စစ်ကောင်စီကိုတိုက်ခိုက်ရန် မွန်တပ်ဖွဲ့လေးခုပူးပေါင်းပြီး ရာမညပူးတွဲစစ်ကြောင်း ဖွဲ့စည်း

ဟန်နွေ/People’s Spring

မွန်ပြည်နယ်အနှံ့ရှိ စစ်ကောင်စီတပ်အားတိုက်ခိုက်ရန် မွန်တော်လှန်ရေးတပ်ဖွဲ့ ၄ခုပူးပေါင်းပြီး ရာမညပူးတွဲစစ်ကြောင်း ဖွဲ့စည်းလိုက်ကြောင်း အဆိုပါ စစ်ကြောင်းပြောရေးဆိုခွင့်ရှိသူ ဒေါက်တာသီရိမွန်ချမ်းက ပြောသည်။

ဇန်နဝါရီ ၁၇ရက်က မွန်ပြည်လွတ်မြောက်ရေးတပ်တော်(MLA)၊ မွန်အမျိုးသားလွတ်မြောက်ရေးတပ်မတော်(MNLA-AD)၊ မွန်ပြည်ကာကွယ်ရေးတပ်(MSDF)နှင့် မွန်ပြည်တော်လှန်ရေးတပ်(MSRF) တို့ လွတ်မြောက်နယ်တစ်နေရာတွင် အစည်းအဝေးပြုလုပ်ကာ တပ်ဖွဲ့ (၄)ဖွဲ့၏ ပူးတွဲစစ်ဆင်ရေးလုပ်ငန်းများအတွက် ‘ရာမညပူးတွဲစစ်ကြောင်း’ဟု ဖွဲ့စည်းလိုက်ခြင်းဖြစ်သည်ဟု မွန်တပ် ၄ဖွဲ့က ယနေ့ (ဇန်နဝါရီ ၁၉ရက်)ပူးတွဲ ထုတ်ပြန်သည်။

“ဒီပူးပေါင်းဖွဲ့စည်းထားတဲ့ ရာမညစစ်ကြောင်းကနေ စစ်ရေးလှုပ်ရှားမှုတွေ မွန်ပြည်နယ်အနှံ့ ပြုလုပ်သွားဖို့ စစ်ရေးဆိုင်ရာ စီမံချက်တွေချထားတာလည်းရှိပါ”ဟု ရာမညပူးတွဲစစ်ကြောင်း ပြောရေးဆိုခွင့်ရှိသူ ဒေါက်တာသီရိမွန်ချမ်းက ပြောသည်။

Public Service Announcement

ရာမညပူးတွဲစစ်ကြောင်းအနေဖြင့် အခြား တော်လှန်ရေးတပ်များဖြစ်သည့် ကရင်အမျိုးသားလွတ်မြောက်ရေးတပ်မတော်(KNLA)၊ PDFတပ်ဖွဲ့များနှင့်ပူးတွဲ တိုက်ပွဲဝင်သွားမည်ဟု ၎င်းက အသိပေးသည်။

စစ်ကောင်စီတပ်ကို တော်လှန်တိုက်ခိုက်မှုတွင် မပါဝင်သေးသော ဝါရင့်မွန်တော်လှန်ရေးလက်နက်ကိုင်တပ်ဖွဲ့ မွန်ပြည်သစ်ပါတီ(NMSP) ခေါင်းဆောင်များအနေဖြင့်လည်း လက်ရှိ အချိန်တွင် စစ်ကောင်စီနှင့်တွေ့ဆုံဆွေးနွေးရေး လမ်းကြောင်းကို စွန့်လွှတ်သင့်ကြောင်း ဒေါက်တာသီရိမွန်ချမ်းက တိုက်တွန်းသည်။

“အခုအချိန်မှာ တွေ့ဆုံဆွေးနွေးရေးဆိုတဲ့ လမ်းကြောင်းကို စွန့်လွှတ်ပြီးတော့ လက်နက်ကိုင် တော်လှန်ရေးနဲ့ မွန်လက်နက်ကိုင်တပ်တွေအပါအဝင် အခြားတိုင်းရင်းသားတော်လှန်ရေးအဖွဲ့အစည်းတွေနဲ့လက်တွဲပြီးတော့ နွေဦးတော်လှန်ရေး အမျိုးသားလွတ်မြောက်ရေးတိုက်ပွဲမှာ တက်တက်ကြွကြွပါဝင်ကြဖို့ မိမိတို့အနေနဲ့ တိုက်တွန်းချင်ပါတယ်”ဟု ဒေါက်တာသီရီမွန်ချမ်းက ပြောသည်။

ရာမညပူးတွဲစစ်ကြောင်းတွင်ပါဝင်သည့် မွန်ပြည်ကာကွယ်ရေးတပ် အနေဖြင့်လည်း စစ်အာဏာရှင် အမြစ်ပြတ်ချေမှုန်းနိုင်ရေးအတွက် တိုက်ပွဲဝင်ရန် ရဲဘော်သစ်များ လက်ခံကြိုဆိုနေကြောင်း ဇန်နဝါရီ ၁၉ရက်တွင် ထုတ်ပြန်ခဲ့သည်။

“မပြီးပြတ်သေးတဲ့ နွေဦးတော်လှန်ရေး အဆုံးသတ် တိုက်ပွဲမှာ လူငယ်တွေ တပ်သားသစ် အဖြစ် ပါဝင်လာဖို့ မိမိတို့ မွန်ပြည်ကာကွယ်ရေးတပ် MSDFမှ ဖိတ်ခေါ်တာပါ။ ယခုအချိန်မှာ မွန်ပြည်နယ် တချို့ဒေသတွေမှာ တိုက်ပွဲတွေ အဆက်မပြတ် ပြင်းထန်လာတယ်။ ဒါ့အပြင် မွန်ပြည်နယ်အနှံ့မြှင့်တင်လာမယ့် စစ်ရေးလှုပ်ရှားမှုတွေမှာ လူငယ်လူရွယ်တွေ တက်တက် ကြွကြွ ပါဝင်လာဖို့ ဖိတ်ခေါ်ခြင်းလည်းဖြစ် တယ်”ဟု MSDF တပ်မှူးလည်းဖြစ်သည့် ဒေါက်တာသီရိမွန်ချမ်းက ပြောသည်။

တပ်သားသစ်အဖြစ် ဖိတ်ခေါ်ရာတွင် မွန်တိုင်းရင်းသားများသာမဟုတ်ဘဲ မွန်၊ ကရင်၊ ပအိုဝ်းအပါအဝင် အခြားတိုင်းရင်းသားအားလုံးကို ဖိတ်ခေါ်ကြောင်း၊ လက်ရှိ MSDFတပ်ဖွဲ့တွင် မွန်ပြည်နယ်သူ ပြည်နယ်သားများအပြင် ရန်ကုန်၊ မန္တလေး အပါအဝင် အခြားတိုင်းနှင့်ပြည်နယ်များမှ လူငယ်များလည်း တာဝန်ထမ်းဆောင်နေမှုများ ရှိနေကြောင်း ဒေါက်တာသီရိမွန်ချမ်းက အသိပေးသည်။

MSDFအပါအဝင် နွေဦးတော်လှန်ရေး၌ ပေါ်ပေါက်လာသည့် မွန်လက်နက်ကိုင်တပ်ဖွဲ့များသည် KNLA၊ PDF အပါအဝင် တော်လှန်ရေးတပ်များနှင့်လက်တွဲပြီး စစ်ကောင်စီကို တိုက်ခိုက်လျက်ရှိသည်။