ငလျင်ဘေးအလှူခံတဲ့ လူငယ်တွေကို စစ်ကောင်စီအဖွဲ့ ဖမ်းဆီးနေ

ဧပြီ ၄၊၂၀၂၅။မေ/People’s Spring

မြို့ကြီးတွေမှာ ငလျင်ဘေးအလှူခံနေတဲ့လူငယ်တွေကို ထောက်ခံစာမပါလို့ဆိုပြီး စစ်ကောင်စီရဲ့ အုပ်ချုပ်‌ရေးမှူးနဲ့ ရဲတွေက ဖမ်းဆီးနေတယ်လို့ လူငယ်တွေဆီက ပြောပါတယ်။

ကရင်ပြည်နယ်၊ ဘားအံမြို့နဲ့ မန္တလေးတိုင်း၊ ပြင်ဦးလွင်မြို့တို့မှာ မနေ့က လူငယ်တွေဖမ်းဆီးခံခဲ့ရပြီး တချို့တဝက်ပြန်လွတ်လာပြီလို့ သိရပါတယ်။

ဧပြီလ ၃ရက်က ဘားအံမြို့မှာ ငလျင်ဘေးအတွက် လမ်းမပေါ်မှာ အလှူခံနေတဲ့လူငယ်အဖွဲ့ကို စစ်ကောင်စီရဲ့ အုပ်ချုပ်ရေးမှူးနဲ့ ရဲတွေက ထောက်ခံစာမပါလို့ ဖမ်းဆီးခဲ့တာလို့ သိရပါတယ်။

Public Service Announcement

“အိမ်အထိလိုက်ပြီး ငွေရော၊ပစ္စည်းတွေရော စစ်ဆေးမယ်ဆိုပြီး ပြောတယ်။ငွေ ပမာဏကများတယ်။သူတို့က အရင်က ကိစ္စတွေပါလိုက်လာရလို့ အခုရှောင်နေရပါတယ်”လို့ မြို့ခံလူငယ်တစ်ဦး ကပြောပါတယ်။

အလားတူ ပြင်ဦးလွင်မြို့မှာလည်း ဧပြီ ၃ရက်က နာရီစဉ်အနီး အလှူခံတဲ့သူတွေကို ရဲတွေကလာ ရောက်ဖမ်းဆီးခဲ့ပြီး ရဲစခန်းမှာ ခံဝန်ထိုးကာပြန်လွှတ်ခဲ့တယ်လို့ သိရပါတယ်။

“တမြို့လုံးဖမ်းတာ။မိုးကြိုးမှာလည်း အုပ်ချုပ်ရေးမှူးတွေက အလှူခံရထားတဲ့ ငွေတွေကိုထားခဲ့ခိုင်းတယ်။ လူငယ်တွေက မိဘတွေပြန်ခေါ်ပြီးညှိတယ်။လှူတဲ့နေရာတွေကို အုပ်ချုပ်ရေးမှူးတွေကိုယ်တိုင်လိုက်ခဲ့ပါလို့ ပြောနေတာ။အဲ့ဟာတွေကလည်း လက်မခံဘူး။ဘယ်လိုပြီးသွားကြလဲမသိဘူး”လို့ မြို့ခံတစ်ဦးက ပြောပါတယ်။

ဖမ်းဆီးခဲ့တဲ့လူငယ်တွေကို ထောက်ခံချက်မပါလို့ဆိုတဲ့ အကြောင်းပြချက်နဲ့ စစ်အုပ်စုက ဖမ်းဆီးနေတာလို့ လူငယ်တွေက ပြောပါတယ်။