ဟန်နွေ/People’s Spring
ရှမ်းပြည်နယ်တောင်ပိုင်း ရပ်စောက်မြို့နယ်၊ ကျောက်ဂူမြို့ရှိ စစ်ကောင်စီ၏ အမြောက်တပ်(အမတ − ၃၄၉)အနီးတွင် ဓနုပြည်သူ့လွတ်မြောက်ရေးတပ်တော်(DPLA)နှင့် စစ်ကောင်စီတပ်တို့ ဆက်လက်တိုက်ပွဲဖြစ်ပွားနေသည်။
တိုက်ပွဲဖြစ်ပွားနေသော ရှမ်းပြည်နယ်မြောက်ပိုင်း၊ နောင်ချိုမြို့နယ် တောင်းခမ်းကျေးရွာ၌ မိုင်(၃၀)ခန့်ကွာဝေးသော ကျောက်ဂူဒေသတွင် DPLAနှင့် စစ်ကောင်စီတပ်တို့သည် နိုဝင်ဘာလကုန်ပိုင်းမှစ၍ တိုက်ပွဲများ ဖြစ်ပွားနေခြင်းဖြစ်သည်။
တိုက်ပွဲဖြစ်ပွားနေသော နောင်ချိုမြို့နယ် တောင်းခမ်းကျေးရွာနှင့် ရပ်စောက်မြို့နယ် ကျောက်ဂူဒေသမှာ လမ်းပိုင်းတစ်စပ်တည်းရှိသည်။
Public Service Announcement
“နေ့တိုင်းဖြစ်တာရှိတယ်။ ရက်ခြား တာလည်းရှိပါတယ်။ မနေ့ကတော့ ပြန်ဖြစ်တာပေါ့”ဟု DPLA တာဝန်ရှိသူတစ်ဦးက ပြောသည်။
ဒီဇင်ဘာ ၁၈ရက် ညနေ ၃နာရီအချိန်တွင် စစ်ကောင်စီက လေကြောင်းတိုက်ခိုက်မှုကြောင့် ထမင်းပေါင်းကျေးရွာမှ အရပ်သားတစ်ဦး အသက်ဆုံးရှုံးခဲ့ရသည်ဟုလည်း ဓနုပြည်သူ့လွတ်မြောက်ရေးတပ်ဦး(DPLF)က အသိပေးသည်။
စစ်ကောင်စီသည် ကျောက်ဂူဒေသကျေးရွာများရှိရာသို့ လက်နက်ကြီးပစ်ခတ်၍ လည်းကောင်း၊ ဒရုန်းဖြင့် ဗုံးချ၍ လည်းကောင်း တိုက်ခိုက်နေကြောင်း၊ ဒီဇင်ဘာ(၁၀)ရက်နေ့ကလည်း ကျောက်မီးခတ်ကျေးရွာဘုန်းကြီးကျောင်းကို ဒရုန်းဖြင့်ဗုံးကြဲတိုက်ခိုက်မှုကြောင့် အရပ်သားတစ်ဦး ထိခိုက်ဒဏ်ရာရရှိခဲ့ကြောင်း ဖော်ပြသည်။
ယမန်နေ့ တိုက်ပွဲတွင် နှစ်ဖက်ထိခိုက်ကျဆုံး အခြေအနေများ ဆက်လက်စုံစမ်းနေဆဲဖြစ်သည်။
ပြီးခဲ့သည့် နိုဝင်ဘာ ၃၀ရက်မှ ဒီဇင်ဘာ ၉ရက်အထိ ဖြစ်ပွားခဲ့သည့် တိုက်ပွဲများတွင်လည်း စစ်ကောင်စီတပ်က အထိနာခဲ့ဟု DPLFက ထုတ်ပြန်ထားသည်။ နိုဝင်ဘာ ၃၀ရက်မှ ဒီဇင်ဘာ ၉ရက်နေ့အထိ တိုက်ပွဲ ၁၀ရက်တာ အတွင်း စစ်ကောင်စီတပ်မှ ၅၀ဦး ကျော် သေဆုံးကာ ဒဏ်ရာရသူများ ရှိကြောင်း DPLFက ထုတ်ပြန်ထားသည်။
စစ်ရေး အခြေအနေများကြောင့် ပြည်သူများ အနေဖြင့် စစ်ကောင်စီတပ်နှင့် ဝေးဝေးနေရန် ၊ ဘေးကင်းလုံခြုံသည့်နေရာများ၌ စစ်ရှောင်ကြရန် DPLFက မေတ္တာရပ်ခံထားသည်။
