ရဲခေါင်း/People’s Spring
ကရင်နီပြည်နယ်၊ ဒီးမော့ဆိုမြို့နယ်အနောက်ခြမ်းကို စစ်ကောင်စီက ယနေ့(မတ်လ ၄ ရက်) နေ့လည်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့သည်။
ဒေသတွင်း စစ်ရှောင်ကူညီနေသူများ၏ ကနဦး ပြောဆိုချက်အရ ချယ်ရီကုန်းဈေးအနီး ဂျက်ဖိုက်တာဖြင့် ဗုံးလေးကြိမ်ကြဲခဲ့ခြင်းဟု ဆိုသည်။
“ပြည်သူတစ်ဦး အနည်းကျဥ်းထိခိုက်တော့ ရှိတယ်။တိုက်ပွဲဖြစ်တာမရှိပဲ အကြောင်းမဲ့ဗုံးလာကြဲတယ်”ဟု ကရင်နီပြည်ကြားကာလအုပ်ချုပ်ရေးကောင်စီ၏ တွဲဖက်အတွင်းရေးမှူး ဦးဗညားက လူထုနွေဦးသို့ ပြောသည်။
Public Service Announcement
ထို့အပြင် လေကြောင်းဖြင့်ပစ်ခတ်သည့် နေရာပတ်ဝန်းကျင်သို့ လွိုင်ကော်မြို့နယ်ရှိ စစ်ကောင်စီတပ်က မြေပြင်မှ လက်နက်ကြီးဖြင့်လည်း ပစ်ခတ်ခဲ့သည်ဟု ဆိုသည်။
“ဗုံးချည်းပဲကြဲတာ ၁၀လုံးလောက်ရှိတယ်။အခုတော့ ဗုံးကြဲခံရတဲ့ အနီးက စျေးဆိုင်ခန်းတွေ ပိတ်ထားကြတယ်။အကုန်လုံး က လေယာဥ်ပျံ ဘယ်ချိန်ထပ်လာမလဲ စိုးရိမ်နေကြတာ”ဟု ဒီးမော့ဆို မြို့နယ်ရှိ စစ်ရှောင်အရေးကူညီနေသူတစ်ဦးက ပြောသည်။
နိုင်ငံတစ်ဝန်း အရပ်သားပစ်မှတ်များပါမချန် လေကြောင်းမှ ဗုံးကြဲသတ်ဖြတ်နေမှုသည်ပို၍ ဆိုးရွားလာပြီး ဖေဖော်ဝါရီအတွင်း ကရင်နီပြည်နယ်၌ (၁၀)နှစ်အရွယ် ကလေးငယ်နှစ်ဦး၊ (၁၇)နှစ်အရွယ် လူငယ်နှစ်ဦးနှင့် အရပ်သားပြည်သူ တစ်ဦး စုစုပေါင်း ပြည်သူ ၅ဦး သေဆုံးခဲ့ကာ ၁၁ဦး ထိခိုက်ဒဏ်ရာရခဲ့သည်။
လေကြောင်း၊ဒရုန်းနှင့် လက်နက်ကြီးကြောင့် မိုးဗြဲမြို့တွင် ပြည်သူများ၏နေအိမ် အလုံး ၅၀ကျော်၊စာသင်ကျောင်း လေးကျောင်းနှင့် ဘာသာရေးအဆောက်အဦး လေးခု မီးလောင်ပျက်စီးခဲ့ကာ ကရင်နီပြည်နယ်ရှိ အခြားမြို့နယ်များတွင်လည်း ပြည်သူနေအိမ် ရှစ်လုံး၊ ဆေးပေးခန်း တစ်ခန်း၊ စာသင်ကျောင်း တစ်ကျောင်းနှင့် ဘုန်းကြီးကျောင်း တစ်ကျောင်း ထိခိုက်ပျက်စီးခဲ့ရဟု KNDFက ယနေ့ ထုတ်ပြန်ထားသည်။
