အင်အားပြင်းငလျင်လှုပ်ခတ်မှုကြောင့် တောင်ငူမြို့ရှိ ဝေဠုဝန်ကျောင်းသိမ်ပြိုကျမှုတွင် ကိုရင်တစ်ပါးအပါအဝင် စစ်ရှောင်ကလေးငယ် ၅ဦး သေဆုံးခဲ့ရကြောင်း အဆိုပါမြို့ရှိ လူမှုကူညီရေးအသင်းမှ တာဝန်ရှိသူက ပြောသည်။
” ကလေးငါးဦးပါ။ ကိုရင်တစ်ပါးပါတယ်။ စစ်ဘေးရှောင်တွေလို့ သိရတယ်။ ကျနော်တို့က ကူညီရေးတွေဆိုတော့ သေချာတော့ မသိရဘူး”ဟု ၎င်းက ပြောသည်။
ထို့အပြင် ငလျင်ကြောင့် တောင်ငူမြို့တွင် ထိခိုက်ပျက်စီးမှုများရှိသည်ဟု ဒေသခံများက ပြောသည်။
Public Service Announcement
ယနေ့(မတ်၂၈ရက်) နေ့လယ်ပိုင်းက အင်အားပြင်းငလျင်လှုပ်ခတ်မှုကြောင့် ရှမ်းပြည်တောင်ပိုင်း၊ အောင်ပန်းမြို့နယ်တွင် အင်အားပြင်းငလျင်ကြောင့် ဟိုတယ်အောင်ပန်းပြိုကျမှုအတွင်း ပိတ်မိနေသူများအား ရှာဖွေကယ်ဆယ်ရေးလုပ်ဆောင်နေကြောင်း ဒေသခံအချို့က ပြောသည်။
အောင်ပန်းမြို့နယ်၏ လမ်းမကြီးဘေးရှိ ခြောက်ထပ်အမြင့်ရှိ ဟိုတယ်အောင်ပန်းသည် အလုံးစုံပြိုကျခဲ့ခြင်းဖြစ်ပြီး ဝန်ထမ်းများနှင့် တည်းခိုသူ ၂၀ထက်မနည်းပိတ်မိနေကြောင်း ဒေသခံတို့၏ ပြောဆိုချက်အရ ကနဦး ယူဆထားရသည်။
ငလျင်သည် ရစ်ချ်တာစကေး ၇ဒဿမ ၇အဆင့်ဖြင့် ယနေ့(မတ်လ ၂၈ရက်) နံနက် ၁၂နာရီ ၅၀မိနစ်တွင် ပထမအကြိမ်လှုပ်ခတ်ပြီး နောက်ဆက်တွဲငလျင်အချို့ဆက်လှုပ်ခဲ့သည်။
အင်အားအလွန်ပြင်းထန်သောငလျင်ဖြစ်၍ နောက်ဆက်တွဲငလျင်များ ထပ်လှုပ်နိုင်ကြောင်းပညာရှင်အချို့က သတိပေးသည်။
