ကျော်ဇော/People’s Spring
ပဲခူးတိုင်း၊ ရေတာရှည်မြို့နယ်တွင် စစ်ကောင်စီတပ်နှင့် တော်လှန်ရေးပူးပေါင်းတပ်ဖွဲ့များကြား နှစ်ရက်ဆက်တိုက်ပွဲဖြစ်ပွားခဲ့ရာ နှစ်ဘက်ထိခိုက်သေဆုံးမှုများရှိပြီး စစ်ရေးတင်းမာလျှက်ရှိကြောင်း တောင်ငူခရိုင်အခြေစိုက် ပုဝါနီစစ်ကြောင်းနှင့် နေပြည်တော် PDF တပ်ရင်း(၉၀၁)တို့ထံမှ သတင်းရရှိသည်။
နှစ်ဘက်တိုက်ပွဲများမှာ ဇန်နဝါရီလ ၂ ရက်နှင့် ၃ ရက်တွင် ရေတာရှည်မြို့နယ်၊ စစ်တောင်းမြစ်အရှေ့ဘက်ကမ်း ရေလွှဲကျေးရွာနှင့် ပိန္နဲပင်ကျေးရွာများအနီးဖြစ်ပွားခဲ့ပြီး တိုက်ပွဲအတွင်း ပုဝါနီစစ်ကြောင်းမှ ရဲဘော်ငါးဦး၊ နေပြည်တော် PDF တပ်ရင်း (၉၀၁)မှ ရဲဘော်သုံးဦး အသီးသီးကျဆုံးခဲ့ကြောင်း သက်ဆိုင်ရာတပ်ရင်းများက လူထုနွေဦးသို့ အတည်ပြုသည်။
“စစ်ကြောင်း သုံးကြောင်းကြား ပိတ်မိသွားတာ”ဟု ပုဝါနီစစ်ကြောင်းမှ တော်လှန်ရေးရဲဘော်တစ်ဦးက ပြောသည်။
Public Service Announcement
စစ်ကောင်စီတပ်သည် ရေလွှဲနှင့် ပိန္နဲပင်ကျေးရွာများဘက်သို့ အင်အားအများအပြားဖြင့် စစ်ကြောင်း သုံးကြောင်းခွဲဝင်ရောက်လာခြင်းဖြစ်ပြီး နှစ်ဘက်တိုက်ပွဲများတွင် စစ်ကောင်စီဘက်မှလည်း ထိခိုက်သေဆုံးမှုများရှိကြောင်း ပူးပေါင်းစစ်ဆင်ရေးတွင်ပါဝင်သည့် တော်လှန်ရေးတပ်ဖွဲ့များက ပြောသည်။
“စခလည်း ထိခိုက်မှုရှိတယ်။ အသေးစိတ်တော့ မသိရသေးဘူး။ လက်ရှိ ရန်သူ့ဘက်က အင်အားတွေ ထပ်ဖြည့်နေတယ်”ဟု နေပြည်တော် PDF တပ်ရင်း (၉၀၁)တပ်ရင်းမှူးက လူထုနွေဦးသို့ ပြောသည်။
ယနေ့(ဇန်နဝါရီ ၄ ရက်)နံနက်ပိုင်းအထိ ထိတွေ့တိုက်ပွဲများ ထပ်မံဖြစ်ပွားခြင်းမရှိသေးသော်လည်း စစ်ကောင်စီတပ်က တောင်ငူမြို့မှ စစ်ကြောင်းအချို့ကိုပါ အင်အားထပ်ဖြည့်၍ ရေနီရွာအရှေ့ဘက်နှင့် သက်ကျိန်းရွာအနီးဝန်းကျင်၌ ဆက်ရှိနေကြောင်း တော်လှန်ရေးတပ်ဖွဲ့များထံမှ စုံစမ်းသိရသည်။
တောင်ငူခရိုင်၊ ဖြူးမြို့နယ်၊ ဇေယျဝတီမြို့အရှေ့ဘက် နေပြည်တော်အမြန်လမ်းမကြီးနှင့် (၁၀)မိုင်ခန့်သာဝေးသည့်ကျေးရွာများ၌ ဒီဇင်ဘာ ၂၇ ရက်မှ ၃၁ ရက်အထိ နှစ်ဘက်တိုက်ပွဲများဖြစ်ပွားခဲ့ရာ စစ်ကောင်စီတပ်ဘက်မှ ၂၀ခန့်သေဆုံးပြီး တော်လှန် ရေးပူးပေါင်းတပ်များဘက်မှ ရဲဘော်တစ်ဦး ထိခိုက်ဒဏ်ရာရရှိခဲ့သည်။
