မတ် ၂၄၊ ၂၀၂၅။ဟန်နွေ/People’s Spring
ပဲခူးတိုင်း၊ တောင်ငူခရိုင် ၊ အုတ်တွင်းမြို့နယ်အတွင်းရှိ ကျေးရွာတစ်ရွာကို စစ်ကောင်စီက ဒရုန်း၊ လက်နက်ကြီးဖြင့် တိုက်ခိုက်ခဲ့၍ အရပ်သားပြည်သူ သေဆုံးထိခိုက်ရှိခဲ့ကြောင်း တောင်ငူခရိုင် တပ်ရင်းအမှတ် (၃၅၀၂)က ယနေ့ (မတ်လ ၂၃ရက်) သတင်းထုတ်ပြန်သည်။
မတ်လ ၂၂ရက်နှင့် ၂၃ ရက်တွင် တော်လှန်ရေးအင်အားစုများ တိုက်ပွဲဖော်ဆောင်ခြင်းမရှိ၊ထိတွေ့တိုက်ပွဲဖြစ်ပွားခြင်းမရှိဘဲ ကျေးရွာအတွင်း မီးလောင်ဗုံးများ အသုံးပြုတိုက်ခိုက်လာခြင်းဖြစ်ဟု ဖော်ပြသည်။ တိုက်ခိုက်ခံရသည့် ကျေးရွာ၏ အမည်ကို ဖော်ပြမထားဘဲ တိုက်ခိုက်ခံရ၍ နေအိမ် မီးလောင်မှု၊ ပြည်သူ ထိခိုက်မှု ရုပ်သံကို ဖော်ပြထားသည်။
ထိုသို့တိုက်ခိုက်ခံရ၍ အရပ်သား တစ်ဦး သေဆုံးပြီး ပြည်သူ ၇ဦးထက်မနည်း ထိခိုက်ခဲ့ကြောင်း၊နေအိမ် ၇လုံး ပျက်စီးခဲ့ကြောင်း အသိပေးသည်။
Public Service Announcement
တပ်ရင်း(၃၅၀၂)က ထုတ်ပြန်သည့်ရုပ်သံတွင် ထိခိုက်သူများအား ကယ်ဆယ်ရေးလုပ်ဆောင်နေမှုကို တွေ့ရသည်။
ထို့ပြင် သေဆုံးသူ အမျိုးသားတစ်ဦးအနီးတွင် မိခင်အပါအဝင်မိသားစုဝင်များ ငိုယိုနေသည်ကိုလည်း တွေ့ရသည်။
“စခတွေချတဲ့ ဒရုန်းနဲ့ ကျနော်တို့ ပြည်သူတစ်ယောက် ပေးဆပ်လိုက်ရတယ်”ဟု အမျိုးသားတစ်ဦး၏ ပြောဆိုသံကိုလည်း ကြားရသည်။
“သူတို့က ပုံမှန်ဆို စစ်ကြောင်းထိုးပြီး ရွာက ပစ္စည်းတွေကို ကားတွေနဲ့တင်ပြီး ယူနေကြပါ။ လက်နက်ကိုင် ဓားပြ တွေပါ။ ခုလို ပြည်သူ့ကို အကြောင်းမဲ့ တိုက်ခိုက် သတ်ဖြတ်လေလေ စကစ နိဂုံး နီးလာလေလေပါပဲဗျ”ဟု PDF တပ်ရင်း(၃၅၀၂)ပြန်ကြားရေး တာဝန်ခံက ပြောသည်။
တပ်ရင်း(၃၅၀၂)နှင့် ပူးပေါင်းတပ်များသည် မတ်လ ဒုတိယပတ်အတွင်းက ရန်ကုန် – မန္တလေးလမ်းဟောင်းအနီး အုတ်တွင်းမြို့နယ် ကျောက်တိုင်ရွာ၌ တပ်စွဲထားသည့် စ်စကောင်စီတပ်ကို တိုက်ခိုက်ခဲ့ရာ သေဆုံးထိခိုက်မှုရှိခဲ့သည်။
တိုက်ခိုက်ခံရသည့် စစ်ကောင်စီတပ်က ကျောက်တိုင်ရွာကို အင်အားဖြည့်တင်းထားသည်ဟု တပ်ရင်း(၃၅၀၂) ပြန်ကြားရေးတာဝန်ခံက မတ်လ ၁၉ရက်တွင် ပြောထားသည်။ ထို့ပြင် တိုက်ပွဲဖြစ်ပွားမှုများ ဆက်ရှိနေနိုင်၍ ပြည်သူများအနေဖြင့် စစ်ကောင်စီတပ်နှင့် ရောနှောနေထိုင်ခြင်းမပြုရန်၊ စစ်ကောင်စီ၏ လူသစ်စုဆောင်းမှု ခံရပါက ထွက်ပြေးနိုင်ရေး ကြိုးစားရန် တပ်ရင်း(၃၅၀၂) ပြန်ကြားရေးတာဝန်ခံက တိုက်တွန်းထားသည်။
