ဇေအောင်/People’s Spring
မန္တလေးတိုင်း၊ မတ္တရာမြို့နယ်၊ ထန်းတောကုန်းကျေးရွာဘုန်းကြီးကျောင်းကို စစ်တပ်က လက်နက်ကြီးဖြင့် ပစ်ခတ်ရာ ကလေးငယ်နှစ်ဦးသေဆုံးကြောင်း ပြည်သူ့ကာကွယ်ရေးတပ်မတော် (မန္တလေး)က သတင်းထုတ်ပြန်သည်။
ယနေ့ (ဒီဇင်ဘာ ၂၆ရက်) ညနေ ၃ နာရီခွဲခန့်က စစ်တပ်ပစ်ခတ်လိုက်သော လက်နက်ကြီးကျည်သည် ထန်းတောကုန်းကျေးရွာ ဘုန်းကြီးကျောင်းအတွင်း ကျရောက်ပေါက်ကွဲခဲ့ကြောင်း မန္တလေး PDFက အသိပေးသည်။
ထိုသို့ လက်နက်ကြီးဖြင့် ပစ်ခတ်မှုကြောင့် ကလေးငယ် နှစ်ဦး သေဆုံးပြီး ပြည်သူ သုံးဦးထိခိုက်ဒဏ်ရာရရှိခဲ့ကြောင်း မန္တလေး PDFက ထုတ်ပြန်သည်။
Public Service Announcement
“ဒီနေ့ဖြစ်စဥ်က တိုက်ပွဲဖြစ်ပွားခြင်းမရှိဘဲနဲ့ စစ်ကောင်စီဘက်က မဆင်မခြင် တဖက်သက် ပစ်ခတ်မှုကြောင့် ကလေးငယ်နှစ်ဦး သေဆုံးပြီး ပြည်သူနှစ်ဦး ထိခိုက်ဒဏ်ရာရရှိခဲ့ခြင်းဖြစ်ပါတယ်။ လက္ကောင်းလေး ကျေးရွာဘက်ကနေ လှမ်းပစ်တယ်လို့ သိရတယ်။”ဟု မန္တလေး PDF၏ ပြောရေးဆိုခွင့်ရှိသူ ကိုအော်စမွန်က ပြောသည်။
“ဒီနေ့လက်နက်ကြီးကျတဲ့နေရာက တနေ့ကတိုက်ပွဲဖြစ်တဲ့နေရာနဲ့ သိပ်မဝေးဘူး။ မတ္တရာအရှေ့ခြမ်းကျတယ်။”ဟု မတ္တရာဒေသခံတစ်ဦးက ပြောသည်။
မန္တလေး PDFနှင့် စစ်ကောင်စီတပ်များအကြား မတ္တရာမြို့နယ် ၊ သပိတ်ကျင်းမြို့နယ်နှင့် နောင်ချိုမြို့နယ်တို့တွင် တိုက်ပွဲများ ဖြစ်ပွားလျက်ရှိကြောင်း၊ စစ်ကောင်စီသည် စစ်ရှုံးလာသည်နှင့်အမျှ ပြည်သူများပစ်မှတ်ထား၍ စစ်ရာဇဝတ်မှုများကို အကြိမ်ကြိမ် ကျူးလွန်လျက်ရှိကြောင်း မန္တလေး PDFက ထုတ်ပြန်ထားသည်။
ဒီဇင်ဘာ ၁၉ ရက်က မတ္တရာမြို့နယ်၊ ထန်းပင်ကုန်းကျေးရွာရှိ စစ်ကောင်စီစခန်းအား မန္တလေး PDFက သိမ်းပိုက်နိုင်ခဲ့ပြီး စစ်သုံ့ပန်းအချို့ ဖမ်းဆီးရမိခဲ့သည်။
ထို့အပြင် မတ္တရာမြို့နယ်အတွင်းရှိ အခြားသော နေရာများသို့လည်း ဆက်လက်ထိုးစစ်ဆင်နေကြောင်း မန္တလေး PDFက အသိပေးသည်။
ဒီဇင်ဘာ ၆ရက်ကလည်း တော်လှန်ရေးအဖွဲ့များ ယာယီလက်လွှတ်ခဲ့ရသည့် မတ္တရာအနောက်ခြမ်းအား မန္တလေး PDFက ပြန်လည်ထိုးစစ်ဆင်တိုက်ခိုက်ခဲ့ရာ ရွာသစ်ကျေးရွာ ၊ ဝန်စုကျေးရွာ ယနှင့် ထိန်ပင်စောက်ကျေးရွာတို့ရှိ စစ်ကောင်စီစခန်းများကို အပြီးသတ် ပြန်လည်သိမ်းပိုက်ရရှိခဲ့သည်။
သို့သော် မတ္တရာအနောက်ခြမ်း၌ စစ်ကောင်စီစခန်းများ ကျန်ရှိနေဆဲဖြစ်၍ ယခင်ရက်ပိုင်းကပင် ကျေးရွာအချို့ မီးရှို့ဖျက်ဆီးခံခဲ့ရသည်။
