အိမ်သွင်/People’s Spring
တောင်ကုတ်မြို့၌ တိုက်ပွဲပြင်းထန်နေ၍ ပြည်မြို့အပါအဝင် ပဲခူးတိုင်းမှ နယ်မြေချင်းဆက်စပ်မြို့နယ်များမှ ဒေသခံအချို့သည် ဘေးလွတ်ရာသို့ စတင်တိမ်းရှောင်နေကြကြောင်း သတင်းရရှိသည်။
ရခိုင်ပြည်နယ်၊ တောင်ကုတ်မြို့သည် ရခိုင်ရိုးမခြားလျက် မြို့များဖြစ်သော ပြည်မြို့အပါအဝင် ပဲခူးတိုင်းအတွင်းရှိမြို့အချို့ ၊ ဧရာဝတီတိုင်းနှင့် မကွေးတိုင်းအတွင်းရှိမြို့အချို့ ဆပ်စပ်နေပြီး အဆိုပါ မြို့များ၌ စစ်ကောင်စီက အင်အားတိုးနေသည်။ တချိန်တည်းတွင် ဒေသခံအချို့သည် ဒေသတွင်း၌ ဖြစ်လာနိုင်ဖွယ်ရှိသည့် တိုက်ပွဲများအတွင်း အန္တရာယ်ကင်းစေရေးအတွက် စတင်တိမ်းရှောင်လာကြသည်။
” ကျတော့် ကလေးတွေနဲ့ မိဖတွေကို ရန်ကုန်ကိုပို့ထားတယ်။ စစ်တပ်က လေကြောင်းတွေတောက်လျှောက်ပျံနေသလို ကားတွေလည်း မျက်စိနောက်လောက်အောင် သွားလာနေတော့ စိတ်အနှောက်အယှက်ဖြစ်စရာတွေ ကြုံလာတယ်။ နောက်ပြီး အခြေအနေတွေက ဘာဖြစ်မယ်လို့ မှန်းဆလို့ မရတာမို့ မနေရဲတော့တာတွေ ဖြစ်လာတယ်”ဟု ပြည်မြို့ခံတစ်ဦးက ပြောသည်။
Public Service Announcement
ထို့အပြင် ရခိုင်ပြည်နယ်နှင့် မကွေးတိုင်း ချိတ်ဆက်ထားသည့် အမ်း-ပဒါန်းလမ်းပိုင်းတွင်လည်း စစ်ရေးတင်းမာမှုရှိနေပြီး အာရက္ခတပ်တော်(AA)နှင့် မဟာမိတ်များက နယ်မြေစိုးမိုးမှုယူထားသည်။
” ပဒါန်းက ဒုတိယတောင်းခမ်းလို့ ပြောနေကြတယ်။ ပဒါန်းမှာ တိုက်ပွဲတွေပြင်းထန်လာနိုင်တယ်လို့ သတင်းတွေထွက်နေပြီး ဒေသခံတွေစပြီးရှောင်နေကြပြီ”ဟု မကွေးတိုင်း၊ မင်းဘူးမြို့ခံတစ်ဦးက ပြောသည်။
တောင်ကုတ်မြို့နယ်တွင် ဇွန်လဆန်းကစ၍ တိုက်ပွဲများစတင်ဖြစ်ပွားခဲ့ပြီး စစ်ဆင်ရေးကွပ်ကဲမှုဌာနချုပ် စကခ (၅) လက်အောက်ခံတပ်ရင်းများဖြစ်ကြသော ခမရ (၃၄၆)နှင့် ခမရ (၅၄၄)ကို AAက နိုဝင်ဘာ၁ရက်က ထိုးစစ်ဆင် တိုက်ခိုက်နေခြင်းဟု မြို့ခံတစ်ဦးက ပြောသည်။
အဆိုပါ တပ်ရင်းများကို ဝိုင်းရံပိတ်ဆို့ထားပြီး အပြီးသတ်သိမ်းပိုက်ရယူနိုင်ရေး တိုက်ခိုက်နေကြောင်း AAက အောက်တိုဘာ ၇ရက်တွင်သတင်းထုတ်ပြန်ခဲ့သည်။
စကခ(၅)နှင့် သုံးမိုင်ခန့်ဝေးသည့် ပန်းမြောက် တောင်ပေါ်မှ စစ်ကောင်စီ၏ အမြောက်တပ် စခန်းကို AA က အောက်တိုဘာ ၃၀ရက်ကစ၍ ထိုးစစ်ဆင်တိုက်ခိုက်ခဲ့ပြီး နိုဝင်ဘာ ၃ ရက်တွင် သိမ်းပိုက်ရရှိပြီဟု ရခိုင်ပြည်နယ်အခြေစိုက် သတင်းဌာနအချို့က ဖော်ပြထားသည်။ ထို့အပြင် မြို့ကို စစ်ကောင်စီက လေကြောင်းတိုက်ခိုက်မှုများဆက်လက်ပြုလုပ်နေကြောင်းလည်း သတင်းရရှိသည်။
“တောင်ကုတ်တိုက်ပွဲက မြို့နားအထိကိုရောက်လာပါတယ်။ တောင်ကုတ်ကို တပ်တော်(AA)က သိမ်းယူနိုင်ပြီဆိုရင် သူနဲ့ဆက်စပ်မြို့နယ်တွေမှာလည်း AAနဲ့ မဟာမိတ်တွေက တိုက်ပွဲတွေဖော်ဆောင်လာနိုင်တယ်။ ဒါကို ကြိုတင်မှန်းဆပြီး ပြင်ဆင်ထားတာက ဒေသခံတွေအတွက် အကောင်းဆုံးဖြစ်မယ်လို့ ကျနော်ထင်တယ်။ ဘာကြောင့်လဲဆိုရင် တပ်တော်နဲ့ မဟာမိတ်တွေရဲ့ စစ်ရေးရည်မှန်းချက်တွေရှိနေတယ်”ဟု AAနှင့် နီးစပ် သည့်သတင်းရင်းမြစ်တစ်ဦးက ပြောသည်။
လက်ရှိတွင် အမ်းမြို့တွင်လည်း တိုက်ပွဲပြင်းထန်နေပြီး AAသည် အနောက်ပိုင်းတိုင်းစစ်ဌာနချုပ်အပါအဝင် စစ်ကောင်စီတပ်စခန်းများကို အနီးကပ်ပိတ်ဆို့တိုက်ခိုက်နေခြင်းဟု မြို့ခံများထံမှဘသိရသည်။
အမ်းနှင့် တောင်ကုတ်မြို့အပြင် ဂွ၊ ကျိန္တလီနှင့် မောင်တောမြို့များ၌လည်း တိုက်ပွဲများအပြင်းအထန်ဖြစ်ပွားနေသည်။ လတ်တလောဒေသတွင်းတိုက်ပွဲများနှင့်ပတ်သက်၍ AAက သတင်းထုတ်ပြန်ထားခြင်းမရှိသေးပေ။
