုက်ပွဲဖြစ်ပွားရာ စစ်ကောင်စီက ဒရုန်းအသုံးပြုပြီး ဓါတုဗုံးဖြင့်တိုက်ခိုက်ခဲ့သည်ဟု DPLA၏ ပြောရေးဆိုခွင့်ရှိသူ ကိုအမောင်က ပြောသည်။
ရပ်စောက်နှင့်နောင်ချိုမြို့မှ ပူးပေါင်းဝင်ရောက်လာသည့် အင်အားငါးရာခန့်ရှိစစ်ကောင်စီတပ်ဖွဲ့နှင့်DPLA တို့ကြားတိုက်ပွဲဖြစ်ပွားခဲ့ခြင်းဖြစ်သည်။ရှမ်းမြောက်နှင့်ရှမ်းတောင်ကို အဓိကဆက်သွယ်သည့် ရပ်စောက်မြို့နယ်၊ ကျောက်ဂူဒေသတွင် ဓနုပြည်သူ့လွတ်မြောက်ရေးတပ်တော်(DPLA)နှင့် စစ်ကောင်စီတပ်တို့ နိုဝင်ဘာ ၃၀ရက်မှစတင်ကာ နေ့တိုင်းနီးပါး တိုက်ပွဲများပြင်းထန်လျက်ရှိသည်။
ဒီဇင်ဘာ ၇ရက် ညနေ ၄နာရီတွင် စစ်ကောင်စီတပ်မှ ဒရုန်းဖြင့်ဓာတုဗုံးချတိုက်ခိုက်ခဲ့မှုကြောင့် DPLAပူးပေါင်းတပ်ဖွဲ့မှ ရဲဘော်များ ဓာတုအဆိပ်သင့် မူးဝေအော့အန်ခြင်းများရှိခဲ့ကြောင်း အသိပေးသည်။
Public Service Announcement
” နောင်ချို (၆၀၆) ဒုံးတပ်ကို သိမ်းတုန်းကတော့ လေယာဉ်နဲ့ ဓာတုဗုံးချတာကြုံဖူးပါတယ်ဗျ။ ကျောက်ဂူဒေသမှာတော့ ပထမဆုံးအကြိမ်ပါပဲ”ဟု ဓနုပြည်သူ့လွတ်မြောက်ရေးတပ်ဦး(DPLF) ပြောရေးဆိုခွင့်ရှိသူ ကိုအမောင်က ပြောသည်။
ယခု စစ်ကောင်စီ၏ ဓာတုဗုံးတိုက်ခိုက်မှုကြောင့် DPLA ရဲဘော် ခုနစ်ဦးခန့် ထိခိုက်ခံစားခဲ့ရသည်ဟု ၎င်းက ဆိုသည်။
” စစ်ကောင်စီဟာ မတရားမှုတွေကို တိုးပြီးလုပ်ဆောင်နေပါတယ်။ ဒါကြောင့် စစ်ကောင်စီတပ်သားတွေအနေနဲ့ နီးစပ်ရာတော်လှန်ရေးတပ်ဖွဲ့တွေမှာ အလင်းဝင်ရောက်ကြဖို့ ပြောလိုပါတယ်”ဟု ကိုအမောင်က ပြောသည်။
DPLAသည် ကျောက်ဂူဒေသတွင် စစ်ကောင်စီနယ်မြေခံတပ်များ ဖြစ်သည့် ကျောက်ဂူအမြောက်တပ်( အမတ ၃၄၉)၊ နောင်ဝိုးတပ် (ခလရ ၂၉၂)နှင့် နောင်ချိုမြို့နယ် တောင်းခမ်းကျေးရွာသို့ ရပ်စောက်ဘက်မှ စစ်ကူသွားသည့်စစ်ကောင်စီတပ်များနှင့်တိုက်ပွဲဖြစ်ပွားနေခြင်းဖြစ်ကြောင်း DPLFက ထုတ်ပြန်သည်။
” ပြည်သူတွေ အဓိက ပြောချင်တာကတော့ စကစတပ်နဲ့ နီးစပ်ရာ နေရာတွေမှာ မနေဖို့ရယ် တိုက်ပွဲနဲ့ မနီးတဲ့ နေရာတွေမှာ ဘေးကင်းစွာ စစ်ရှောင်ကြဖို့ အသိပေးချင်ပါတယ်”ဟု ကိုအမောင်က ပြည်သူများအား သတင်းစကားပါးသည်။
ကျောက်ဂူဒေသတွင် ပြီးခဲ့သည့်သြဂုတ်လဆန်းပိုင်းကလည်း DPLA နှင့် စစ်ကောင်စီတပ်တိုက်ပွဲအပြင်းအထန်ဖြစ်ပွားခဲ့သည်။ ဩဂုတ်လ ၈ရက်က တိုက်ပွဲ၌ စစ်ကောင်စီတပ်ခလရ(၂၉၂)
တပ်ရင်းမှူးဗိုလ်မှူးမျိုးမျိုးသူ အပါအဝင်ကိုးဦးသေဆုံးပြီး ဗိုလ်မှူးမျိုးမျိုးသူ၏ ရုပ်အလောင်းကို DPLA က ရရှိခဲ့သည်။ စစ်သုံ့ပန်းရှစ်ဦးဖမ်းမိသလို သေနတ် ၁၉လက် သိမ်းဆည်းနိုင်ခဲ့ကြောင်း DPLAက သတင်းထုတ်ပြန်ခဲ့သည်။ ကျောက်ဂူဒေသတွင် တိုက်ပွဲဆက်လက်ပြင်းထန်နိုင်သည်ဟု DPLA တာဝန်ရှိသူကပြောသည်။
DPLAသည်ရှမ်းပြည်နယ်တောင်ပိုင်း ဓနုကိုယ်ပိုင်အုပ်ချုပ်ခွင့်ရဒေသမှ ပြည်သူ့ကာကွယ်ရေးတပ်ဖွဲ့ဖြစ်ပြီး၁၀၂၇ စစ်ဆင်ရေး ပထမပိုင်းနှင့် ၊ ဒုတိယပိုင်းတွင် တအာင်းတပ်မတော်(TNLA) အပါအဝင် မဟာမိတ်တော်လှန်ရေးတပ်များနှင့်ပူးပေါင်းပြီး စစ်ကောင်စီတပ်ကို တိုက်ခိုက်နေသည်။
