ဇေအောင်/People’s Spring
စစ်ကိုင်းတိုင်း၊ ချောင်းဦးမြို့ပေါ်တွင် ညဘက်ကင်းပတ်နေသည့် စစ်ကောင်စီတပ် မိုင်းဆွဲတိုက်ခိုက်ခံရပြီး ထိခိုက်မှုရှိကြောင်း သတင်းရရှိသည်။
ဒီဇင်ဘာ၂၄ရက် ညက ချောင်းဦးမြို့ပေါ်ရဲစခန်းမှ မြို့တွင်းကင်းပတ်ထွက်လာသော စစ်ကောင်စီတပ်သား ၁၀ဦးကို ည ၈နာရီ မိနစ် ၅၀ခန့်တွင် မြို့တွင်းတနေရာ၌ မိုင်းဆွဲတိုက်ခိုက်ခဲ့ကြောင်း ချောင်းဦးမြို့နယ်ပြည်သူ့ကာကွယ်ရေးအဖွဲ့(ပကဖ)၏ တိုက်ခိုက်ရေးတပ် CHU PDF၏ တာဝန်ရှိသူက ပြောသည်။
တိုက်ခိုက်မှုကြောင့် စစ်ကောင်စီတပ်သား ၈ ဦးခန့် ထိခိုက်မှုပြင်းထန်ခဲ့ကြောင်း ချောင်းဦးပကဖ တိုက်ခိုက်ရေးတပ်၏ တာဝန်ရှိသူက ပြောသည်။
Public Service Announcement
“အများစု သေနိုင်ချေရှိတယ်။ မီးဖြတ်ပြီးတော့ အလောင်းကောက်သွားတယ်။”ဟု ၎င်းတာဝန်ရှိသူကပြောသည်။
ယမန်နေ့ညက ပေါက်ကွဲသံတစ်ခု ကျယ်လောင်စွာထွက်ပေါ်လာပြီး တစ်မြို့လုံးကြားလိုက်ရကြောင်း ဒေသခံအချို့က ပြောသည်။
“ညက ရဲစခန်းနား အုန်းသံ ကြားလိုက်ရတယ်။”ဟု ချောင်းဦးဒေသခံတစ်ဦးက ပြောသည်။
ယနေ့ (ဒီဇင်ဘာ ၂၅ရက်) နံနက် ၁၀ နာရီခန့်ကလည်း မုံရွာ – မန္တလေး လမ်းမကြီး မုံရွေးတိုးဂိတ် အနီး၌ ကင်းပုန်းဝပ်နေသော စစ်ကောင်စီတပ်သား ၂ဦးအား မိုင်းဆွဲတိုက်ခိုက်ခဲ့ရာ တစ်ဦးသေဆုံးကြောင်း ချောင်းဦးပကဖကက ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
ချောင်းဦးပကဖသည် ဒီဇင်ဘာ ၁၇ ရက်ကလည်း မုံရွာမြို့နယ်၊ မုံရွာ-မန္တလေးလမ်းပိုင်းတွင် စစ်ကောင်စီတပ် ကင်းလာစောင့်မည့်တိုက်အဆောက်အဦးအတွင်း မိုင်းကြိုဆင်၍ တိုက်ခိုက်ခဲ့ရာ စစ်ထိခိုက်မှုရှိခဲ့သည်။
