အင်းစိန်နှင့် ကလေးအကျဥ်ထောင်များတွင် အများဆုံးဖြစ်
ကျော်ဇော/People’s Spring
ပြီးခဲ့သည့် ၂၀၂၄ ခုနှစ်အတွင်း အကျဥ်းထောင်များတွင် ရိုက်နှက်တိုက်ပိတ်ခံရသည့် နိုင်ငံရေးအကျဥ်းသား ၇၆ဦးရှိကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က အသိပေးထုတ်ပြန်သည်။
ထောင်အာဏာပိုင်များသည် နိုင်ကျဉ်းများအား အကြောက်တရားရရှိစေရန်ဦး တည်ချက်ထား ဖိနှိပ်မှုများလုပ်ဆောင်သည့်အပြင် ထောင်တွင်းအကျဉ်းသားညီညွတ်မှုဖြိုခွင်းရန် ဦးဆောင်ဦးရွက်ပြုသူများအား ရိုက်နှက်ခြင်း၊ တိုက်ပိတ်ခြင်းများကို ရာထူးအာဏာအသုံးပြုလျှက် ကျူးလွန်လျှက်ရှိသည်ဟု PPNM၏ နှစ်ကုန်အစီရင်ခံစာတွင် ဖော်ပြထားသည်။
ရိုက်နှက်တိုက်ပိတ်မှုများအနက် ကလေးအကျဉ်းထောင်တွင် ၂၈ ဦး၊ အင်းစိန်အကျဥ်းထောင်တွင် ၂၈ ဦး၊ မကွေးထောင်တွင် ၁၀ ဦး၊ ကျိုက်မရောထောင်တွင် ခုနစ်ဦး၊ သာယာဝတီထောင်တွင် နှစ်ဦးနှင့် ဒိုက်ဦးထောင်တွင်တစ်ဦး အသီးသီးဖြစ်ကြောင်း PPNM က အသိပေးသည်။
Public Service Announcement
နိုင်ကျဥ်းဦးရေအများဆုံး ရိုက်နှက်တိုက်ပိတ်ခံရမှုများမှ ကလေးအကျဥ်းထောင်ဖြစ်စဥ်မှာ ထောင်တွင်းဆန္ဒပြမှုတွင် ပါဝင်သည်ဟူသော အကြောင်းပြချက်ဖြင့် အကျဉ်းသား ၂၈ဦးအား ခြေကျင်းခက်ကာ တိုက်ပိတ်ခဲ့ခြင်းဟု PPNMက ဖော်ပြ သည်။
အလားတူ နိုင်ငံရေးအကျဥ်းသား ၂၈ ဦးအထိရိုက်နှက် တိုက်ပိတ်ခံရသည့် အင်းစိန်ထောင်ဖြစ်စဥ်မှာလည်း ဘောလုံးကစားရာတွင် ရန်ဖြစ်သည်ဟူသော အကြောင်းပြချက်ဖြင့် လေးဦး၊ တရားမဝင်ပစ္စည်းကိုင်ဆောင်သည်ဟူသော အကြောင်းပြချက်ဖြင့် ၂၄ ဦးကို တိုက်ပိတ်ခဲ့ခြင်းဖြစ်သည်။
ထို့အပြင် သာယာဝတီထောင်မှ နိုင်ကျဥ်းနှစ်ဦး၏ဖြစ်စဥ်မှာ ပါဆယ်ပို့သည့် စာအုပ်အတွင်း ဖုန်းဆင်းမ်ကတ်ပါသည်ဆိုကာ ရိုက်နှက်ခြေကျင်းခတ်တိုက်ပိတ်ခဲ့ခြင်းဖြစ်သည်ဟု PPNMက ဖော်ပြသည်။
ယခုကဲ့သို့ လူ့အခွင့်အရေး၊ အကျဥ်းသားအခွင့်အရေးချိုးဖောက်ခဲ့သော အကျဉ်းဦးစီးဝန်ထမ်းအရာရှိများအား နစ်နာခဲ့ရသည့် နိုင်ငံရေးအကျဉ်းသား၊အကျဉ်းသူများနှင့်အတူ အကူးအပြောင်းကာလ တရားမျှတမှုဖော်ဆောင်ချိန်၌ ထိရောက်သည့် တာဝန်ခံတာဝန်ယူမှုရရှိစေရေး ကြိုးစားလုပ်ဆောင်သွားမည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်း သားများကွန်ရက်(PPNM)က ထုတ်ပြန် သည်။
စစ်ကောင်စီ၏ အကျဥ်းထောင်တွင်း လူ့အခွင့်အရေးချိုးဖောက်မှုများအနက် ၂၀၂၄ အတွင်း ဥပဒေမဲ့ သတ်ဖြတ်ခံရသည့် နိုင်ငံရေးအကျဥ်းသား ကိုးဦးရှိပြီး အမျိုးသမီးတစ်ဦး၊ အမျိုးသားရှစ်ဦးပါဝင်ကြောင်း PPNM၏ နှစ်ကုန်အစီရင်ခံစာတွင် ဖော်ပြထားသည်။
