နွားထိုးကြီးတွင် စစ်ကောင်စီလေကြောင်းတိုက်ခိုက်ရာ ပြည်သူတစ်ဦးသေဆုံး

အင်ကြင်း/People’s Spring

ရန်ကုန် – မန္တလေး အမြန်လမ်း၌ နွားထိုးကြီး PDFက လမ်းပိုင်းစစ်ဆေးမှုပြုလုပ်ပြီးနောက် စစ်ကောင်စီတပ်က အဆိုပါအမြန်လမ်းအနီးရှိ ဒေါင့်ဘိုးကျေးရွာ လေကြောင်းတိုက်ခိုက်ခဲ့ရာ ပြည်သူတစ်ဦးသေဆုံးကြောင်း ဒေသခံများက ပြောသည်။

ယမန်နေ့ (ဒီဇင်ဘာ ၂၃ ရက်)နံနက်ပိုင်းက ရန်ကုန် – မန္တလေး အမြန်လမ်း မိုင်တိုင်(၃၁၈)တွင် နွားထိုးကြီး PDFက ယာဉ်များအား လမ်းပိုင်းစစ်ဆေးမှုပြုလုပ်ပြီးနောက် ညနေ ၆ နာရီခွဲခန့်တွင် အဆိုပါ အမြန်လမ်းအနောက်မြောက်ဘက် ၁၀ မိုင်ခန့်အကွာရှိ ဒေါင့်ဘိုးကျေးရွာကို လေကြောင်းတိုက်ခိုက်ခဲ့ရာ အမျိုးသားတစ်ဦးသေဆုံးကြောင်း ဒေသခံများက ပြောသည်။

“ရွာလယ်ခေါင် အိမ်ပေါ်တည့်တည့်ကျတယ်။ အိမ်ရှင် အမျိုးသားခေါင်းပြတ်သွားတယ်။ နောက်ထပ်နှစ်ဦးလည်းထိတယ်။ တိုက်ပွဲဖြစ်ပွားတာလည်း မရှိဘူး။”ဟု ဒေသခံတစ်ဦးက ပြောသည်။

Public Service Announcement

ထို့အပြင် လေကြောင်းတိုက်ခိုက်မှုကြောင့် နေအိမ် ၄လုံးထက်မနည်း ပျက်စီးခဲ့ကြောင်း သိရသည်။

နွားထိုးကြီး PDFသည် ခရီးသွားများအား တွေ့ဆုံပြီး မကြာမီတိုက်ပွဲများရှိလာတော့မည်ဖြစ်၍ ပြည်သူများ မလိုအပ်ဘဲ ခရီးမသွားကြရန်၊တိုက်ပွဲနှင့် တိုးလျှင် ရှေ့ဆက်မမောင်းဘဲ နီးစပ်ရာ လုံခြုံသည့် နေရာတွင် နေထိုင်ကြရန် တွေ့ဆုံပြောကြားခဲ့သည်။

ပြီးခဲ့သည့် ဒီဇင်ဘာ ၁၂ ရက်ကလည်း ရန်ကုန်-မန္တလေး အမြန်လမ်းမကြီးပေါ်၊ မိုင်တိုင်(၃၁၉)အနီးရှိ စစ်ဆေးရေးဂိတ်ကို နွားထိုးကြီး PDFက တိုက်ခိုက်ခဲ့သေးသည်။