အိမ်သွင်/People’s Spring
ပြည်ခရိုင်၊ ဥသျှစ်ပင်မြို့အနီးရှိ တောင်ပုံကြီးစစ် ကောင်စီတပ်စခန်းကို အာရက္ခတပ်တော်(AA)နှင့် မဟာမိတ်များက တိုက်ခိုက်နေပြီး ၂ ရက်ဆက်တိုက်ပွဲပြင်းထန်နေကြောင်း ဒေသခံအချို့ကပြောသည်။
တောင်ကုတ်မြို့နှင့်ဆက်စပ်နေပြီး ရခိုင်ရိုးမှပေါ်ရှိ တောင်ပုံကြီးစစ် ကောင်စီစခန်းကို ဇန်နဝါရီလ ၁ရက်နေ့နံနက်တွင် AAက စတင်တိုက်ခိုက်ခြင်းဟု ဥသျှစ်ပင်မြို့ဒေသခံတစ်ဦးကပြောသည်။
“AAနဲ့ မဟာမိတ်တွေပါတယ်လို့သိရတယ်။ တိုက်ပွဲဖြစ်တဲ့နေရာတွေကို စစ်တပ်က ၂ရက်စလုံးလေကြောင်းတိုက်တယ်။ ဒီနေ့လည်း တိုက်ပွဲဆက်ဖြစ်နေတယ်။ မြို့နဲ့ဝေးတော့ မြေပြင်အခြေအနေကို မေးဖို့ စမ်းဖို့ခက်နေတယ်” ဟု ဒေသခံတစ်ဦးကပြောသည်။
Public Service Announcement
စစ်ကောင်စီဝါဒဖြန့်ချိရေးလူမှုကွန်ရက်စာမျက်နှာများတွင် တောင်ပုံကြီးစစ် ကောင်စီစခန်းတိုက်ခိုက်ခံနေရပြီး တော်လှန်ရေးတပ်ဖွဲ့များက ပြည်ခရိုင်အတွင်း စစ်ပွဲများဖော်ဆောင်လာနိုင်ကြောင်း ရေးသားနေကြသည်။
ဥသျစ်ပင်မြို့သည် ပြည်မြို့နှင့် ဧရာဝတီမြစ်ခြားလျက်တည်ရှိပြီး ပြည်ခရိုင်၊ ပန်းတောင်းမြို့နယ်အတွင်း ပါဝင်သည်။ တောင်ကုတ်မြို့နှင့် ကုန်းလမ်းသွယ်ရေးရှိသည်။ တောင်ကုတ်မြို့ကို AAက တိုက်ခိုက်သိမ်းယူစဉ် စစ်ကောင်စီတပ်ဖွဲ့ဝင်များနှင့် ဌာနဆိုင်ရာရရှိများသည် တောင်ကုတ်-ဥသျှစ်ပင်လမ်းမှတဆင့် ထွက်ပြေးခဲ့ကြသည်။ ဥသျှစ်ပင်တွင် စစ်ကောင်စီ၏ ကာကွယ်ရေးပစ္စည်းစက်ရုံ(ကပစ) ရှိသည်။
ဥသျှစ်ပင်မြို့ရှိ စစ်ကောင်စီဝန်ထမ်းများမှာ AA က အမ်းမြို့ကိုရလုနီးအချိန်တွင် ပြည်မြို့ဘက်သို့ ကြိုတင် တိမ်းရှောင်သွားကြကြောင်း ဒေသခံအချို့ကပြောသည်။
လက်ရှိတိုက်ပွဲအတွင်း စစ်ကောင်စီက ဥသျှစ်ပင်မြို့အနီး စွပ်ပျက်ရွာ၊ မိုက်ကရိုရွာ၊ သပြေရွာတို့ကို လေကြောင်းမှဗုံးကြဲတိုက်ခိုက်မှုများ ပြုလုပ်နေကြောင်း သတင်းရရှိသည်။ လေကြောင်းတိုက်ခိုက်မှုအတွင်း အရပ်သားထိခိုက်သေဆုံးမှုရှိသော်လည်း အသေးစိတ်မသိရှိရသေးကြောင်း AA ၏မဟာမိတ်တော်လှန်ရေးတပ်ဖွဲ့နှင့် နီးစပ်သူတစ်ဦးကပြောသည်။
