ဆိုင်းမင်း/People’s Spring
မန္တလေးတိုင်း ၊ မြင်းခြံခရိုင်၊ ငါန်းဇွန်မြို့နယ်ထဲမှာ နှစ်လခွဲကာလအတွင်း စစ်ရှောင်ပြည်သူတွေထဲက အာဟာရပြတ်လပ် တာနဲ့ လုံလောက်တဲ့ဆေးကုသမှုမရလို့ အသက်ဆုံးပါးရသူ ၂၀ ဦးထိရှိလာပြီလို့ စစ်ရှောင်ကူညီစောင့်ရှောက်ကြသူအချို့ထံကသိရပါတယ်။
စစ်ရှောင်ရတဲ့ရွာတွေဟာ ငါန်းဇွန်မြို့နယ်အတွင်းက ရွာတွေအပြင် ၊ မြင်းခြံနဲ့ ငါန်းဇွန်မြို့နယ်အစပ်က ရွာတွေပါ ပါဝင်ကြပြီး ဒေသခံ ပြည်သူ တစ်သောင်းခန့် နေရပ်မပြန်နိုင်တာ ရက် ၁၀၀ ကျော်ရှိလာပါပြီ။
ငါန်းမြာကြီး၊ မြေတိုင်း၊ သကျင်း၊ ဂျပန်ကျွန်း၊ မိုးတောင်၊ စံပြ၊ ကုန်းလည်းစတဲ့ ကျေးရွာတွေက ပြည်သူတွေ ဟာ ဧရာဝတီမြစ် ရေလယ်ကျွန်းတွေမှာ တိမ်းရှောင်နေရတာပါ။
Public Service Announcement
ရေလယ် ကျွန်းတွေပေါ်မှာ အမိုး၊အကာ မလုံလောက်ဘဲ နေထိုင်ရတာကြောင့် ကျန်းမာရေးထိခိုက်လာ ပြီး ရောဂါအခံ ရှိကြသူတွေ ဝေဒနာ ပိုဆိုးရွားကြတယ်လို့ စစ်ရှောင်ကူညီသူအမျိုးသား က ဆိုပါတယ်။
ပြီးခဲ့တဲ့အောက်တိုဘာလကနေ လက်ရှိဒီဇင်ဘာလ ၁၄ ရက်အထိ စစ်ရှောင်တွေထဲ အာဟာရ ပြတ်လပ်တာ နဲ့ လုံလောက်တဲ့ဆေးကုသမှုမရလို့ ဆုံးပါးသွားတဲ့ စစ်ရှောင် ဦးရေ ၂၀ထိရှိလာတယ်လို့သိရပါတယ်။
အသက်ဆုံးပါးရသူတွေထဲမှာ ကလေးသူငယ်တွေ ၊ သက်ကြီးရွယ်အိုတွေ အများစု ပါဝင်ပါတယ်။ သေဆုံးသူတွေရဲ့ အသေးစိတ်အချက်အလက်တွေရဖို့ ဆက်လက်စုံစမ်းနေဆဲပါ။
လက်ရှိမှာလည်း ကလေးငယ်တွေနဲ့ အသက် ၆၀ အထက် လူကြီးပိုင်းတွေ ဝမ်းပျက်ဝမ်းလျှော ဖြစ်တာ ၊ ရာသီတုပ်ကွေး ဖြစ်ပွားတာ လည်း ခံစားနေရတယ်လို့သိရပါတယ်။
ဒါအပြင် စစ်ကောင်စီတပ်ရဲ့ မြေပြင်က စစ်ကြောင်းထိုးတာ ၊ လေကြောင်းကနေတိုက်ခိုက်တာတွေကြောင့် လမ်းပန်းဆက်သွယ်ရေးပြတ်တောက်ပြီး စားနပ်ရိက္ခာပြတ်လပ်မှုကို ရင်ဆိုင်နေကြရပါတယ်။
