ကျော်ဇော/People’s Spring
မန္တလေး၊ မြင်းခြံမြို့နယ်၊ ဆင်းဂွတ်ကျေးရွာ စာသင်ကျောင်းအား စစ်ကောင်စီက လေကြောင်းတိုက်ခိုက်ခဲ့ရာ ရဲဘော်များအပါအဝင် ၁၈ ဦးခန့်သေဆုံးပြီး ၂၀ကျော်ထိခိုက်ဒဏ်ရာရခဲ့ကြောင်း ဒေသခံများနှင့် တော်လှန်ရေးတပ်ဖွဲ့များက ပြောသည်။
ယနေ့(ဇန်နဝါရီ ၂၆ရက်)နံနက် ၇နာရီခွဲခန့်က မြင်းခြံ-ဆီမီးခုံလမ်းပိုင်းရှိ ဆင်းဂွတ်ကျေးရွာစာသင်ကျောင်းအား စစ်ကောင်စီက ဂျက်ဖိုက်တာတစ်စီးဖြင့် ပေါင် ၂၀၀ဗုံးသီးနှစ်လုံးကြဲချခဲ့ပြီး MI-35 ဖြင့်လည်း စစ်သေနတ်များဖြင့် လာရောက်ပစ်ခတ်ခဲ့ခြင်းဟု ၎င်းတို့က ပြောသည်။
“စာသင်ကျောင်းက ရွာအဝင်ကားလမ်းဘေးလည်းဟုတ်သလို ရွာနဲ့လည်းအနီးကပ်ရှိနေတော့ ပြည်သူတွေပါ ထိသွားတာမျိုး”ဟု မြင်းခြံခရိုင် အမှတ်(၂)တပ်ရင်းမှ တာဝန်ရှိသူတစ်ဦးက လူထုနွေဦးသို့ ပြောသည်။
Public Service Announcement
လေကြောင်းတိုက်ခိုက်ခံရမှုတွင် မြင်းခြံမြို့နယ် ပြည်သူ့ကာကွယ်ရေးအဖွဲ့(ပကဖ)မှ ရဲဘော် ၁၀ဦးခန့်ကျဆုံးပြီး ကလေးငယ်တစ်ဦး အပါအဝင် ဒေသခံပြည်သူ ရှစ်ဦးခန့်သေဆုံးခဲ့ပြီး ၂၀ ကျော် ထိခိုက်ဒဏ်ရာရသည့်အပြင် အိမ်မွေးတိရိစ္ဆာအချို့ပါ သေဆုံးခဲ့ကြောင်း ၎င်းက ဆက်ပြောသည်။
အဆိုပါ ဆင်းဂွတ်ကျေးရွာစာသင်ကျောင်း၌ CDM ကျန်းမာရေးဝန်ထမ်းအချို့ဖြင့် ကျေး လက်ဆေးပေးခန်းတစ်ခု ဖွင့်လှစ်ထားသည်။
လက်ရှိအခြေအနေတွင် ဆင်းဂွတ်ရွာစာ သင်ကျောင်းအား စစ်ကောင်စီ၏ လေကြောင်းတိုက်ခိုက်ခံရမှုအပြီး နာရီဝက်အတွင်း ရှင်းလင်းရေးလုပ်ဆောင်၍ ကျဆုံးရဲဘော်များနှင့် ပြည်သူများအပါအဝင် ထိခိုက်ဒဏ်ရာရသူ များအား နေရာပြောင်းရွှေ့ကာ ကယ်ဆယ်ရေးလုပ်နိုင်ခဲ့ပြီဖြစ်ကြောင်း ဒေသတော်လှန်ရေးတပ်ဖွဲ့များက ပြောသည်။
စစ်ကောင်စီ၏ လေကြောင်းမှ ဗုံးကြဲတိုက်ခိုက်မှုတွင် စာသင်ကျောင်းအဆောင်ပေါ်သို့ ဗုံးသီးတစ်လုံး၊ ကျောင်းဆောင်ရှေ့သို့ ဗုံးသီးတစ်လုံး ကျရောက်ပေါက်ကွဲခဲ့သည်။
