■အတွင်းရေးမှူးအဖြစ် NUG ကာကွယ်ရေးဝန်ကြီးတာဝန်ယူ
■စစ်ရေးအစီအမံတွေအကောင်အထည်ဖော်ရာမှာ SCEF အဖွဲ့ဝင်တွေသာမက မဟာမိတ်တွေနဲ့ ပူးပေါင်းလုပ်ကိုင်မယ်
ဩဂုတ်-၁၀၊၂၀၂၆။ထားမြတ်/People’s Spring
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF) ရဲ့ စစ်မဟာဗျူဟာပေါင်းစပ်ညှိနှိုင်းကွပ်ကဲရေး ကော်မတီရဲ့ ပူးတွဲဥက္ကဋ္ဌတွေအဖြစ် ကရင်အမျိုးသားအစည်းအရုံး(KNU/KNLA) စစ်ဦးစီးချုပ် ဒုဗိုလ်ချုပ်ကြီးဘောကျော်ဟဲနဲ့ ကချင်လွတ်လပ်ရေးအဖွဲ့(KIO/KIA) စစ်ဦးစီးချုပ် ဒုဗိုလ်ချုပ်ကြီးအောင်ဆိုင်းလာ တို့ တာဝန်ယူထားတယ်လို့ SCEF ပြောရေးဆိုခွင့်ရှိသူတဦးဖြစ်တဲ့ ဆလိုင်းထက်နီက ပြောပါတယ်။
Public Service Announcement
SCEF ရဲ့မဟာဗျူဟာနဲ့ မူဝါဒရေးရာဦးဆောင်အဖွဲ့ ၊ စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီတို့က သြဂုတ် ၇ ရက်မှာ ပူးတွဲအစည်းအဝေးပြုလုပ်ပြီးစစ်မဟာဗျူဟာပေါင်းစပ်ညှိနှိုင်းကွပ်ကဲရေး ကော်မတီပူးတွဲ ဥက္ကဋ္ဌ ၂ဦး၊ အတွင်းရေးမှူး ၁ဦး နဲ့တွဲဖက်အတွင်းရေးမှူး ၂ဦးတို့ ရွေးချယ်တာဝန်ပေးအပ်ခဲ့ကြောင်းဩဂုတ် ၈ရက်မှာ SCEFကထုတ်ပြန်ခဲ့ပါတယ်။
ဒါ့အပြင် ရှေ့ဆက်လက်လုပ်ဆောင်မယ့် လုပ်ငန်းစဉ်တွေနဲ့ မဟာဗျူဟာမြောက် ပန်းတိုင်များကို ပေါင်းစပ်ညှိနှိုင်းပြီးတော့ ထိရောက်စွာ အကောင်အထည်ဖော်ဖို့အတွက်လည်း သဘောတူခဲ့ကြတယ်လို့ SCEFက ထုတ်ပြန်ပါတယ်။စစ်မဟာဗျူဟာပေါင်းစပ်ညှိနှိုင်းကွပ်ကဲရေး ကော်မတီရဲ့ ထိပ်တန်းတာဝန်ရှိသူတွေကို တာဝန်ပေးအပ်တဲ့အခြေအနေနဲ့ပတ်သက်ပြီး မေးမြန်းရာမှာ ဆလိုင်းထက်နီ အခုလို ရှင်းပြပေးတာပါ။
“SCEF ရဲ့ စစ်မဟာဗျူဟာ ပေါင်းစပ်ညှိနှိုင်းရေးကော်မတီကိုကျနော်တို့ အစုအဖွဲ့ အသီးသီးကနေ စေလွှတ်တဲ့ စစ်ဘက်ဆိုင်ရာ တာဝန်ရှိ ထိပ်တန်းပုဂ္ဂိုလ်တွေကိုကော်မတီအနေနဲ့ ကျနော်တို့ ဖွဲ့ထားတာ။ အဲဒီမှာ လုပ်ငန်းစဉ် ဆက်သွားဖို့ ဆိုပြီးတော့မှ ကျနော်တို့ ပူးတွဲဥက္ကဋ္ဌ နှစ်ဦးရယ် ပြီးတော့ အတွင်းရေးမှူးနဲ့ တွဲဖက်အတွင်းရေးမှူးဆိုပြီးတော့မှ နောက်ပြီးတော့မှ ကျန်တဲ့ အဖွဲ့ဝင်တွေကို လုပ်ငန်းခွဲပြီးတော့ဖွဲ့ထားတာမျိုးပေါ့။ပူးတွဲဥက္ကဋ္ဌကို KIOနဲ့ KNUနဲ့ စေလွှတ်ထားတဲ့ထိပ်ပိုင်းပုဂ္ဂိုလ်တွေပေါ့။အတွင်းရေးမှူးကတော့NUGကကာကွယ်ရေးဝန်ကြီး စသဖြင့် ပြီးတော့တွဲဖက်ကိုတော့ CNF ဘက်က တာဝန်ရှိ ပုဂ္ဂိုလ်တွေပေါ့နော်” လို့ ဆလိုင်းထက်နီက ပြောပါတယ်။
SCEF အဖွဲ့ဝင်တွေကတော့ KNU၊ KIO၊ KNPP၊ CNF၊ NUGနဲ့ CRPH တို့ ဖြစ်ကြပြီး တပ်ဖွဲ့စည်းမှုမရှိတဲ့ CRPHက စစ်ရေးပိုင်းစုဖွဲ့မှုမှာ ပါဝင်ခြင်းမရှိဘဲ ကျန်တပ်တွေက စစ်ရေးခေါင်းဆောင်တွေဟာ စစ်မဟာဗျူဟာပေါင်းစပ်ညှိနှိုင်းကွပ်ကဲရေး ကော်မတီမှာ ပါဝင်ကြတာဖြစ်ပါတယ်။
“အဓိကကတော့ စစ်ရေးမှာသူတို့က တာဝန်အရှိဆုံးပုဂ္ဂိုလ်တွေပေါ့။ သူတို့ရဲ့ အထက်မှာ မူဝါဒအရ ဂိုက်လိုင်းပေးမယ့် ဘော်ဒီကတော့ ၇ ဦး ကောင်စီဝင်တွေပေါ့နော်။ မဟာဗျူဟာနဲ့ မူဝါဒရေးရာ ဦးဆောင်အဖွဲ့ပါ”လို့ ဆလိုင်းထက်နီက ရှင်းပြပါတယ်။
မဟာဗျူဟာနဲ့ မူဝါဒရေးရာ ဦးဆောင်အဖွဲ့ကို NUG ယာယီသမ္မတ၊ပြည်ထောင်စုဝန်ကြီးချုပ်၊ CRPHဥက္ကဋ္ဌ နဲ့ KNU၊ KNPP၊ KIO၊ CNF အဖွဲ့တွေကဥက္ကဋ္ဌတွေပါဝင်ဖွဲ့စည်းထားတာပါ။
စစ်ရေးဖော်ဆောင်ရာမှာစစ်တိုင်းနယ်မြေတွေ သတ်မှတ်ပြီးစစ်ဒေသအလိုက်လက်တွေ့ကျကျ ဟန်ချက်ညီညီ အလုပ်လုပ်ဆောင်နိုင်ရေး ကိုင်တွယ်သွားဖို့ရှိတယ်လို့ ပြောပါတယ်။
“အဲဒီမှာစစ်တိုင်းနယ်မြေဆိုတာအဲဒီလို ခွဲထားကြတာ။ဒါပေမဲ့အကောင်အထည်ဖော်တဲ့နေရာမှာ One Policy, One Strategy နဲ့ အကောင်အထည်ဖော်ရမှာပေါ့။”လို့ ဆလိုင်းထက်နီက မူဝါဒတခုတည်း မဟာဗျူဟာတခုတည်းနဲ့ စစ်ရေးဖော်ဆောင်သွားမယ်ဆိုတာကိုရှင်းပြပါတယ်။
အဲဒီလို စစ်ရေးအစီအမံတွေလုပ်ဆောင်ရာမှာ SCEF အဖွဲ့ဝင်တွေသာမက မဟာမိတ်တွေနဲ့ ပူးပေါင်းလုပ်ဆောင်မယ်လို့လည်း အသိပေးပါတယ်။
“ကျနော်တို့ကတော့သူ့နယ်မြေ၊ကိုယ့်နယ်မြေရှိပေမယ့်နွေဦးတော်လှန်ရေးမိတ်ဖက်အဖွဲ့အစည်းတွေနဲ့ ပူးတွဲပြီးလုပ်သွားဖို့ရှိပါတယ်။”လို့ ဆလိုင်းထက်နီက ပြောပါတယ်။
အခုစစ်ရေးစုဖွဲ့မှုတွေဟာ အနာဂါတ်မှာဖက်ဒရယ်တပ်မတော်ဖွဲ့စည်းရေးရဲ့အခြေခံဖြစ်လာဖို့အထိ့ရည်ရွယ်သလို ၊မျှော်လည်းမျှော်လင့်ကြောင်း တော်လှန်ရေးရဲဘော်အချို့ကလည်းပြောပါတယ်။
SCEF အဖွဲ့ဝင်NUGရဲ့ကာကွယ်ရေးဝန်ကြီးဌာနအောက်ရှိ ပြည်သူ့ကာကွယ်ရေးတပ်မတော်(PDF)တပ်မှူးတွေအနေနဲ့လည်းဩဂုတ်လပထမပတ်မှာ တပ်မှူးကြီးများအစည်းအဝေးကို ၄ ရက်တာ ကျင်းပခဲ့ပါတယ်။ အဲဒီတပ်မှူးကြီးများအစည်းအဝေးမှာရှေ့လုပ်ငန်းစဉ်တွေကိုချမှတ်ခဲ့ရာ SCEF စစ်မဟာဗျူဟာ ပေါင်းစပ်ညှိနှိုင်းကွပ်ကဲရေးကော်မတီမှာ မဟာဗျူဟာ ကျကျ ပါဝင်ဆောင်ရွက်နိုင်ရေးနဲ့စစ်ဒေသအသီးသီးမှာသက်ဆိုင်ရာ မဟာမိတ် တိုင်းရင်းသား တော်လှန်ရေးအင်အားစုများအားလုံးနဲ့ လက်တွဲပြီး ပြည်သူ့ခုခံတွန်းလှန်စစ်မှသည် မဟာဗျူဟာ ထိုးစစ် သို့ တက်လှမ်းနိုင်ရေး လုပ်ဆောင်သွားဖို့ ချမှတ်ခဲ့ကြောင်း ပြည်သူ့ကာကွယ်ရေးတပ်မတော်က အသိပေးထုတ်ပြန်ပါတယ်။
အဲဒီလို PDFတပ်မှူးကြီးတွေရဲ့အစည်းအဝေးအပြီးမှာပဲ PDF ရဲ့တိုင်းစစ်ဌာန အချို့ကလည်း ဒေသတွင်းတပ်မှူးတပ်ရင်းမှူးတွေ ပါဝင်တဲ့အစည်းအဝေး ပြုလုပ်ခဲ့တာမျိုးရှိပါတယ်။ ပဲခူးတိုင်းစစ်ဌာနရဲ့ကွပ်ကဲရေးမှူး၊ စစ်ဆင်ရေးမှူး၊ ဗျူဟာမှူးများနဲ့ တပ်ရင်းမှူးများ ပါဝင်တဲ့ အစည်းအဝေးကို ကျင်းပခဲ့တယ်လို့ ပဲခူးတိုင်းစစ်ဌာနက ထုတ်ပြန်ထားပါတယ်။
အဲဒီအစည်းအဝေးမှာကွပ်ကဲရေးမှူးနဲ့စစ်ဆင်ရေးမှူးတို့ထံ သက်ဆိုင်ရာ ဗျူဟာမှူးများနဲ့ တပ်ရင်းမှူးများကထိန်းချုပ်နယ်မြေအတွင်းရှိ စစ်ရေးဆိုင်ရာ ဖြစ်ပေါ်တိုးတက်မှု အခြေအနေကိစ္စရပ်များကို အစီရင်ခံခဲ့သလို စစ်ဘက်ဆိုင်ရာခေါင်းဆောင်များက ရှေ့ဆက်လက်ဆောင်ရွက်မည့် စစ်ရေးလုပ်ငန်းစဉ်များနဲ့ စစ်ဆင်ရေးဆိုင်ရာ လိုအပ်ချက်များကို အသေးစိတ် ဆွေးနွေးခဲ့ကြောင်း ထုတ်ပြန်ထားပါတယ်။
ဒါ့အပြင် တစ်မျိုးသားလုံးဟာ ကိုယ့်ကံကြမ္မာကို ကိုယ်တိုင် ဆုံးဖြတ်ပိုင်ခွင့်ရရှိဖို့ ဖက်ဒရယ် ဒီမိုကရေစီပြည်ထောင်စု ပေါ်ထွန်းရေးဦးဆောင် – SCEF ဆိုတဲ့ ပေါင်းစည်းရေးမှာ နိုင်ငံရေး၊ စစ်ရေး တွေကို မရပ်မနားပူးပေါင်းကြိုးစားရဖို့အပြင် တိုင်းသူပြည်သားအားလုံး နဲ့ ကချင်ပြည်သူတွေအားလုံး သံသယစိတ်မရှိဘဲ ထောက်ခံအားပေးဖို့ အထူးတိုက်တွန်းလိုတယ်လို့ ပြောကြားပါတယ်။
တိုင်းရင်းသားလူမျိုးတွေ ကိုယ်စီဟာ ကိုယ့်ကံကြမ္မာကိုယ်ဆုံးဖြတ်နိုင်ခွင့် ရရှိရေးအတွက် ဖက်ဒရယ် ဒီမိုကရေစီပြည်ထောင်စု ပေါ်ထွန်းရေး ဦးဆောင်ကောင်စီ – SCEF ဆိုတဲ့ ပေါင်းစည်းမှုအောက်မှာ စစ်ရေး၊ နိုင်ငံရေးကို မရပ်မနား လုပ်ဆောင်နေတာကြောင့်တိုင်းသူပြည်သားအားလုံး နဲ့ ကချင်ပြည်သူတွေအားလုံး သံသယစိတ်မရှိဘဲ ထောက်ခံအားပေးဖို့အထူးတိုက်တွန်းလိုတယ်လို့ကချင်အမျိုးသားအာဇာနည်နေ့မှာ KIA ဥက္ကဌ ဗိုလ်ချုပ်ကြီးအင်ဘန်လကလည်းတိုက်တွန်းပြောကြားပါတယ်။
ကာလရှည်ကြာ လက်နက်ကိုင်တော်လှန်နေတဲ့ တော်လှန်ရေးအဖွဲ့အစည်းတွေ၊ NUG၊ CRPH တို့နဲ့ လက်တွဲပြီးတော့ ကမ္ဘာ့နိုင်ငံရေးစင်မြင့်ထက်မှာ ထင်ပေါ်လာနိုင်ရန်အတွက် SCEF နဲ့ အတူကြိုးပမ်းနေတာဖြစ်တယ်လို့ လည်းဆက်လက်ပြောခဲ့ပါတယ် ။ပြည်သူလူထုကို အခြေခံပြီး မိမိဒေသကို လွတ်လပ်စွာကိုယ်တိုင်စီမံအုပ်ချုပ်နိုင်ဖို့အတွက် တူညီတဲ့ပန်းတိုင်တစ်ခုတည်း ဆုပ်ကိုင်ပြီး နိုင်ငံတကာအဖွဲ့အစည်းတွေရဲ့ ထောက်ခံမှုရရှိအောင် SCEF လုပ်ဆောင်နေတယ်လို့လည်းပြောပါတယ်။
SCEF ကိုဖွဲ့စည်းနိုင်ဖို့ ၂၀၂၂ ခုနှစ်ကတည်းက တော်လှန်ရေးအင်အားစုတွေကြယုံကြည်မှုတည်ဆောက်ပြီး ခက်ခက်ခဲခဲကြိုးပမ်းခဲ့ရတာဖြစ်တယ်လို့လည်း တာဝန်ရှိသူတွေကပြောထားပါတယ် ။ အဖွဲ့ဝင်တွေ ဆက်လက်တိုးချဲ့ဖွဲ့စည်းရေးအတွက်လည်း တော်လှန်ရေးအဖွဲ့တွေနဲ့ ဆက်တိုက်တွေ့ဆုံကြိုးစားနေတယ်လို့ သတင်းရရှိပါတယ် ။
