သြဂုတ် ၁၁၊၂၀၂၆။ ထားမြတ်/People’s Spring
ကချင်ပြည်နယ်က မြစ်ဆုံရေကာတာစီမံကိန်း လုပ်လုပ်ဆောင်ဖို့ ကြိုးပမ်းနေတဲ့အာဏာသိမ်းစစ်အုပ်စုက လူထုစည်းရုံးလှုံ့ဆော်မှုတွေကို ကြိမ်ပေါင်းများစွာပြုလုပ်ဖို့ စီစဉ်ထားတာဖြစ်လို့ ပြည်သူတွေအနေနဲ့ အဲဒီလုပ်ငန်းတွေမှာပါဝင်ခြင်းမပြုဖို့ ကချင်လူအခွင့်အရေးစောင့်ကြည့်အဖွဲ့ (KHRW)က ဒီကနေ့သြဂုတ်၁၁ရက်မှာပြည်သူသို့ မေတ္တာရပ်ခံချက် ထုတ်ပြန်ခဲ့ပါတယ်။
အာဏာသိမ်းစစ်ခေါင်းဆောင် မင်းအောင်လှိုင်နဲ့ ကချင်ပြည်နယ်ဝန်ကြီးချုပ် ဦးခက်ထိန်နန်တို့ဟာ ၂၀၂၆ ဇွန်လအတွင်း တရုတ်နိုင်ငံ သွားရောက်ခဲ့တဲ့ ခရီးစဉ်က ပြန်လည်ရောက်ရှိလာပြီးနောက် မြစ်ဆုံရေကာတာစီမံကိန်းကို ပြန်လည်အကောင်အထည်ဖော်နိုင်ရန် ပိုမိုကြိုးပမ်းဆောင်ရွက်လာသည်ကို တွေ့ရှိရတယ်လို့ ဖော်ပြထားပါတယ်
အဲဒီနောက်ပိုင်းမှာ စစ်အုပ်စုဟာ မြစ်ဆုံရေကာတာစီမံကိန်း ပြန်လည်စတင်နိုင်ရေးကို ရည်ရွယ်ကာ ပြည်သူလူထုအား စည်းရုံးလှုံ့ဆော်မှုများကို ဆက်တိုက်လုပ်ဆောင်လာလျက်ရှိတယ်လို့ အသိပေးပါတယ်
Public Service Announcement
”ဒီမြစ်ဆုံ ရေကာတာစီမံကိန်းက ကျနော်တို့ကချင်ပြည်နယ်သာမက တနိုင်ငံလုံးမှာရှိတဲ့မိဘပြည်သူတွေအတွက် အထူးသတိပြုရမယ့်စီမံကိန်း ဟုတ်တဲ့ အတွက်ကြောင့် မို့လို့ ကျနော်တို့ဒီစာထုတ်ပြန်ရခြင်းဖြစ်ပါတယ်” KHRW ပြောရေးဆိုခွင့်ရှိသူ ကိုဂျေးကော့က ပြည်သူသို့မေတ္တာရပ်ခံချက် ထုတ်ပြန်ရတဲ့အပေါ် ရှင်းပြပါတယ်။
စစ်အုပ်စုဟာ မြစ်ဆုံရေကာတာစီမံကိန်း ပြန်လည်စတင်နိုင်ရေးအတွက် ပြည်သူလူထုအား စည်းရုံးလှုံ့ဆော်မှုများကို အကြိမ် (၅၀) ထက်မနည်း ပြန်လုပ်သွားရန် စီစဉ်ထားကြောင်း သိရှိရတယ်လို့KHRW က ဆိုပါတယ်။
ဒါ့အပြင် စစ်ကောင်စီ ဖွဲ့စည်းထားတဲ့ မြစ်ဆုံစီမံကိန်း အကောင်အထည်ဖော်ရေးကော်မတီမှာ အဖွဲ့ဝင် (၁၀) ဦး ပါဝင်ပြီး၊ အဆိုပါကော်မတီဟာ ဇူလိုင်လအတွင်း ဘာသာရေးဆိုင်ရာ နေရာများကို အဓိကပစ်မှတ်ထား၍ အနည်းဆုံး (၅)ကြိမ် စည်းရုံးလှုံ့ဆော်ရေး အစည်းအဝေးများ ကျင်းပခဲ့ကြောင်း ဖော်ပြထားပါတယ်။
အဲဒါကြောင့် မြစ်ဆုံရေကာတာစီမံကိန်းနဲ့ သက်ဆိုင်သော စည်းရုံးလှုံ့ဆော်ရေး လုပ်ငန်းတွေမှာ ပါဝင်ဆောင်ရွက်ခြင်း မပြုကြဖို့ ပြည်သူလူထုအား လေးစားစွာဖြင့် မေတ္တာရပ်ခံ ကြောင်း KHRW ကာထုတ်ပြန်ခဲ့ပါတယ်။
