မတ်-၁၉၊ ၂၀၂၅။ ရှိန်း/People’s Spring
စစ်ကိုင်းတိုင်း၊ ခင်ဦးမြို့နယ်မှာ ဓားပြတိုက်မှုနဲ့ ဖမ်းဆီးလာတဲ့ တရားခံတစ်ဦး ကားတံခါးဖွင့် ပြေးကာ စစ်ကောင်စီတပ်နဲ့ ပူးပေါင်းသွားတယ်လို့ တော်လှန်ရေးတပ်ဖွဲ့ဝင်တွေက ပြောပါတယ်။
ပြီးခဲ့တဲ့ တပတ်ခန့်က ခင်ဦးမြို့၊ မြကန်သာရပ်ကွက်ရှိ သစ်၊ ဝါးရောင်းဝယ်ရေး လုပ်ကိုင်သူ လင်မယားနှစ်ဦးရဲ့ နေအိမ်ကို လူ ၇ဦးက လာရောက်ဓားပြတိုက်ခဲ့ပြီး အိမ်ရှင် လင်မယားနှစ်ဦးစလုံးကို သတ်ဖြတ်ခဲ့တယ်လို့ သိရပါတယ်။
အဲဒီနောက်နေ့မှာ ဓားပြတိုက်တဲ့အဖွဲ့ထဲက တရားခံ ၄ဦးကို ဖမ်းဆီးနိုင်ခဲ့ပြီး နောက်ရက်မှာ ထပ်တိုး၂ဦးကို သက်ဆိုင်ရာ တော်လှန်ရေးတပ်တွေက ဖမ်းဆီးခဲ့တယ်လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
Public Service Announcement
“ဖြစ်စဉ်က အရုပ်ဆိုးလွန်းပါတယ်ဗျာ။ PDFစိုးမိုးနေရာမှာဖြစ်တာလေ။ အမှုက မပေါ်လို့ကိုမဖြစ်ဘူး”လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
အဲဒီဓားပြတိုက်သူတွေထဲက နောက်ဆုံးကျန်တဲ့ အမျိုးသားကို ဒီနေ့ ခင်ဦးမြို့ ပေါ်မှာပဲ တော်လှန်ရေးတပ်တွေက ဖမ်းဆီးခေါ်လာစဉ်မှာ မြို့ထဲက ဆေးရုံကြီးရှေ့အရောက်မှာ ကားတံခါးကိုဖွင့်ပြီး ဆေးရုံမှာတပ်စွဲထားတဲ့ စစ်အုပ်စုထံ ဆင်းပြေးသွားတာလို့ ဖြစ်စဉ်ကို သိရှိသူတစ်ဦးက ပြောပါတယ်။
“ဒီနေ့ နေ့လည်လောက်ကပဲ ဖမ်းတဲ့အဖွဲ့ထဲပါတဲ့ ရဲဘော်ကဖုန်းဆက်ပြောတာ။ ဘယ်လိုဖြစ်လဲကို မပြောတက်ပါဘူး”လို့ နောက်ထပ် တော်လှန်ရေးတပ်ဖွဲ့ ခေါင်းဆောင်တစ်ဦးက ပြောပါတယ်။
ဒီဖြစ်စဉ်မှာ ဘယ်တော်လှန်ရေးတပ်ဖွဲ့က တရားခံဖမ်းဆီးအရေးယူတာတွေ ပြုလုပ်နေလဲဆိုတာကိုတော့ သတင်းဖြေခဲ့တဲ့ နှစ်ဖွဲ့လုံးက မပြောခဲ့ကြပါဘူး။
