ဧပြီ ၁၂၊၂၀၂၅။ ဟန်နွေ/People’s Spring
အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနအနေဖြင့် ခုခံကာကွယ်စစ်မှလွဲ၍ ထိုးစစ်အားလုံးကို ဧပြီ ၁၃ရက်မှ ၂၀ရက်အထိ တပတ်ကြာ ဆက်လက်ရပ်ဆိုင်းထားမည်ဖြစ်ကြောင်း အသိပေးခဲ့ပြီး အဆိုပါ ကာလအတွင်း ငလျင်ဘေးကူညီရေး အဖွဲ့များအား လိုအပ်သည့်အကူအညီပေါ်ရန်၊ ကာကွယ်စောင့်ရှောက်မှုပေးရန် ညွှန်ကြားချက် ထုတ်ပြန်သည်။
မတ်လ ၂၈ရက်က လှုပ်ခတ်ခဲ့သော စစ်ကိုင်းငလျင်ကြီးကြောင့် အသက်အိုးအိမ် ထိခိုက်ဆုံးရှုးမှု ကြီးမားခဲ့သော မြန်မာပြည်သူများအား နှစ်သိမ့်အားပေးမှု ပြုနိုင်ရန်ရည်ရွယ်၍ အမျိုးသားညီညွတ်ရေးအစိုးရက ဧပြီ၁၃ ရက်မှ ၂၀ရက်အထိ ကာလကို “နိုင်ငံလုံးဆိုင်ရာ ဝမ်းနည်းကြေကွဲမှုနှင့် နှစ်သိမ့်အားပေးမှု ရက်သတ္တပတ်” အဖြစ် သတ်မှတ်ထားရာ အဆိုပါ ကာလ၌ပင် ထိုးစစ်များ ရပ်ဆိုင်းရန် ထပ်မံကြေညာခဲ့ခြင်းဖြစ်သည်။
NUG အနေဖြင့် မတ်လ ၂၈ရက် စစ်ကိုင်း ငလျင်ဘေးကြုံရပြီးနောက် ခုခံကာကွယ်မှုမှ အပ ထိုးစစ်အားလုံးကို မတ်လ ၃၀ရက်မှ ဧပြီ ၁၂ရက်အထိ ပထမအကြိမ် အပစ်ရပ်ကြေညာခဲ့ရာ အဆိုပါ အပစ်ရပ်ကြေညာမှု သက်တမ်းကုန်ဆုံးပြီဖြစ်သော ယနေ့တွင် နောက်ထပ် တပတ်ကြာ အပစ်ရပ်သက်တမ်းတိုးခဲ့ခြင်းဖြစ်သည်။
Public Service Announcement
ထို့ကြောင့် လာမည့်ရက်သတ္တပတ်အတွင်း လူသားချင်း စာနာထောက်ထားမှု အကူအညီပေးရေးဆိုင်ရာ လုပ်ငန်းများ ဆက်လက်ဆောင်ရွက်နိုင်ရေး ခုခံကာကွယ်စစ်မှလွဲ၍ ထိုးစစ်အားလုံး ဆက်လက် ရပ်ဆိုင်းထားရန်နှင့် ပြည်တွင်းပြည်ပ ကူညီကယ်ဆယ်ရေးအဖွဲများအား လိုအပ်သောအကူအညီနှင့် ကာကွယ်စောင့်ရှောက်မှုပေးရန် အထူးညွှန်ကြားချက် ညွှန်ကြားထားပြီးဖြစ်ဟု ကာကွယ်ရေးဝန်ကြီးဌာနက ထုတ်ပြန်သည်။
NUGနှင့် တိုင်းရင်းသားတော်လှန်ရေးတပ်များက ယခုကာလ၌ အပစ်ရပ်စဲရေး ကြေညာထားသကဲ့သို့ စစ်ကောင်စီကလည်း ဧပြီ ၂ရက်မှ ၂၂ရက်နေ့အထိ အပစ်ရပ်စဲရေး ကြေညာထားသည်။ သို့သော် စစ်ကောင်စီ အနေဖြင့် ငလျင်ဘေးဒဏ်သင့် ဒေသမှ ပြည်သူများ အပါအဝင် နိုင်ငံတဝန်း လေကြောင်း ဗုံးကြဲတိုက်ခိုက်မှုများ ဆက်လက်ကျူးလွန်ခဲ့သည်။ စစ်ကောင်စီ၏ လေကြောင်း။ လက်နက်ကြီး၊ ဒရုန်း တိုက်ခိုက်မှုများကြောင့် ငလျင်ဘေးပြီးနောက်ပိုင်း နိုင်ငံတဝန်း အရပ်သား ပြည်သူ ၁၀၀ ကျော် သေဆုံးခဲ့ရသည်။
ထိုသို့ လေကြောင်း တိုက်ခိုက်မှုများကြောင့် ပြည်သူများအနေဖြင့် စစ်ကောင်စီ၏ အပစ်ရပ်စဲရေးကြေညာချက်ကို အယုံအကြည်မရှိကြဘဲ လိုအပ်သည့် ဗုံးခိုကျင်းများကို ခိုင်ခိုင်မာမာ တူးထားရန် ပြင်ီဥးလွင်ခရိုင် ပကဖ သတင်းပြန်ကြားရေးတာဝန်ခံက ပြောကြားသည်။
