ဧပြီ-၁၅၊၂၀၂၅။ဧရာ/People’s Spring
စစ်ကိုင်းငလျင်ဘေးအဆိုးဆုံးခံခဲ့ရသည့် မန္တလေးမြို့တွင် ယနေ့ (ဧပြီလ ၁၅ရက်)ညနေပိုင်း၌ မိုးသည်းထန်စွာရွာသွန်းပြီး ရေဘေးပါ ကြုံတွေ့နေကာ အဆောက်အအုံအချို့ ထပ်မံပြိုကျသည်။
မိုးသည် မန္တလေးတိုင်း မြို့နယ်အများစုတွင် ဧပြီ ၁၅ ရက်နေ့ညနေ ၃နာရီခန့်မှ စတင်၍ မိုးရွာခဲ့ပြီး မန္တလေးမြို့ပေါ်ရပ်ကွက်များရေကြီးသည်အထိ မိုးကောင်းခဲ့သည်။
မိုးရွာနေစဥ်လမ်း၂၆လမ်း၊ ၈၀×၈၁ လမ်းထဲမှအထပ်သုံးထပ်ရှိ Fine Store အဆောက်အအုံ ပြိုကျခဲ့သည်။မတ်လ၂၈ရက်က ငလျင်ကြီးလှုပ်ပြီးအနည်းငယ် တိမ်းစောင်းသွား၍ လူနေထိုင်ခြင်းမရှိသောကြောင့် ပြိုကျမှုတွင် ထိခိုက်သူမရှိခဲ့ပေ။
Public Service Announcement
“စဖြစ်တဲ့နေ့ထဲက လဲ Main တိုင်တွေက တော်တော်ကိုထိထားတာဆိုတော့မိုးပြင်းတော့ တန်းကို ဖိချတော့တာ”ဟု ဒေသခံတဦးကပြောသည်။
ယာယီငလျင်ဘေးရှောင်စခန်းများလည်း ရေဝင်၍ ဘေးသင့်သူများအားအရေးပေါ်ထပ်မံရွှေ့ပြောင်းနေကြရသည်။
“နူရာဝဲဆွဲတာပဲ။ ငလျင်ဘေးကြောင့် နေစရာမရှိ။ ကယ်ဆယ်ရေးစခန်းရောက်တော့ရေမြုပ်။ ဆိုးလိုက်တဲ့ ဘဝတွေပါ” ဟု မန္တလေးမြို့ခံတစ်ဦးကပြောသည်။
မိုးရွာစဉ် လေပြင်းလည်းကျပြီး မန္တလေး-စစ်ကိုင်းလမ်းမှ သစ်ပင်အချို့လဲကျခဲ့သည်။ ညနေ ၆နာရီခွဲခန့်၌ မိုးတိတ်သွားသော်လည်း ည ၇နာရီခွဲခန့်၌ ပြန်ရွာနေသည်။ ယနေ့မိုးသည် မန္တလေးမြို့အပြင် အမရပူရ၊ကျောက်ဆည်၊ ဝမ်းတွင်းမြို့တို့တွင်လည်း ယသည်းထန်ခဲ့သည်။
ဧပြီ ၁၆ရက်တွင်လည်း မန္တလေးမြို့အတွင်း မိုးကြီးနိုင်ကြောင်း သတိပေးချက်ဆက်ရှိနေသည်။
မန္တလေးတိုင်း၊ ပဲခူးတိုင်း၊ တနင်္သာရီတိုင်း၊ ရှမ်းပြည်နယ်၊ ကရင်နီပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် ဧပြီလ ၁၄ ၊ ၁၅၊ ၁၆ရက်နေ့များ၌ နေရာကွက်၍ မိုးကြီးနိုင်ကြောင်း၊ မြန်မာနိုင်ငံအလယ်ပိုင်းဒေသများတွင် နေ့လယ်ပိုင်းနှင့်ညနေပိုင်းအချိန်များတွင် လေပြင်းတိုက်ခတ်ခြင်း ၊မိုးတိမ်တောင်ကြီးများဖြစ်ပေါ်တတ်ခြင်း၊ နေရာကွက်၍ မိုးကြီးခြင်း၊ မိုးသီးများကြွေကျခြင်း၊ လျှပ်စီး လက်ခြင်း၊ လေဆင်နှာမောင်းတိုက်ခတ်ခြင်းနှင့် မိုးကြိုးပစ်ခြင်း စသည့် ဘေးအန္တရာယ်များ ဖြစ်ပေါ်နိုင်၍ ဂရုစိုက်ကြရန်အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန(MOHADM)ကသတိပေးထားသည်။
စစ်ကိုင်းငလျင်ကြီးကြောင့်မန္တလေးမြို့အပါအဝင်မန္တလေးတိုင်းအတွင်း မြို့နယ်အများအပြား အထိနာခဲ့ပြီး ရှာဖွေကယ်ဆယ်ရေး၊ အရေးပေါ်တုန့်ပြန်ရေးတို့ကို စစ်ကောင်စီကမလုပ်နိုင်ခဲ့ပေ။ ဧပြီလ ၅ရက်ကလည်း မန္တလေးမြို့ပေါ်တွင် မိုးသက်လေပြင်းကျခဲ့ပြီး ငလျင်ဘေးသင့်သူများ အခက်ကြုံခဲ့သည်။ ယခုရေဘေးအတွက် စစ်ကောင်စီ၏ အကူအညီမရကြောင်း ငလျင်ဘေးသင့်သောပြည်သူ များကပြောသည်။
