ပုသိမ်ကြီးမြို့နယ်ကအမျိုးသား၈ဦး​ပေါ်တာဆွဲခံရ

■အုန်း​ချောရွာမီးပွိုင့်မှာ အရပ်ဝတ်နဲ့ ​​သေနတ်ကိုင် ထားသူ​တွေက အမျိုးသား​တွေကိုပိတ်ဆို့ဖမ်းဆီး

ရှိန်း/People’s Spring

မန္တလေးမြို့၊ပုသိမ်ကြီးမြို့နယ်ထဲက ကျေးရွာတွေမှာ ၃ရက်အတွင်း အမျိုးသား၈ဦးပေါ်တာဆွဲခံရတယ်လို့ ​ဒေသခံ​တွေက​ပြောပါတယ်။

ဇန်နဝါရီလ ၃၁ ရက်နေ့ညပိုင်းကပုသိမ်ကြီးမြို့နယ်၊ဆင်ရွာကြီးရွာကို စစ်တပ်က​ဧည့်စာရင်းစစ်ကာ တခြားနယ်ကနေ စစ်ရှောင်လာနေတဲ့ အသက်၃၀ကျော်အရွယ်အမျိုးသားကို စစ်မှု ထမ်းဆောင်ဖို့ ဖမ်းဆီးသွားတယ်လို့ မိသားစုနဲ့နီးစပ်သူတဦးကပြောပါတယ်။

Public Service Announcement

“အဆက်စပ်တွေနဲ့လိုက်တာ။သိန်းကိုရာဂဏန်းကုန်နေပြီ။လွှတ်ပေးမယ်ဆိုပြီးအခုထိမလွှတ်သေးဘူး။ နန်းတွင်းထဲမှာလို့ပြောတယ်”လို့ မိသားစုနဲ့နီးစပ်သူတဦးကပြောပါတယ်။

အလားတူပဲအဲဒီနေ့ညပိုင်းက မြို့ထဲမှာအလုပ်လုပ်ပြီး ရွာထဲကိုပြန်လာတဲ့ ဆင်ရွာကြီးရွာကအမျိုးသား ၃ ဦးလည်းဖမ်းဆီးခံလိုက်ရတယ်လို့သိရပါတယ်။

ဖေဖော်ဝါရီလ၂ ရက် ၊နေ့လည်ပိုင်းမှာလည်း အရပ်ဝတ်တွေနဲ့စစ်သားတွေက အုန်းချောကျေးရွာ အလည်ကမီးပွိုင့်မှာ သွားလာနေတဲ့အမျိုးသားလေးဦးကို သေနတ်တွေနဲ့ ဝိုင်းပြီးကားပေါ်ဆွဲတင်သွားတယ်လို့ဒေသခံတွေကပြောပါတယ်။ ​​သေနတ်​တွေနဲ့အရပ်ဝတ်​တွေက အမျိုးသား​တွေကို ဝင်ဆွဲတာမှာ ​​လမ်းသွားလမ်းလာ​တွေက မြင်​တွေ့​နေရ​ပေမယ့် ​ကြောက်တဲ့အတွက် ဘယ်သူမှ မတားဆီးရဲကြဘူးလို့ ​ဒေသခံတစ်ဦးက​ပြောပါတယ်။

စစ်မှုထမ်းအပတ်စဥ် (၉ )ခေါ်ယူစဥ်ကလည်းပုသိမ်ကြီးမြို့နယ်ကစက်ရုံတွေကို စစ်တပ်ကဝင်ရောက်စီးနင်းကာပေါ်တာဆွဲခဲ့တယ်လို့သိရပါတယ်။