ဟန်နွေ/People’s Spring
ကချင်ပြည်နယ်၊ ဗန်းမော်မြို့သိမ်းတိုက်ပွဲတွင် အမှတ်(၂၁) စစ်ဆင်ရေးကွပ်ကဲမှုဌာနချုပ်(စကခ-၂၁)တပ်စခန်းနေရာအပါအဝင် မြို့ပေါ်ရှိ စစ်ကောင်စီ လက်ကျန်တပ်စခန်းများ၌ တိုက်ပွဲဆက်ဖြစ်နေကြောင်း ကချင်စစ်ရေး သတင်းရင်းမြစ်အချို့ကပြောသည်။
ဇန်နဝါရီ ၂၄ရက်တွင် KIA နှင့် ပူးပေါင်းတပ်များက မြို့ သိမ်း စစ်ဆင်ရေးအရှိန်မြှင့်တင်၍ တိုက်ခိုက်ခဲ့ရာ စစ်ကောင်စီတပ်ရင်းဌာနချုပ် တစ်ခု နှင့် သံချပ်ကာယာဉ် ၄စီးကို သိမ်းဆည်းနိုင်ခဲ့သည်ဟု စစ်ရေး သတင်းရင်းမြစ်က ပြောသည်။
“စကခ ၂၁ ဘက်တိုက်ပွဲဖြစ်နေတယ်။ ၇၀၀၆ (သံချပ်ကာတပ်ရင်း)က အပြီးမရသေး” ဟု စစ်ရေးသတင်းရင်းမြစ်တဦးက ပြောသည်။ ဇန်နဝါရီ ၂၄ ရက်နေ့က သိမ်းရသည့် စစ်ကောင်စီ တပ်ရင်းမှာ ဝန်တင်တပ်ရင်းဖြစ်သည်ဟု၎င်းကဆက် ပြောသည်။ အသေးစိတ်အခြေအနေကို People’s Spring ကဆက်လက်စုံစမ်းနေဆဲဖြစ်သည်။
Public Service Announcement
ကချင်စစ်ရေး၊နိုင်ငံရေးလေ့လာသူ ဦးဇော်ဆန်က “ဒီမနက် ၁၀နာရီ ဝန်းကျင်လောက်မှာ ဗန်းမော်မြို့ထဲကို ၈၅ရာခိုင်နှုန်းလောက် က အားလုံးနီးပါး KIAနဲ့ မဟာမိတ်တပ်ဖွဲ့က ရှင်းလင်းရေးတွေ လုပ်ဆောင်ထားနိုင်ပြီလို့ ကနဦး သိရှိထားပါတယ်။ ဗန်းမော်အနီးတဝိုက်မှာ ရှိတဲ့ စစ်ကောင်စီရဲ့ တပ်ရင်းတပ်ခွဲတွေအားလုံးနီးပါး အခုအချိန်မှာတော့ ကျနော်တို့ သိရှိရသလောက် စကခ(၂၁)နဲ့ ခလရ(၄၇) အဲဒီ တပ်စခန်း၂ခုထဲမှာ အားလုံးအဲဒီတပ်စခန်းထဲမှာပဲ စုပြုံနေကြတာ။စစ်ကောင်စီကတော့ အခုမြို့ထဲမှာ မရှိသလောက်ဆိုတော့ဒီနေ့ ညနေပိုင်း မနက်ဖြန် သန်ဘက်ခါဆိုရင်တော့ ဗန်းမော်မြို့ထဲကို စစ်ကောင်စီကရမ်းသန်းဗုံးကြဲတိုက်
ခိုက်မှု ပိုမိုလုပ်ဆောင်လာနိုင်တယ်လို့ အဲဒီလို သုံးသပ်မိပါတယ်” ဟု၎င်းကဆက်သည်။
ဇန်နဝါရီ ၂၅ရက်နေ့တွင်လည်း စစ်ကောင်စီက ဗန်းမော်မြို့ထဲသို့ လေကြောင်း တိုက်ခိုက်မှု ပြင်းပြင်းထန်ထန် ပြုလုပ်နေသည်ကြောင်း ၎င်းက ပြောသည်။
“မနေ့ကနေ အခုအချိန်ထိတော့ သူက ဆက်တိုက်ပဲ ဗုံးကြဲတိုက်ခိုက်မှုတွေလုပ်နေပါတယ်။အရပ်သား ပြည်သူလူထုတွေရဲ့ နေအိမ် တော်တော်များများကတော့ ပျက်စီးသွားပါပြီ”ဟု ဦးဇော်ဆန်က ပြောသည်။
ဇန်နဝါရီ ၂၄ ရက်နေ့ တစ်ရက်တည်းတွင် စစ်ကောင်စီက ဗန်းမော်ကို တိုက်လေယာဉ် Y12 လေယာဉ်ဖြင့် အကြိမ် ၂၀ကျော် ဗုံးသီးအများအပြား ကြဲချတိုက်ခိုက်ခဲ့သည်ဟု လေကြောင်း တိုက်ခိုက်မှု မှတ်တမ်းအရ သိရသည်။
“ဗန်းမော်မှာ ကျန်ရှိနေတဲ့ စစ်ကောင်စီရဲ့ တပ်စခန်း ၂ခုကိုတော့ အနှေးနဲ့အမြန်တော့ KIAနဲ့မဟာမိတ်တပ်ဖွဲ့တွေက ဒီရက်ပိုင်းအတွင်းမှာ မရမက ထိုးစစ်ဆင် တိုက်ခိုက်သိမ်းယူနိုင်မယ်လို့ ခန့်မှန်းပါတယ်။ဗန်းမော်မြို့သိမ်းပိုက်ပြီးရင်တော့ အပေါ်ပိုင်းဆိုရင် ဝိုင်းမော် ၊ မြစ်ကြီးနားဘက်ကို တိုက်ပွဲတွေက အဲဒီဘက် ခြေဦးလှည့်လာမယ်ထင်တယ်။ အဲဒီလိုဆို စစ်ကောင်စီရဲ့ အဓိက တပ်စခန်းတွေက မပခ အခြေစိုက်ရာ မြစ်ကြီးနားရယ်၊ ဖားကန့်ရယ် ဝိုင်းမော်ဘက်ခြမ်း ဒါတွေ ကင်းစင်သွားပြီရင်တော့ ကချင်ပြည်နယ်မှာကုန်သလောက်ရှိပါပြီ။ မိုးညှင်း ၊မိုးကောင်းဘက်မှာတော့ လက်ကျန်စခန်းတွေကျန်ရှိနေဆဲပါ” ဟု စစ်ရေးလေ့လာသူ ဦးဇော်ဆန်ကကချင်ဒေသတိုက်ပွဲ အလားအလာကို သုံးသပ်ပြောကြားသည်။
ဗန်းမော်မြို့တွင်စစ်တပ် စစ်ရှုံးပါက စစ်ကောင်စီအနေဖြင့် KIA ဌာနချုပ် လိုင်ဇာနှင့် မိုင်ဂျာယာန်ဒေသကို လေကြောင်း တိုက်ခိုက်မှုများ ပြုလုပ်လာနိုင်၍ ပြည်သူများ သတိရှိကြရန် လည်း ၎င်းက သတိပေးသည်။ ထို့ပြင် စစ်ကောင်စီက အရပ်
သား ပြည်သူများကို ပစ်မှတ်ထားသည့် လေကြောင်း တိုက်ခိုက်မှုများအပါအဝင်စစ်ရာဇဝတ်မှု ကျူးလွန်သည့် လုပ်ရပ်များကို သေချာစွာ မှတ်တမ်းတင်ထားရန် ဦးဇော်ဆန်က တိုက်တွန်းသည်။
