■ကျောက်ဂူဒေသ တိုက်ပွဲပြင်းထန်နေ
အိမ်သွင်/People’s Spring
ရှမ်းပြည်နယ် တောင်ပိုင်း၊ ရပ်စောက်မြို့နယ်၊ ကျောက်ဂူဒေသတွင် ယနေ့(ဒီဇင်ဘာ ၁၈) တိုက်ပွဲပြင်းထန်နေပြီး ရှမ်းတောင်နှင့် ရှမ်းမြောက်အဓိက ဆက်သွယ်ထားသော ကျောက်ဂူရွာအဝင်တံတားကို စစ်ကောင်စီကလေကြောင်းမှ ဗုံးကြဲဖျက်ဆီးခဲ့သည်။
တိုက်ပွဲသည် ဒီဇင်ဘာ ၁၈ ရက်နေ့ နံနက်အစောပိုင်းမှစတင်ခဲ့ပြီး နေ့လယ်၁၂နာရီခန့်တွင် အပြင်းအထန်ဖြစ်ပွားခဲ့ကြောင်း ဒေသခံအချို့ကပြောသည်။နေ့လယ်ပိုင်းတိုက်ပွဲတွင် စစ်ကောင်စီက လေကြောင်းမှ ဗုံးကြဲဖျက်ဆီးသွားခြင်းဖြစ်ကြောင်း ဒေသခံများကပြောသည်။
“တံတားကို ပစ်ချသွားတာ။ ကားကြီးတွေသွားလို့မရတော့ဘူး။ တိုက်ပွဲကလည်း တော်တော်လေးကိုပြင်းထန်ခဲ့တယ်” ဟု ဒေသခံတစ်ဦးကပြောသည်။
Public Service Announcement
အဆိုပါတံတားသည်ရပ်စောက်-ဗထူး-အင်တော-ကျောက်ဂူ-နောင်ချို-နမ့်လန်-လားရှိုး-ကျောက်မဲမြို့များကိုဆက်သွယ်ထားသည့် လမ်းပိုင်းမှ အရေးပါသည့်တံတားဖြစ်သည်။
တိုက်ပွဲဖြစ်ရာနေရာသည် ဓနုပြည်သူ့လွတ်မြောက်ရေးတပ်တော်(DPLA) ထိန်းချုပ်ထားသည့် နေရာဖြစ်သည်။ တိုက်ပွဲနှင့်ပတ်သက်၍ DPLA က သတင်းမထုတ်ပြန်သေးပေ။
ကျောက်ဂူဒေသတွင် အမြောက်တပ်(အမတ ၃၄၉)၊ ခလရ (၂၉၂)နှင့် နောင်ချိုမြို့နယ်တောင်ခမ်းသို့ ရပ်စောက်ဘက်မှ စစ်ကူသွားသည့်စစ်ကောင်စီတပ်များနှင့် DPLAသည် နိုဝင်ဘာလ(၃၀)ရက်နေ့မှ စတင်၍ တိုက်ပွဲဖြစ်ပွားခဲ့သည်။ ဒီဇင်ဘာလ ၉ရက်အထိ တိုက်ပွဲများအတွင်း စစ်ကောင်စီတပ်ဘက်မှ ၅၀ကျော် ကျဆုံးခဲ့ပြီး အများအပြားဒဏ်ရာရရှိခဲ့သည်ဟု DPLAက ထုတ်ပြန်ခဲ့သည်။
စစ်ကောင်စီက ဒီဇင်ဘာလ ၇ရက်ညမှစ၍ ဒရုန်းဖြင့် ဓာတုဗုံးကြဲတိုက်ခိုက်ခဲ့သည်ဟု DPLA ကထုတ်ပြန်သည်။ ထိုနောက်ပိုင်း၌ တိုက်ပွဲဆက်လက်ဖြစ်ပွားခဲ့ပြီး ဒီဇင်ဘာ ၁၈ ရက်နေ့တွင်အပြင်းထန်ဆုံးဖြစ်နေခြင်းဟုဒေသခံအချို့ကပြောသည်။
