ကျော်ဇော/People’s Spring
ပဲခူးတိုင်း၊ နတ်တလင်းမြို့နယ်၊ ပဲခူးရိုးမအနီးရှိ ဆီဆုံကုန်းကျေးရွာသို့ စစ်ကောင်စီတပ်များဝင်ရောက်တပ်စွဲပြီး ပြည်သူအချို့ကို ပစ်ခတ်သတ်ဖြတ်ခဲ့ကြောင်း ဒေသအခြေစိုက် နတ်စစ်သည်တပ်ဖွဲ့မှ တာဝန်ရှိသူတစ်ဦးက လူထုနွေဦးသို့ ပြောသည်။
ဇန်နဝါရီ ၁၅ ရက်ကစပြီး ဆီဆုံကုန်းကျေးရွာသို့ စစ်ကြောင်းထိုးဝင်ရောက်လာသော စစ်ကောင်စီတပ်သည် ကျေးရွာအတွင်းကျန်ရှိနေသည့် ပြည်သူ ၁၀ဦးကျော်ကို ဖမ်းဆီးနှိပ်စက်ကာ လေးဦးထက်မနည်းအား ကြိုးတုပ်ပစ်ခတ်သတ်ဖြတ်လိုက်ခြင်းဟု ၎င်းက ပြောသည်။
“ဆီဆုံကုန်းက အတိကျသိရတာတော့ လေးယောက်ပါ။ ကျွန်တော်တို့ကဘဘန့်ဘွေးကုန်းရွာဘက်မှာ စစ်ဆိုင်ထားလို့။ လေးငါးဆယ်ဦးလောက် အသတ်ခံရတယ်လို့တော့ ကြားမိတယ်။ အတိအကျ မသိရသေးဘူး။ စကစတွေ အခုထိ ရွာထဲရှိနေတုန်းပဲ”ဟု နတ်စစ်သည်တပ်ဖွဲ့မှ တာဝန်ရှိသူက ပြောသည်။
Public Service Announcement
ဆီဆုံကုန်းကျေးရွာတွင် အိမ်ခြေ ၃၀၀ ခန့်ရှိပြီး ဒေသခံအများစုမှာ စစ်ကောင်စီတပ်၏ ရန်ကြောင့် အစောပိုင်းကတည်းက ဘေးလွတ်ရာရှောင်တိမ်းနေကြရပြီး ယခုဖမ်းဆီးသတ်ဖြတ်ခံရသူများမှာ စစ်ဘေးရှာင်ရာမှ ကျေးရွာသို့ အစောင့်ပြန်လာသူများဖြစ်ကြောင့် ၎င်းက ဆက်ပြောသည်။
အလားတူ ဆီဆုံကုန်းရွာမှ ခြေလျင်သွားလျှင် နာရီဝက်ခရီးသာရှိသည့် အိမ်ခြေ ၂၀၀ ကျော်ရှိ ပဲခူးရိုးမအစပ်မှ ဘန့်ဘွေးကုန်းရွာတွင်လည်း စစ်ကောင်စီတပ်သားအချို့ရောက်ရှိနေပြီး ၎င်းတို့နှင့် တော်လှန်ရေးတပ်ဖွဲ့များကြား စစ်ဆိုင်ထားဆဲဖြစ်ကြောင်း နတ်စစ်သည်တပ်ဖွဲ့ထံမှ သိရသည်။
“နှစ်ရွာစလုံး ရွာသားတွေ စစ်ရှောင်နေရပါတယ်။ တောထဲမှာ သူ့အစုနဲ့သူ ဖြစ်သလိုနေနေရတာပါ”ဟု နတ်စစ်သည်တပ်ဖွဲ့တာဝန်ရှိသူက ဒေသခံပြည်သူများ၏ လက်ရှိအခြေ အနေကို ပြောသည်။
ပြီးခဲ့သည့် ၂၀၂၄ ဒီဇင်ဘာ ၂ ရက်ကလည်း ပျူစောထီးနှင့် စစ်ကောင်စီတပ်ပူးပေါင်းအင်အား ၁၀၀ ခန့်သည် နတ္တလင်းမြို့နယ်၊ ဒမငယ်ကျေးရွာဘက်မှ ဆီဆုံကုန်းကျေးရွာဘက်သို့လာရောက်စဥ် လက်နက်ကြီး၊ လက်နက်ငယ်များဖြင့် ပစ်ခတ်ခဲ့သေးသည်။
အဆိုပါ ပစ်ခတ်မှုတွင် ဆီဆုံကုန်းကျေးရွာပေါ်သို့ လက်နက်ကြီးကျည်များကျရောက် ပေါက်ကွဲခဲ့ရာ ဒေသခံအမျိုးသမီးတစ်ဦးသေဆုံးပြီး ကလေးငယ်အပါအဝင်ကိုးဦးခန့် ထိခိုက်ဒဏ်ရာများရခဲ့သည်။
