ဟန်နွေ/People’s Spring
ပဲခူးတိုင်း၊ သာယာ၀တီခရိုင်၊ အုတ်ဖိုမြို့နယ် စင်မြင့်ကျေးရွာအနီးတိုက်ပွဲအတွင်း ထိခိုက်သေဆုံးမှုရှိခဲ့သည့် စစ်ကောင်စီတပ်က စင်မြင့်ရွာရှိ ပြည်သူများ၏ နေအိမ်များမီးရှို့ပြီး စစ်အင်အားထပ်မံဖြည့်တင်း စစ်ကြောင်းထိုးရန် ပြင်နေ၍ တိုက်ပွဲများ အချိန်မရွေးဖြစ်လာနိုင်ကြောင်း ပြည်သူ့ကာကွယ်ရေးတပ်(PDF) သာယာ၀တီခရိုင် တပ်ရင်း(၃၈၀၂) တပ်ခွဲ(၅) တာဝန်ရှိသူက ပြောသည်။
ဖေဖော်ဝါရီ ၄ရက်တွင် စစ်မြင့်ကျေးရွာအနီးဖြစ်ခဲ့သည့်တိုက်ပွဲအတွင်း စစ်ကောင်စီဘက်က ၆ဦးထက်မနည်း သေဆုံးခဲ့ပြီး ဒဏ်ရာရသူများရှိခဲ့သည့် အခြေအနေတွင် စစ်ကောင်စီတပ်က စစ်မြင့်ရွာမှ နေအိမ် ၁၆လုံးအား မီးရှို့ဖျက်ဆီးသွားကြောင်း မီးရှို့ခံရသည့် နေအိမ်များ ရုပ်သံမှတ်တမ်းကို တပ်ရင်း(၃၈၀၂) တပ်ခွဲ(၅)က ယနေ့နံနက်တွင် ဖော်ပြသည်။
“အထိနာလို့ မဆိုင်တဲ့ ပြည်သူမဲပြီးအိမ်တွေမီးရှို့တာ။ PDF မနိုင်ရင် ပြည်သူအိမ် မီးရှို့တာပဲ။အရင်ကလည်း ရှို့တာပေါ့”ဟု တပ်ခွဲ(၅) တာဝန်ရှိသူက ပြောသည်။
Public Service Announcement
လက်ရှိတွင် ပြည်သူများသည် ဆွေးမျိုးများနှင့် အသိနေအိမ်များ၌ ခိုလှုံနေကြရပြီး အချို့သည် တောတောင်ထဲ၌ စစ်ရှောင်နေကြရသည်ဟုဆိုသည်။
ထို့ပြင် စစ်ကောင်စီဘက်ကလည်း စစ်ကြောင်းထိုးရန် ပြင်ဆင်နေ၍ တိုက်ပွဲများ အချိန်မရွေး ဖြစ်ပွားလာနိုင်ကြောင်းတပ်ရင်း(၃၈၀၂)တပ်ခွဲ(၅) တာဝန်ရှိသူက ပြောသည်။
“ရွာတွေဘက် လက်နက်ကြီးနဲ့ ရမ်းသန်း ပစ်တာ ဒရုန်းနဲ့ ဗုံးကြဲတာတွေ လုပ်နေတယ်” ဟု တပ်ခွဲ(၅) တာဝန်ရှိသူက ပြောသည်။
တိုက်ပွဲအချိန်မရွေးထပ်ဖြစ်နိုင်၍ ပြည်သူတွေကို သတိပေးနေရကြောင်းလည်း ၎င်းက ပြောသည်။
စစ်ရှောင်အခြေအနေမှာ စာရင်းကောက်မထား၍ အရေအတွက် မသိရသေးဟုလည်း တပ်ခွဲ(၅) တာဝန်ရှိသူက ပြောသည်။
