အိမ်သွင်/People’s Spring
ပဲခူးတိုင်း၊ ပြည်မြို့ရှိ ပုဂ္ဂလိကစာသင်ကျောင်းများမှ ကျောင်းသူ၊ကျောင်းသားမျာအား မျက်မှန်တပ်သူနှင့် မတပ်သူစာရင်းနှင့်ကျန်းမာရေးကောင်းမွန်ခြင်းရှိ၊မရှိကို စစ်ကောင်စီက လာရောက်တောင်းယူသွား၍ ကျောင်းသားမိဘများ စိုးရိမ်နေကြသည်။
ပုဂ္ဂလိကစာသင်ကျောင်းများကို စစ်ကောင်စီက ခရစ္စမတ်ကာလ ကျောင်းပိတ်ရက်မတိုင်မီ ရောက်ရှိလာပြီး အဆိုပါစာရင်းများ တောင်းယူသွားခြင်းဟု ဆိုသည်။
“အသက် ၁၅နှစ်အထက်ကနေ စကောက်တာ။ ပေါ်တာတွေလည်း အရမ်းဆွဲနေသလို အခုလို စာရင်းတောင်းသွားတော့ ကျောင်းသားမိဘတွေအားလုံး လန့်နေကြတယ်”ဟု ပြည်မြို့ခံတစ်ဦးကပြောသည်။
Public Service Announcement
ပြည်မြို့သည် အာရက္ခတပ်တော်(AA)ထိန်းချုပ် ထားသည့် ရခိုင်ပြည်နယ်၊ တောင်ကုတ်မြို့နှင့် ဆက်စပ်သလို အမ်း – ပဒါန်းလမ်းမှတဆင့် အမ်းမြို့နှင့်လည်း ချိတ်ဆက်ထားသည်။
တောင်ကုတ်နှင့် အမ်းမြို့ကို လက်လွတ်ရပြီးနောက် စစ်ကောင်စီက ပြည်ခရိုင်အတွင်း လူငယ်များအား ဖမ်းဆီးခြင်း၊ စစ်မှူးထမ်းဥပဒေအကြောင်းပြ၍ စစ်သားစုဆောင်းခြင်းများပြုလုပ်နေသည်။
ယခုအခါ ပြည်မြို့ပေါ်ရှိ ပုဂ္ဂလိကစာသင်ကျောင်းများမှ ကျောင်းသား၊ ကျောင်းသူများစာရင်းနှင့် ကိုယ် ရေးအချက်အလက်များကို စစ်ကောင်စီက လိုက်လံကောက်ယူနေခြင်းဖြစ်သည်။
“ပြည်မှာ အခြေအနေအရမ်းဆိုးနေတယ်။မြို့ပေါ်မှာတင် အိမ်ထဲတွေထိ ဝင်ဖမ်းတာ။ အဲ့ဒါကကောလဟာလမဟုတ်ဘူး။ ကျနော်တို့ရပ်ကွက်ထဲမှာတင်ဝင်ဖမ်းသွားတာ”ဟု ပြည်မြို့ပေါ်ဒေသူတစ်ဦးက ပြောသည်။
ရခိုင်ပြည်နယ်နှင့် ဆက်စပ်နေသော ပဲခူးတိုင်းအတွင်း စစ်ကောင်စီက လုံခြုံရေးတင်းကျပ်ပြီး လူငယ်များ ဖမ်းဆီးမှုများရှိနေသလို ဧရာဝတီတိုင်းအတွင်း ပုသိမ်နှင့်ဟင်္သာတမြို့ကဲ့သို့ ခရိုင်မြို့များတွင်လည်း ယင်းကဲ့သို့ လုပ်ဆောင်နေသည်။
ပုသိမ်မြို့တွင် ညမထွက်ရနှင့် လူငါးဦးထက်ပို၍ လူစုခြင်းမပြုရန် ကြေညာချက်ကို စစ်ကောင်စီက ထုတ်ပြန်ထားသည်။
ဧရာဝတီတိုင်းနှင့်ဆက်စပ်နေသော ရခိုင်ပြည်နယ် ဂွမြို့ကို အာရက္ခတပ်တော်(AA)က သိမ်းယူထားသည်။
