'/%3E%3C/svg%3E){kind=small}
ငလျင်ဒဏ်ကြောင့် ရန်ကုန်အပါအဝင် တစ်နိုင်ငံလုံးအတိုင်းအတာနဲ့ လျှပ်စစ်ဓာတ်အားပြတ်တောက်နေပြီး ဖုန်း၊ အင်တာနက် တွေလည်း လိုင်းကျနေတယ်လို့ ဒေသခံတွေကပြောပါတယ်။
“ငလျင်လှုပ်ပြီးကတည်းက မီးကမလာတော့တာ။ ဖုန်းတွေလည်းကောင်းကောင်းခေါ်မရဘူး။ ဝိုင်ဖိုင်တွေတော့ရသေးတယ်” ဟု မတ် ၂၈ ငလျင်လှုပ်ခတ်မှုနဲ့ပတ်သက်ပြီး ရန်ကုန်ဒေသခံတစ်ဦးကပြောပါတယ်။
ရန်ကုန်အပါအဝင်တစ်နိုင်ငံလုံးအတိုင်းအတာနဲ့ မီးပျက်နေတာဖြစ်ပြီး ည ကိုးနာရီကျော်သည်အထိ မီးမလာသေးဘူးလို့သိရပါတယ်။
Public Service Announcement
ရန်ကုန် လျှပ်စစ်ဓာတ်အား ပေးရေးကော်ပိုရေးရှင်းက ငလျင်ဒဏ်ကြောင့် လျှပ်စစ်ဓာတ်အားပြတ်တောက်ခဲ့တယ်လို့ ဒီနေ့ နေ့လည်ပိုင်းမှာကြေညာခဲ့ပါတယ်။
ပြည်မြို့မှာဆိုရင်လည်း ငလျင်လှုပ်တဲ့ အချိန်ကတည်းက မီးတွေပျက်နေတာလို့ ဒေသခံတစ်ဦးကပြောပါတယ်။
ရန်ကုန်မြို့မှာ အလှည့်ကျ မီးပေးစနစ်ကြောင့် တချို့မြို့နယ်တွေမှာ နံနက် ၅ နာရီကတည်းက မီးပျက်ပြီး ပြန်မလာတော့တာလို့ ဒေသခံတွေကဆိုပါတယ်။
လှိုင်မြို့နယ်လျှပ်စစ်ရုံးက လေးနာရီလောက်သာမီးပျက်မယ်လို့ ကြေညာထားပေမယ့် ည ၉ နာရီခွဲအထိ မီးမလာသေးဘူးလို့ လှိုင်မြို့နယ်မှာနေထိုင်သူတစ်ဦးကပြောပါတယ်။
“ငလျင်လှုပ်ပြီးတဲ့ အချိန်ကတည်းက ဖုန်းလိုင်းတွေပျက်သွားတာ။ မန္တလေးက အသိတွေဆီကို ဖုန်းဆက်တာ အခုထိမရသေးဘူး” လို့ ရန်ကုန်ဒေသခံတစ်ဦးကပြောပါတယ်။
ဖုန်းတွေ ခေါ်လို့မရပေမယ့် ဝိုင်ဖိုင်တွေတော့ သုံးလို့ရနေသေးတယ်လို့ ၎င်းကဆိုပါတယ်။ မန္တလေးမှာ မိုင်တဲဖုန်းလိုင်းတွေတော့ သုံးလို့ရနေတာလည်းရှိတယ်လို့ ဒေသခံအချို့က ပြောပါတယ်။
