ဟန်နွေ/People’s Spring
ကရင်၊ မွန်၊ တနင်္သာရီနှင့် ပဲခူးဒေသများပါဝင်စုဖွဲ့ထားသည့် ပြည်သူ့ကာကွယ်ရေးတပ်မတော်(PDF) တောင်ပိုင်းစစ်ဒေသ၌ တပတ်အတွင်း ဖြစ်ပွားခဲ့သော တိုက်ပွဲများတွင် စစ်ကောင်စီတပ်ဖွဲ့ဝင် ၇၃ဦး သေဆုံးပြီး ၇၅ဦးထက်မနည်း ဒဏ်ရာရရှိခဲ့ကြောင်း တောင်ပိုင်းစစ်ဒေသက ယနေ့(ဒီဇင်ဘာ ၄ရက်) သတင်းထုတ်ပြန်သည်။
၂၀၂၄ ဒီဇင်ဘာ ၂၈ ရက်မှ ၂၀၂၅ ဇန်နဝါရီ ၃ ရက်အထိ ၇ရက်တာအတွင်းစစ်ရေး အခြေအနေကို ဖော်ပြထားခြင်းဖြစ်သည်။
အဆိုပါကာလအတွင်း တောင်ပိုင်းစစ်ဒေသ၊ ပြည်သူ့ကာကွယ်ရေးတပ်မတော်(PDF)ပူးပေါင်းအဖွဲ့ နှင့် စစ်ကောင်စီတပ်တို့အကြား ထိတွေ့တိုက်ပွဲ ၁၄ ကြိမ်ဖြစ်ပွားခဲ့ပြီး စစ်ကောင်စီတပ် သေဆုံးထိခိုက်မှုများ ရှိခဲ့သည်ဟု အသိပေးထားသည်။
Public Service Announcement
တိုက်ပွဲဖြစ်စဉ် အချို့ကိုလည်း ဖော်ပြရာ မြဝတီ – ကော့ကရိတ် အာရှလမ်းမကြီးအား ပြန်လည်စိုးမိုးရန် အင်အားဖြည့်ရောက်ရှိလာသော အောင်ဇေယျစစ်ကြောင်းနှင့် ပြည်သူ့ကာကွယ်ရေးတပ်မတော် ဗျူဟာ ၃၂၊ ဗိုလ်ဒါဘောဦးဆောင်သော KNLA တပ်ရင်း (၂၈) ပူးပေါင်းစစ်ကြောင်းတို့ နေ့စဉ်နီးပါးထိတွေ့မှုဖြစ်ပွားနေပြီး စစ်ကောင်စီဘက်က အထိနာနေကြောင်း ဖော်ပြသည်။
ထို့အပြင် တော်လှန်ရေးပူးပေါင်းအဖွဲ့က ရိက္ခာနှင့် စစ်ကူလမ်းကြောင်းဖြတ်တောက်ထားသည့် အနန်းကွင်းဗျူဟာစခန်းသို့ ဝင်ရောက်ရန်ကြိုးပမ်းနေသော စစ်ကောင်စီ၏တပ်ကူ သံတွဲစစ်ကြောင်းအားလည်း ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ အထူးစစ်ဆင်ရေးတပ်ဖွဲ့(SOF)၊ နဂါးနီစစ်ကြောင်း၊ KNLA တပ်ရင်းများနှင့် ရောင်နီဒရုန်းအထူးတပ်ဖွဲ့၊ Dawna Dragon၊ Cloud Wings ဒရုန်း ပူးပေါင်းအဖွဲ့တို့က ကြားဖြတ်၍တားဆီးပိတ်ဆို့ တိုက်ခိုက်ခဲ့သည်ဟုဆိုသည်။
အဆိုပါ အနန်းကွင်းလာသည့် စစ်ကောင်စီတပ်သားများ ထိခိုက်ကျဆုံးမှုများပြားသဖြင့် စစ်ကောင်စီတပ်က လေယာဉ်၊ လက်နက်ကြီးများဖြင့် အပြင်းအထန်စစ်ကူပေးလျက်ရှိရာ တော်လှန်ရေးပူးပေါင်းတပ်ဖွဲ့များဘက်က ရဲဘော် သုံးဦးကျဆုံးကာ ၁၅ဦး ဒဏ်ရာရခဲ့သည်ဟု အသိပေးသည်။
အနန်းကွင်းဗျူဟာကို စစ်ကောင်စီက အင်အား ၁၅၀ ခန့် စစ်ကူလာရာ တော်လှန်ရေးပူးပေါင်းတပ်က ဒီဇင်ဘာ ၃၀ရက်နှင့် ၃၁ရက်တွင် အနန်းကွင်းဗျူဟာစခန်းနှင့် ၁မိုင်ခွဲခန့်အကွာ၌ ဖြတ်တောက် တိုက်ခိုက်ခဲ့ရာ စစ်ကောင်စီတပ်မှ ၂၀ကျော်သေဆုံးပြီး ၆၀ ကျော် ဒဏ်ရာရရှိခဲ့ကြောင်း ကရင်သတင်းရင်းမြစ်က အသိပေးသည်။ စစ်ကောင်စီတပ်မှ သေဆုံးထိခိုက်ရုပ်အလောင်းများကိုလည်း သတင်းရင်းမြစ်က ပြသသည်။
