NUG ၏ ပြည်သူလူထုနှင့် နိုင်ငံတကာသို့သတင်းစကားပြောကြားမှု အစီအစဉ်ကို ဘာသာစကား ၄ မျိုးဖြင့် စမ်းသပ်ထုတ်လွှင့်

ဟန်နွေ/People’s Spring

အမျိုးသားညီညွတ်ရေးအစိုးရ(NUG)က နှစ် ပါတ်တကြိမ်ပြုလုပ်လျက်ရှိသော ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း အစီအစဉ်ကို တရုတ်၊ ဂျပန်၊ ထိုင်း နှင့် အိန္ဒိယဘာသာစကား ၄ မျိုးဖြင့်ပါ စမ်းသပ်ထုတ်လွှင့်​နေပြီဖြစ်ကြောင်း NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်ကပြောကြားသည်။

ယခုနှစ် ဇန်နဝါရီလဆန်းတွင် ပြုလုပ်သည့် သတင်းစကား ပြောကြားခြင်းအစီအစဉ် ၁/၂၀၂၅ မှစ၍ ဂျပန်နှင့် တရုတ် ဘာသာစကား ဖြင့် စမ်းသပ်ထုတ်လွှင့်ခဲ့သည်။ထို့အပြင် ဇန်ဝါရီ ၂၁ ရက် က ပြုလုပ်သည့် ၂/၂၀၂၅ သတင်းစကား ပြောကြားခြင်း အစီအစဉ်တွင် ထိုင်းနှင့် အိန္ဒိယ(Hindi) ဘာသာစကားတို့ကို တိုးချဲ့ထုတ်လွှင့်ခဲ့ခြင်းဖြစ်သည်ဟု အသိပေးသည်။

“ပထမအဆင့်အနေနဲ့တော့ အိမ်နီးချင်းနိုင်ငံတွေနဲ့ မြန်မာနိုင်ငံရဲ့နိုင်ငံရေးအပေါ်မှာ သက်ရောက်မှုကြီးတဲ့ နိုင်ငံတွေရဲ့ ဘာသာစကားကို ဦးစားပေး ဖြစ်ပါတယ်ဗျ။ နောက်ပြီး အခု လုပ်ငန်းစဉ်က AI ရဲ့ အကူအညီကို ယူသလို လူပုဂ္ဂိုလ်တွေကိုယ်တိုင်ကလည်း စိစစ်တည်းဖြတ်ရတာဖြစ်လို့ ကူညီဆောင်ရွက်မည့် အဖွဲ့အစည်းတွေရဲ့ လက်လှမ်းမီမှုအပေါ်မှာလည်း ချိန်ညှိရပါသေးတယ်။”ဟုလည်း ဦးနေဘုန်းလတ်က ပြောသည်။

Public Service Announcement

စမ်းသပ်ထုတ်လွှင့်မှုကို PVTV နှင့် Team New Myanmar(Japan) တို့ ပူးပေါင်းဆောင်ရွက်ခဲ့ခြင်းဖြစ်ပြီး လူ နှင့် AI(Artificial Intelligence) ပေါင်းစပ်ဖန်တီးထားခြင်းဖြစ်၍ ချို့ယွင်းအားနည်းချက်များရှိပါကထောက်ပြဝေဖန်ပေးခြင်းဖြင့် ကူညီပေးရန်လည်း PVTV ကတဆင့် မေတ္တာရပ်ခံထားသည်။

စမ်းသပ်ထုတ်လွှင့်မှုတွင် အသံထွက်ကို ဘာသာစကား ၄ မျိုးဖြင့် ထုတ်လွှင့်ပြီး ၊အဂ်လိပ်ဘာသာဖြင့်စာတမ်းထိုးသည်ကို​တွေ့ရသည်။

ထိုသို့ စမ်းသပ်ထုတ်လွှင့်မှုများကို NUG သတင်းပြန်ကြားရေးဌာန PVTV ဖေ့စ်ဘွတ်ခ်စာမျက်နှာနှင့် Youtube မှတဆင့် ပြန်လည်ဖော်ပြပေးလျက်ရှိသည်။

အမျိုးသားညီညွတ်ရေးအစိုးရ အနေဖြင့် နိုင်ငံအတွင်း စစ်ရေး၊ နိုင်ငံရေး အခြေအနေများနှင့်ပတ်သက်ပြီး သတင်းစကား ပြောကြားမှုကို သမ္မတရုံး ပြောရေးဆိုခွင့်ရှိသူ ဦးကျော်ဇော နှင့် ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်တို့က ပုံမှန်ရှင်းလင်း အသိပေး ပြောကြားလျက်ရှိသည်။